15ನೇ ಆವೃತ್ತಿಯ ಐಪಿಎಲ್‌ ಟೂರ್ನಿ ಅಂತಿಮ ಘಟ್ಟಕ್ಕೆ ತಲುಪಿದ್ದು, ಪ್ಲೇ-ಆಫ್‌ ರೇಸ್‌ ಆರಂಭಗೊಂಡಿದೆ. ಈ ನಡುವೆ ಪ್ಲೇ-ಆಫ್‌ ಪ್ರವೇಶಿಸಬೇಕೆಂಬ ನಿರೀಕ್ಷೆ ಹೊಂದಿರುವ ರಾಜಸ್ಥಾನ್‌ ರಾಯಲ್ಸ್‌ v ಡೆಲ್ಲಿ ಕ್ಯಾಪಿಟಲ್ಸ್ ತಂಡಗಳು 58ನೇ ಪಂದ್ಯದಲ್ಲಿ ಮುಖಾಮುಖಿಯಾಗುತ್ತಿವೆ.
ಮುಂಬೈನ ಡಿ.ವೈ. ಪಾಟೀಲ್‌ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಇಂದಿನ ಪಂದ್ಯಕ್ಕೆ ಎರಡು ತಂಡಗಳು ಸಜ್ಜಾಗಿವೆ. ಮಹತ್ವದ ಪಂದ್ಯದಲ್ಲಿ ಟಾಸ್‌ ಗೆದ್ದಿರುವ ಡೆಲ್ಲಿ ಕ್ಯಾಪಿಟಲ್ಸ್, ಬೌಲಿಂಗ್‌ ಆಯ್ಕೆ ಮಾಡಿಕೊಂಡಿದೆ. ಇಂದಿನ ಪಂದ್ಯಕ್ಕಾಗಿ ಉಭಯ ತಂಡಗಳು ತಮ್ಮದೇ ರಣತಂತ್ರ ಹಾಗೂ ಬದಲಾವಣೆ ಮಾಡಿಕೊಂಡು ಕಣಕ್ಕಿಳಿಯುತ್ತಿವೆ. ರಾಜಸ್ಥಾನ್‌ ಪರ ಶಿಮ್ರಾನ್‌ ಹೆಟ್ಮಾಯೆರ್‌ ಬದಲಿಗೆ ವ್ಯಾನ್‌ ದರ್‌ ದುಸೇನ್‌ ಕಣಕ್ಕಿಳಿಯುತ್ತಿದ್ದಾರೆ. ಡೆಲ್ಲಿ ಪರ ರಿಪ್ಪಲ್‌ ಪಟೇಲ್‌, ಖಲೀಲ್‌ ಅಹ್ಮದ್‌ ಬದಲಿಗೆ ಲಲಿತ್‌ ಯಾದವ್ ಹಾಗೂ ಚೇತನ್‌ ಸಕಾರಿಯಾ ಆಡಲಿದ್ದಾರೆ.
ಈಗಾಗಲೇ ಪ್ಲೇ-ಆಫ್‌ ಹೊಸ್ತಿಲಲ್ಲಿರುವ ರಾಜಸ್ಥಾನ್‌ ರಾಯಲ್ಸ್‌, 14 ಪಾಯಿಂಟ್ಸ್‌ ಮೂಲಕ ಅಂಕಪಟ್ಟಿಯಲ್ಲಿ 3ನೇ ಸ್ಥಾನದಲ್ಲಿದೆ. ಆದರೆ ಡೆಲ್ಲಿ ಕ್ಯಾಪಿಟಲ್ಸ್ 10 ಪಾಯಿಂಟ್ಸ್‌ ಮೂಲಕ 5ನೇ ಸ್ಥಾನದಲ್ಲಿದ್ದು, ಇಂದಿನ ಪಂದ್ಯವನ್ನು ಗೆದ್ದರೆ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಪ್ಲೇ-ಆಫ್‌ ಕನಸು ಜೀವಂತ ಉಳಿಯಲಿದೆ. ಹೀಗಾಗಿ ಇವತ್ತಿನ ಪಂದ್ಯ ಸಾಕಷ್ಟು ಕುತೂಹಲ ಮೂಡಿಸಿದೆ.
ಉಭಯ ತಂಡಗಳು:
ರಾಜಸ್ಥಾನ್‌ ರಾಯಲ್ಸ್‌: ಜಾಸ್‌ ಬಟ್ಲರ್‌, ಯಶಸ್ವಿ ಜೈಸ್ವಾಲ್‌, ದೇವದತ್‌ ಪಡಿಕಲ್‌, ಸಂಜೂ ಸ್ಯಾಮ್ಸನ್‌(ನಾಯಕ), ರಾಸೀ ವ್ಯಾನ್‌ ದರ್‌ ದುಸೇನ್‌, ರಿಯಾನ್‌ ಪರಾಗ್‌, ಆರ್. ಅಶ್ವಿನ್‌, ಟ್ರೆಂಟ್‌ ಬೋಲ್ಟ್‌, ಪ್ರಸಿದ್ಧ್‌ ಕೃಷ್ಣ, ಯುಜುವೇಂದ್ರ ಚಹಲ್‌, ಕುಲ್ದೀಪ್‌ ಸೇನ್
ಡೆಲ್ಲಿ ಕ್ಯಾಪಿಟಲ್ಸ್: ಡೇವಿಡ್‌ ವಾರ್ನರ್‌, ಶ್ರೀಕರ್‌ ಭರತ್‌, ಮಿಚೆಲ್‌ ಮಾರ್ಷ್‌, ರಿಷಬ್‌ ಪಂತ್(ನಾಯಕ), ಲಲಿತ್‌ ಯಾದವ್, ರೋವ್ಮನ್‌ ಪೋವಲ್‌, ಅಕ್ಸರ್‌ ಪಟೇಲ್‌, ಶಾರ್ದೂಲ್‌ ಥಾಕೂರ್‌, ಚೇತನ್‌ ಸಕಾರಿಯಾ, ಕುಲ್ದೀಪ್‌ ಯಾದವ್, ಅನ್ರಿಕ್‌ ನೋಕಿಯೇ
