ಏಷ್ಯನ್ ಗೇಮ್ಸ್-2023 ಕ್ರೀಡಾಕೂಟದ ಬಹುನಿರೀಕ್ಷಿತ ಪುರುಷರ ಹಾಕಿ ಪಂದ್ಯದಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದ ಭಾರತ, ಫೈನಲ್ನಲ್ಲಿ ಜಪಾನ್ ತಂಡದ ವಿರುದ್ಧ 5-1ರ ಅಂತರದಿಂದ ಗೆಲುವು ಸಾಧಿಸಿ ಚಿನ್ನದ ಪದಕ ಮುಡಿಗೇರಿಸಿಕೊಂಡಿದೆ.
ಚೀನಾದ ಹ್ಯಾಂಗ್ಝೌನಲ್ಲಿ ನಡೆದ ಪಂದ್ಯದಲ್ಲಿ ಭಾರತದ ಆಟಗಾರರು ಸಂಪೂರ್ಣ ಪ್ರಾಬಲ್ಯ ಸಾಧಿಸಿದರು. ಭಾರತದ ಪರ ಮನ್ಪ್ರೀತ್ ಸಿಂಗ್, ನಾಯಕ ಹರ್ಮನ್ಪ್ರೀತ್ ಸಿಂಗ್, ಅಮಿತ್ ರೋಹಿದಾಸ್, ಅಭಿಷೇಕ್ ಅವರುಗಳು ಗೋಲು ಬಾರಿಸುವ ಮೂಲಕ ಭಾರತಕ್ಕೆ 5-1 ಅಂತರದ ಭರ್ಜರಿ ಗೆಲುವು ತಂದುಕೊಡುವಲ್ಲಿ ಯಶಸ್ವಿಯಾದರು. ಜಪಾನ್ ಪರ ಮಿಡ್ ಫೀಲ್ಡರ್ ಸೆರೆನ್ ತನಕ ಏಕೈಕ ಗೋಲು ಬಾರಿಸುವ ಮೂಲಕ ಸೋಲಿನ ಅಂತರ ಕಡಿಮೆ ಮಾಡಿದರು.
ತೀವ್ರ ಪೋಟಿಯಿಂದ ಕೂಡಿದ್ದ ಪಂದ್ಯದ ಮೊದಲ ಕ್ವಾರ್ಟರ್ನಲ್ಲಿ ಎರಡು ತಂಡಕ್ಕೂ ಗೋಲಿನ ಖಾತೆ ತೆರೆಯಲು ಸಾಧ್ಯವಾಗಲಿಲ್ಲ. ಆದರೆ ಮೊದಲಾರ್ಧದ ಎರಡನೇ ಕ್ವಾರ್ಟರ್ನಲ್ಲಿ ಅದ್ಭುತ ಪ್ರದರ್ಶನ ನೀಡಿದ ಮನ್ಪ್ರೀತ್ ಸಿಂಗ್ 25ನೇ ನಿಮಿಷದಲ್ಲಿ ಗೋಲು ಬಾರಿಸುವ ಮೂಲಕ ಭಾರತಕ್ಕೆ ಮುನ್ನಡೆ ತಂದುಕೊಟ್ಟರು. ಹೀಗಾಗಿ ಪಂದ್ಯದ ಹಾಫ್ ಟೈಮ್ ವೇಳೆಗೆ ಭಾರತ 1-0 ಮುನ್ನಡೆ ಸಾಧಿಸಿತ್ತು.
ನಂತರ ಎರಡನೇ ಅವಧಿಯ ಮೊದಲ ಕ್ವಾಟರ್ನ ಆರಂಭದಲ್ಲೇ ಹರ್ಮನ್ಪ್ರೀತ್ 32ನೇ ನಿಮಿಷದಲ್ಲಿ ಭಾರತದ ಪರ 2ನೇ ಗೋಲು ಬಾರಿಸಿ ಮಿಂಚಿದರೆ. ಇದಾದ ಕೆಲವೇ ನಿಮಿಷಗಳ ಅಂತರದಲ್ಲಿ ಅಮಿತ್ ರೋಹಿದಾಸ್ 36ನೇ ನಿಮಿಷದಲ್ಲಿ ಮತ್ತೊಂದು ಗೋಲು ಬಾರಿಸಿದರು. ಪರಿಣಾಮ ಭಾರತ 3ನೇ ಕ್ವಾರ್ಟರ್ ಅಂತ್ಯಕ್ಕೆ 3-0 ಮುನ್ನಡೆ ಕಾಯ್ದುಕೊಂಡಿತು. ಬಳಿಕ 4ನೇ ಕ್ವಾರ್ಟರ್ನ ಆರಂಭದಲ್ಲೇ ಅಭಿಷೇಕ್ ಮತ್ತೊಂದು ಗೋಲು ಬಾರಿಸುವ ಮೂಲಕ ತಂಡಕ್ಕೆ ಮತ್ತಷ್ಟು ಮೇಲುಗೈ ನೀಡಿದರು. ಆದರೆ ಈ ವೇಳೆ ಜಪಾನ್ ತಂಡದ ಮಿಡ್ಫೀಲ್ಡರ್ ಸೆರೆನ್ ತನಕಾ, ಪಂದ್ಯದ 51ನೇ ನಿಮಿಷದಲ್ಲಿ ಗೋಲು ಬಾರಿಸಿದರು. ಆದರೆ ಪಂದ್ಯದ ಫೈನಲ್ ಕ್ವಾರ್ಟರ್ನಲ್ಲಿ ನಾಯಕ ಹರ್ಮನ್ಪ್ರೀತ್ ಸಿಂಗ್ ಮತ್ತೊಂದು ಗೋಲು ಬಾರಿಸುವ ಮೂಲಕ ಗೆಲುವಿನ ಅಂತರವನ್ನ 5-1ಕ್ಕೆ ಹೆಚ್ಚಿಸಿದರು.
4ನೇ ಬಾರಿ ಚಾಂಪಿಯನ್:
ಜಪಾನ್ ವಿರುದ್ಧ 5-1ರ ಅಂತರದಿಂದ ಗೆದ್ದುಬೀಗಿದ ಟೀಂ ಇಂಡಿಯಾದ ಪುರುಷರ ತಂಡ ಏಷ್ಯನ್ ಗೇಮ್ಸ್ನಲ್ಲಿ 4ನೇ ಬಾರಿಗೆ ಚಾಂಪಿಯನ್ ಪಟ್ಟಕ್ಕೇರಿತು. ಈ ಹಿಂದೆ 1966, 1998 ಹಾಗೂ 2014ರ ಏಷ್ಯನ್ ಗೇಮ್ಸ್ ಕ್ರೀಡಾಕೂಟದಲ್ಲಿ ಚಿನ್ನದ ಪದಕ ಗೆದ್ದು ಚಾಂಪಿಯನ್ಪಟ್ಟಕ್ಕೇರಿತ್ತು. ಈ ಹಿಂದೆ 2018ರಲ್ಲಿ ಜಕಾರ್ತಾದಲ್ಲಿ ನಡೆದ ಏಷ್ಯನ್ ಗೇಮ್ಸ್ನಲ್ಲಿ ಭಾರತದ ಪುರುಷರ ಹಾಕಿ ತಂಡ ಕಂಚಿನ ಪಂದ್ಯ ಗೆದ್ದಿತ್ತು. ಅಲ್ಲದೇ ಈ ಗೆಲುವಿನ ಮೂಲಕ ಸೌತ್ ಕೊರಿಯಾ ನಂತರ ಏಷ್ಯನ್ ಗೇಮ್ಸ್ನ ಪುರುಷರ ಹಾಕಿ ಕ್ರೀಡೆಯಲ್ಲಿ ಹೆಚ್ಚು ಬಾರಿ ಚಿನ್ನದ ಪದಕ ಗೆದ್ದ 2ನೇ ತಂಡ ಎಂಬ ಹೆಗ್ಗಳಿಕೆಗೆ ಭಾರತ ಭಾಜನವಾಯಿತು. ಏಷ್ಯನ್ ಗೇಮ್ಸ್ ಕ್ರೀಡಾಕೂಟದ ಪುರುಷರ ಹಾಕಿ ಕ್ರೀಡೆಯ ಯಶಸ್ವಿ ತಂಡವೆನಿಸಿರುವ ಪಾಕಿಸ್ತಾನ ಈವರೆಗೂ 9 ಬಾರಿ ಚಿನ್ನದ ಪದಕ ಗೆದ್ದುಬೀಗಿದೆ.
ಒಲಂಪಿಕ್ಸ್ಗೆ ಸ್ಥಾನ ಖಚಿತ:
ಏಷ್ಯನ್ ಗೇಮ್ಸ್ ಕ್ರೀಡಾಕೂಟದ ಪುರುಷರ ಹಾಕಿ ಕ್ರೀಡೆಯಲ್ಲಿ ಜಪಾನ್ ವಿರುದ್ಧ 5-1ರಿಂದ ಗೆದ್ದುಬೀಗಿರುವ ಭಾರತ, 2024ರಲ್ಲಿ ಪ್ಯಾರಿಸ್ನಲ್ಲಿ ನಡೆಯಲಿರುವ ಒಲಂಪಿಕ್ಸ್ಗೆ ಸ್ಥಾನ ಪಡೆದುಕೊಂಡಿದೆ.
Asian Games, Team India, Men’s Hockey, Sports Karnataka