ರಾಜಸ್ಥಾ ರಾಯಲ್ಸ್ ಮತ್ತು ಪಂಜಾಬ್ ಕಿಂಗ್ಸ್ ತಂಡಗಳು ಐಪಿಎಲ್ನ 52ನೇ ಪಂದ್ಯದಲ್ಲಿ ಕಣಕ್ಕಿಳಿಯುತ್ತಿವೆ. ಆದರೆ ಎರಡೂ ತಂಡಗಳ ಕಥೆ ವಿಭಿನ್ನವಾಗಿದೆ. ರಾಜಸ್ಥಾನ ಆರಂಭದಲ್ಲಿ ಅಬ್ಬರಿಸಿ, ಈಗ ಸೋಲಿನ ಸಂಕಟ ಎದುರಿಸುತ್ತಿದೆ. ಪಂಜಾಬ್ ಕಿಂಗ್ಸ್ ಆರಂಭದಲ್ಲಿ ತೋರಿದ ಪ್ರದರ್ಶನವನ್ನು ಮುಂದುವರೆಸಿಲ್ಲ. ಕೊನೆಯ 5 ಪಂದ್ಯಗಳಲ್ಲಿ ಪಂಜಾಬ್ 3 ಬಾರಿ ಸೋಲಿನ ಕಹಿಯುಂಡಿದೆ. ರಾಜಸ್ಥಾನ ರಾಯಲ್ಸ್ ಸತತ 2 ಸೋಲುಗಳನ್ನು ಕಂಡಿದೆ.
ಪಾಯಿಂಟ್ ಟೇಬಲ್ನಲ್ಲಿ ರಾಜಸ್ಥಾನ 3ನೇ ಸ್ಥಾನದಲ್ಲಿದೆ. ಪಂಜಾಬ್ ಕಿಂಗ್ಸ್ 7ರಲ್ಲಿದೆ. ಎರಡೂ ತಂಡಗಳಿಗೂ ತಲಾ 4 ಪಂದ್ಯಗಳು ಬಾಕಿ ಉಳಿದಿವೆ. ರಾಜಸ್ಥಾನ 12 ಅಂಕ ಪಡೆದುಕೊಂಡು ಕೊಂಚ ಉತ್ತಮ ಸ್ಥಿತಿಯಲ್ಲಿದೆ. ಪಂಜಾಬ್ 10 ಅಂಕ ಮಾತ್ರ ಪಡೆದಿದೆ. ಹೀಗಾಗಿ ಉಳಿದ ನಾಲ್ಕು ಪಂದ್ಯಗಳಲ್ಲೂ ಪಂಜಾಬ್ಗೆ ಗೆಲುವು ಅನಿವಾರ್ಯ ರಾಜಸ್ಥಾನ ರಾಯಲ್ಸ್ಗೆ ಅಗ್ರ 2 ಸ್ಥಾನಗಳಲ್ಲಿ ಲೀಗ್ ಹಂತ ಮುಗಿಸುವ ಕನಸು ಇರುವುದರಿಂದ ಅದಕ್ಕೂ ಗೆಲುವು ಬೇಕೇ ಬೇಕು.
ಪಂಜಾಬ್ ಕಿಂಗ್ಸ್ ನಾಯಕ ಮಯಾಂಕ್ ಅಗರ್ವಾಲ್ ಟೂರ್ನಿಯಲ್ಲಿ ಇಲ್ಲಿ ತನಕ ಬಿಗ್ ಸ್ಕೋರ್ ಗಳಿಸಿಲ್ಲ. ಇವರ ಜೊತೆ ಜಾನಿ ಬೇರ್ ಸ್ಟೋವ್ ಕೂಡ ಎಡವಿದ್ದಾರೆ. ಹೀಗಾಗಿ ಬ್ಯಾಟಿಂಗ್ ಹೊಣೆಯೆಲ್ಲವೂ ಶಿಖರ್ ಧವನ್, ಲಿಯಂ ಲಿವಿಂಗ್ ಸ್ಟೊನ್ ಮತ್ತು ಭಾನುಕಾ ರಾಜಪಕ್ಸ ಹೆಗಲ ಮೇಲೆ ಬಿದ್ದಿದೆ. ವಿಕೆಟ್ ಕೀಪರ್ ಜಿತೇಶ್ ಶರ್ಮಾ ಕೂಡ ಮಿಂಚಿನ ಆಟ ಆಡುವ ಅನಿವಾರ್ಯತೆ ಇದೆ.
ಬೌಲಿಂಗ್ನಲ್ಲಿ ಪಂಜಾಬ್ ಬಲಿಷ್ಠವಾಗಿದೆ. ಕಗಿಸೋ ರಬಾಡಾ ಪರ್ಪಲ್ ಕ್ಯಾಪ್ ಚೇಸಿಂಗ್ನಲ್ಲಿದ್ದಾರೆ. ಅರ್ಶದೀಪ್ ಡೆತ್ ಓವರ್ ಸ್ಪೆಷಲಿಸ್ಟ್ ಆಗಿದ್ದಾರೆ. ರಾಹುಲ್ ಚಹರ್ ಟ್ರಂಪ್ ಕಾರ್ಡ್ ಸ್ಪಿನ್ನರ್. ರಿಷಿ ಧವನ್, ಸಂದೀಪ್ ಶರ್ಮಾ ಸ್ವಿಂಗ್ ಮೂಲಕ ಎದುರಾಳಿಯನ್ನು ಕಾಡುತ್ತಿದ್ದಾರೆ. ಲಿವಿಂಗ್ ಸ್ಟೊನ್ ಕೂಡ ಬೌಲಿಂಗ್ ಮಾಡಬಲ್ಲರು.
ರಾಜಸ್ಥಾನಕ್ಕೆ ಹೆಚ್ಚು ತಲೆನೋವಿಲ್ಲ. ಆದರೂ ಗೆಲುವು ದೂರವಾಗಿದೆ ಅನ್ನುವ ಯೋಚನೆ ಇದ್ದೇ ಇದೆ. ಜೋಸ್ ಬಟ್ಲರ್, ನಾಯಕ ಸಂಜು ಸ್ಯಾಮ್ಸನ್ ಮತ್ತು ಶಿಮ್ರನ್ ಹೆಟ್ಮಾಯರ್ ರನ್ ಬೇಟೆಯಲ್ಲಿದ್ದಾರೆ. ಆದರೆ ದೇವದತ್ ಪಡಿಕಲ್, ಕರುಣ್ ನಾಯರ್ ವೈಫಲ್ಯ ತಂಡಕ್ಕೆ ಚಿಂತೆ ಆಗಿದೆ. ರಿಯಾನ್ ಪರಾಗ್ ನಿಂತು ಆಡಿದರೆ ದೊಡ್ಡ ಮೊತ್ತ ಗ್ಯಾರೆಂಟಿ. ಬೌಲಿಂಗ್ ನಲ್ಲಿ ರಾಜಸ್ಥಾನಕ್ಕೆ ಚಿಂತೆ ಇಲ್ಲ. ಅಶ್ವಿನ್ ಮತ್ತು ಚಹಲ್ ಸ್ಪಿನ್ ಜೋಡಿ ಬೌಲಿಂಗ್ಗೆ ಕಂಟ್ರೋಲ್ ಕೊಟ್ಟಿದೆ. ಕುಲ್ ದೀಪ್ ಸೇನ್ ಮತ್ತು ಪ್ರಸಿಧ್ ಕೃಷ್ಣ ವಿಕೆಟ್ ಬೇಟೆಯಾಡಿದ್ದಾರೆ. ಟ್ರೆಂಟ್ ಬೋಲ್ಟ್ ಮಂಕಾಗಿದ್ದರೂ ಎಫೆಕ್ಟಿವ್ ಅನ್ನುವುದರಲ್ಲಿ ಸಂಶಯವಿಲ್ಲ.
ವಾಂಖೆಡೆ ಮೈದಾನದಲ್ಲಿ ಪಂದ್ಯ ನಡೆಯುವುದರಿಂದ ವೇಗದ ಬೌಲರ್ ಗಳಿಂದ ಸೂಪರ್ ಪ್ರದರ್ಶನದ ನಿರೀಕ್ಷೆ ಇದೆ. ಶನಿವಾರದ ಮೊದಲ ಪಂದ್ಯವೂ ಇದಾಗಿರುವುದರಿಂದ ವೀಕೆಂಡ್ ಮಸ್ಸಿ ಜೋರಾಗಿ ಇರಲಿದೆ.
