ಮುಂಬೈ ಇಂಡಿಯನ್ಸ್ ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ಪಂದ್ಯ ಅಂದ ಮೇಲೆ ಅಲ್ಲಿ ಸಿಕ್ಕಾಪಟ್ಟೆ ಟ್ವಿಸ್ಟ್ ಗಳಿರುತ್ತವೆ. ಲೆಕ್ಕಾಚಾರಗಳಿರುತ್ತವೆ. ಈ ಬಾರಿಯ ಐಪಿಎಲ್ನಲ್ಲಿ ಈ ಎರಡು ತಂಡಗಳ ಸಾಧನೆ ಅಷ್ಟಕಷ್ಟೇ ಆಗಿದ್ದರೂ ರಣತಂತ್ರಗಳಲ್ಲಿ ಮಾತ್ರ ಯಾವುದೇ ಬದಲಾವಣೆ ಇರಲಿಲ್ಲ. ಈಗ ಮುಂಬೈ ಸೇಡಿನ ಪಂದ್ಯಕ್ಕೆ ಸಜ್ಜಾಗುತ್ತಿದ್ದರೆ, ಚೆನ್ನೈ ಪ್ಲೇ-ಆಫ್ ಲೆಕ್ಕಾಚಾರದಲ್ಲಿದೆ.
ದುಬೆ ವಿರುದ್ಧ ಬ್ರಹ್ಮಾಸ್ತ್ರ..!
ಐಪಿಎಲ್ ಸೀಸನ್ 15ರಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ನ ಶಿವಂ ದುಬೆ, 9 ಇನ್ನಿಂಗ್ಸ್ಗಳಲ್ಲಿ 34.89 ಸರಾಸರಿ ಹಾಗೂ 160.34ರ ಸ್ಟ್ರೈಕ್ ರೇಟ್ನಲ್ಲಿ 279 ರನ್ ಸಿಡಿಸಿದ್ದಾರೆ. ಆದರೆ ದುಬೆ, ಬುಮ್ರಾ ವಿರುದ್ಧ ಕಳಪೆ ದಾಖಲೆ ಹೊಂದಿದ್ದಾರೆ. ಬುಮ್ರಾ ದುಬೆ ಅವರನ್ನು 2 ಬಾರಿ ಔಟ್ ಮಾಡಿರುವುದು ಮಾತ್ರವಲ್ಲದೆ, 17 ಎಸೆತಗಳಲ್ಲಿ ಕೇವಲ 10 ರನ್ ಮಾತ್ರ ನೀಡಿದ್ದಾರೆ.
ಎಡಗೈ ಬ್ಯಾಟ್ಸ್ಮನ್ಗಳಿಗೆ ಕಡಿವಾಣ..!
ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಅಗ್ರ ಆರು ಬ್ಯಾಟ್ಸ್ ಮನ್ಗಳ ಪೈಕಿ ಮೂವರು ಲೆಫ್ಟ್ ಹ್ಯಾಂಡ್ ಬ್ಯಾಟ್ಸ್ ಮನ್ಗಳು. ಹೀಗಾಗಿ ಲೆಗ್ ಸ್ಪಿನ್ನರ್ ಮುರುಗನ್ ಅಶ್ವಿನ್ ಬದಲು ಆಫ್ ಸ್ಪಿನ್ನರ್ ಹೃತಿಕ್ ಶೋಕಿನ್ ಸ್ಥಾನ ಪಡೆಯಬಹುದು.
ಪೊಲ್ಲಾರ್ಡ್ ಬಲ:
ಈ ಬಾರಿಯ ಐಪಿಎಲ್ನಲ್ಲಿ ಪೊಲ್ಲಾರ್ಡ್ ಮಿಂಚು ಹರಿಸಿಲ್ಲ. ಆದ್ರೆ ಸಿಎಸ್ಕೆ ವಿರುದ್ಧ ಪೊಲಾರ್ಡ್ ಬೌಲಿಂಗ್ನಲ್ಲೂ ಮಿಂಚಬಲ್ಲರು. ಕಾನ್ವೆಯನ್ನು ಪೊಲ್ಲಾರ್ಡ್ ಮೂರು ಬಾರಿ ಟಿ20 ಪಂದ್ಯಗಳಲ್ಲಿ ಔಟ್ ಮಾಡಿದ್ದಾರೆ. ರಾಬಿನ್ ಉತ್ತಪ್ಪ ರನ್ನು ಕೂಡ 3 ಬಾರಿ ಪವೆಲಿಯನ್ಗೆ ಕಳುಹಿಸಿದ ದಾಖಲೆ ಪೊಲಾರ್ಡ್ ಹೆಸರಲ್ಲಿದೆ. ಮೊಯಿನ್ ಅಲಿಯನ್ನೂ 2 ಬಾರಿ ಔಟ್ ಮಾಡಿದ್ದಾರೆ.
ನಂಬರ್ ಗೇಮ್:
ಈ ಬಾರಿಯ ಐಪಿಎಲ್ನಲ್ಲಿ ಪೊಲ್ಲಾರ್ಡ್ 11 ಇನ್ನಿಂಗ್ಸ್ಗಳಿಂದ ಕೇವಲ 144 ರನ್ ಮಾತ್ರ ಬಾರಿಸಿದ್ದಾರೆ. ಪೊಲ್ಲಾರ್ಡ್ ಸ್ಟ್ರೈಕ್ ರೇಟ್ 107.46 ಮತ್ತು ಸರಾಸರಿ 14.40ಗೆ ಇಳಿದಿದೆ. ಕೇನ್ ವಿಲಿಯಮ್ಸನ್ ಮತ್ತು ಅಜಿಂಕ್ಯಾ ರಹಾನೆ ಮಾತ್ರ ಪೊಲ್ಲಾರ್ಡ್ಗಿಂತ ಕಡಿಮೆ ಸ್ಟ್ರೈಕ್ ರೇಟ್ ಹೊಂದಿದ್ದಾರೆ. ಸ್ಪಿನ್ನರ್ಗಳ ವಿರುದ್ಧ ಪೊಲ್ಲಾರ್ಡ್ ಕೇವಲ 6.80ಯ ಸರಾಸರಿ ಹಾಗೂ 82.92ರ ಸರಾಸರಿ ಹೊಂದಿದ್ದಾರೆ.
ರೋಹಿತ್ ಶರ್ಮಾ ಕೂಡ ಸ್ಪಿನ್ನರ್ ಗಳ ಎದುರು ಈ ಬಾರಿ ಮುಗ್ಗರಿಸಿದ್ದಾರೆ. ರೋಹಿತ್ ಈ ಬಾರಿ ಸ್ಪಿನ್ನರ್ ಗಳ ವಿರುದ್ಧ 32 ಎಸೆತಗಳಲ್ಲಿ 33 ರನ್ ಮಾತ್ರ ಸಿಡಿಸಿದ್ದಾರೆ.
ಬುಮ್ರಾ ಮುಂಬೈ ಬೌಲಿಂಗ್ನ ಬ್ರಹ್ಮಾಸ್ತ್ರ. ರುತುರಾಜ್ ಗಾಯಕ್ವಾಡ್ ಬುಮ್ರಾ ವಿರುದ್ಧ ಎದುರುಸಿದ 10 ಎಸೆತಗಳಲ್ಲಿ 21 ರನ್ ಗಳಿಸಿದ್ದಾರೆ. ಧೋನಿ 60 ಎಸೆತಗಳಲ್ಲಿ 60 ರನ್ ಮಾತ್ರ ಗಳಿಸಿದ್ದಾರೆ.
