ಬ್ಯಾಟಿಂಗ್ ಹಾಗೂ ಬೌಲಿಂಗ್‌ ವಿಭಾಗದಲ್ಲಿ ಸಂಘಟಿತ ಪ್ರದರ್ಶನ ನೀಡಿದ ಬೆಂಗಳೂರು ತಂಡದ ʼಚಾಲೆಂಜ್‌ʼ ಎದುರಿಸುವಲ್ಲಿ ಮುಗ್ಗರಿಸಿದ ಚೆನ್ನೈ ಸೂಪರ್‌ ಕಿಂಗ್ಸ್‌ 13 ರನ್‌ಗಳ ಸೋಲಿನ ಆಘಾತ ಕಂಡಿತು.
ಪುಣೆಯ ಎಂಸಿಎ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್‌ ಸೋತು ಮೊದಲ ಬ್ಯಾಟಿಂಗ್ ಅವಕಾಶ ಪಡೆದ ಆರ್‌ಸಿಬಿ, 20 ಓವರ್‌ಗಳಲ್ಲಿ 8 ವಿಕೆಟ್‌ಗೆ 173 ರನ್‌ಗಳಿಸಿತು. ಈ ಟಾರ್ಗೆಟ್‌ ಎದುರಿಸಿದ ಸಿಎಸ್‌ಕೆ 20 ಓವರ್‌ಗಳಲ್ಲಿ 8 ವಿಕೆಟ್‌ಗೆ 160 ರನ್‌ಗಳಿಸಿತು. ಆ ಮೂಲಕ ಆರ್‌ಸಿಬಿ 13 ರನ್‌ಗಳ ಭರ್ಜರಿ ಗೆಲುವು ಸಾಧಿಸಿತು. ಸೂಪರ್‌ ಕಿಂಗ್ಸ್‌ ಪರ ಡ್ವೇನ್‌ ಕಾನ್ವೆ(56) ಹಾಗೂ ಮೊಯಿನ್‌ ಅಲಿ(34) ರನ್‌ಗಳಿಸಿದರು ತಂಡಕ್ಕೆ ಗೆಲುವು ತಂದುಕೊಡಲು ಸಾಧ್ಯವಾಗಲಿಲ್ಲ.
ಚೇಸಿಂಗ್‌ನಲ್ಲಿ ಎಡವಿದ ಸಿಎಸ್‌ಕೆ:
ಆರ್‌ಸಿಬಿ ನೀಡಿದ 174 ರನ್‌ಗಳ ಸ್ಪರ್ಧಾತ್ಮಕ ಮೊತ್ತ ಎದುರಿಸಿದ ಸಿಎಸ್‌ಕೆ ಉತ್ತಮ ಆರಂಭ ಕಂಡಿತು. ಇನ್ನಿಂಗ್ಸ್‌ ಆರಂಭಿಸಿದ ಋತುರಾಜ್‌ ಗಾಯಕ್ವಾಡ್‌(28) ಹಾಗೂ ಡ್ವೇನ್‌ ಕಾನ್ವೇ(56) ಮೊದಲ ವಿಕೆಟ್‌ಗೆ 54 ರನ್‌ಗಳ ಆರಂಭ ನೀಡಿದರು. ನಂತರ ಬಂದ ರಾಬಿನ್‌ ಉತ್ತಪ್ಪ(1), ಅಂಬಟಿ ರಾಯುಡು(10) ಬ್ಯಾಟಿಂಗ್ ವೈಫಲ್ಯ ಅನುಭವಿಸಿದರು. ಆದರೆ ಒಂದೆಡೆ ವಿಕೆಟ್‌ ಬೀಳುತ್ತಿದ್ದರು ಜವಾಬ್ದಾರಿಯ ಆಟವಾಡಿದ ಕಾನ್ವೇ, ಅರ್ಧಶತಕ ಸಿಡಿಸಿ ಚೆನ್ನೈ ಗೆಲುವಿನ ಆಸೆ ಜೀವಂತವಾಗಿಸಿದರು.
ಅಗ್ರ ಕ್ರಮಾಂಕದ ಬ್ಯಾಟ್ಸ್‌ಮನ್‌ಗಳು ಔಟಾದ ನಂತರ ಕಣಕ್ಕಿಳಿದ ಮೊಯಿನ್‌ ಅಲಿ(34) ರನ್‌ಗಳಿಸಿ ಗೆಲುವಿಗಾಗಿ ಹೋರಾಡಿದರು ಪ್ರಯೋಜನವಾಗಲಿಲ್ಲ. ಮಧ್ಯಮ ಕ್ರಮಾಂಕದಲ್ಲಿ ಬಂದ ರವೀಂದ್ರ ಜಡೇಜಾ(3) ಹಾಗೂ ನಾಯಕ ಎಂ.ಎಸ್.ಧೋನಿ(2) ತಂಡಕ್ಕೆ ಆಸರೆಯಾಗಲಿಲ್ಲ. ಕೊನೆ ಹಂತದಲ್ಲಿ ಬಂದ ಪ್ರಿಟೋರಿಯಸ್‌(13), ಸಿಮರ್ಜೀತ್‌ 2*, ತೀಕ್ಷಣ 7* ಅಲ್ಪಮೊತ್ತಗಳಿಸಿದರು.
ಸಂಘಟಿತ ಬೌಲಿಂಗ್‌ ದಾಳಿ:
ಬ್ಯಾಟಿಂಗ್‌ನಲ್ಲಿ ಸಾಂಘಿಕ ಪ್ರದರ್ಶನ ನೀಡಿದ ಆರ್‌ಸಿಬಿ, ಬೌಲಿಂಗ್‌ನಲ್ಲೂ ಸಂಘಟಿತ ದಾಳಿ ನಡೆಸಿತು. ಸಿಎಸ್‌ಕೆ ಆರಂಭಿಕರ ಉತ್ತಮ ಬ್ಯಾಟಿಂಗ್ ನಡುವೆಯೂ ಅದ್ಭುತ ಕಮ್‌ಬ್ಯಾಕ್‌ ಮಾಡಿದ ಆರ್‌ಸಿಬಿ ಬೌಲರ್‌ಗಳು, ಚೆನ್ನೈ ಬ್ಯಾಟ್ಸ್‌ಮನ್‌ಗಳಿಗೆ ಕಡಿವಾಣ ಹಾಕಿದರು. ಬೆಂಗಳೂರು ಪರ ಹರ್ಷಲ್‌ ಪಟೇಲ್‌(3/35) ಉತ್ತಮ ಬೌಲಿಂಗ್‌ ಪ್ರದರ್ಶಿಸಿದರೆ. ಮ್ಯಾಕ್ಸ್‌ವೆಲ್‌(2/22), ಹಸರಂಗ(1/31), ಹೇಜ಼ಲ್ವುಡ್‌( 1/19) ಹಾಗೂ ಶಹಬಾಜ್‌(1/27) ಉತ್ತಮ ಸಾಥ್‌ ನೀಡಿದರು.
ಟಾಪ್‌-4ನಲ್ಲಿ ಆರ್‌ಸಿಬಿ:
ಸಿಎಸ್‌ಕೆ ವಿರುದ್ಧ 13 ರನ್‌ಗಳ ಭರ್ಜರಿ ಗೆಲುವು ಸಾಧಿಸಿದ ಆರ್‌ಸಿಬಿ, ಪಾಯಿಂಟ್ಸ್‌ ಟೇಬಲ್‌ನಲ್ಲೂ ಬಡ್ತಿ ಪಡೆದಿದೆ. 11 ಪಂದ್ಯಗಳಲ್ಲಿ 6 ಗೆಲುವು, 5 ಸೋಲು ಕಂಡಿರುವ ಆರ್‌ಸಿಬಿ 12 ಪಾಯಿಂಟ್ಸ್‌ನೊಂದಿಗೆ ಅಂಕಪಟ್ಟಿಯಲ್ಲಿ 4ನೇ ಸ್ಥಾನಕ್ಕೇರಿದೆ. ಆದರೆ ಟೂರ್ನಿಯಲ್ಲಿ ಆಡಿರುವ 10 ಪಂದ್ಯಗಳಲ್ಲಿ 7ನೇ ಸೋಲನುಭವಿಸಿರುವ ಸಿಎಸ್‌ಕೆ, 3 ಪಂದ್ಯಗಳ ಗೆಲುವಿನೊಂದಿಗೆ 6 ಪಾಯಿಂಟ್ಸ್‌ ಮೂಲಕ 9ನೇ ಸ್ಥಾನದಲ್ಲಿದೆ.
ಆರ್‌ಸಿಬಿ ಸಾಂಘಿಕ ಆಟ:
ಟಾಸ್‌ ಸೋತು ಮೊದಲು ಬ್ಯಾಟಿಂಗ್ ಅವಕಾಶ ಪಡೆದ ಆರ್‌ಸಿಬಿ, ಸಾಂಘಿಕ ಬ್ಯಾಟಿಂಗ್ ಪ್ರದರ್ಶಿಸಿತು. ಇನ್ನಿಂಗ್ಸ್‌ ಆರಂಭಿಸಿದ ನಾಯಕ ಫಾಫ್‌ ಡುಪ್ಲೆಸ್ಸಿ 38 ರನ್‌(22 ಬಾಲ್‌, 4 ಬೌಂಡರಿ, 1 ಸಿಕ್ಸ್‌) ಹಾಗೂ ವಿರಾಟ್‌ ಕೊಹ್ಲಿ 30 ರನ್‌(33 ಬಾಲ್‌, 3 ಬೌಂಡರಿ, 1 ಸಿಕ್ಸ್‌) ಮೊದಲ ವಿಕೆಟ್‌ಗೆ 62 ರನ್‌ಗಳಿಸಿದ ಈ ಜೋಡಿ ಆರ್‌ಸಿಬಿಗೆ ಭದ್ರಬುನಾದಿ ಹಾಕಿಕೊಟ್ಟರು. ನಂತರ ಬಂದ ಗ್ಲೆನ್‌ ಮ್ಯಾಕ್ಸ್‌ವೆಲ್‌(3) ಇಲ್ಲನ ರನ್‌ಗಳಿಸುವ ಯತ್ನದಲ್ಲಿ ರನೌಟ್‌ ಬಲೆಗೆ ಬಿದ್ದರು.
ನಂತರ ಜೊತೆಯಾದ ರಜತ್‌ ಪಟಿದಾರ್‌(21) ಹಾಗೂ ಮಹಿಪಾಲ್‌ ಲೋಮ್ರೋರ್‌ 42 ರನ್‌(27 ರನ್‌, 3 ಬೌಂಡರಿ, 2 ಸಿಕ್ಸ್‌) ತಂಡಕ್ಕೆ ಚೇತರಿಕೆ ನೀಡಿದರು. ಚೆನ್ನೈ ಬೌಲಿಂಗ್‌ ದಾಳಿಗೆ ದಿಟ್ಟ ಪ್ರತ್ಯುತ್ತರ ನೀಡಿದ ಈ ಜೋಡಿ, 44 ರನ್‌ಗಳ ಅದ್ಭುತ ಜೊತೆಯಾಟವಾಡಿ ಮಿಂಚಿದರು. ಲೋಮ್ರೋರ್‌ ಹಾಗೂ ಕಾರ್ತಿಕ್‌ 5ನೇ ವಿಕೆಟ್‌ಗೆ 32 ರನ್‌ಗಳ ಉಪಯುಕ್ತ ಕಾಣಿಕೆ ನೀಡಿದರು. ಆದರೆ ಹಸರಂಗ(0), ಶಹಬಾಜ್‌ ಅಹ್ಮದ್‌(1), ಹರ್ಷಲ್‌ ಪಟೇಲ್‌(0) ಬಹುಬೇಗನೆ ವಿಕೆಟ್‌ ಒಪ್ಪಿಸಿದರು. ಕೊನೆ ಹಂತದಲ್ಲಿ ಬಿರುಸಿನ ಆಟವಾಡಿದ ದಿನೇಶ್‌ ಕಾರ್ತಿಕ್‌ 26* ರನ್‌(17 ಬಾಲ್‌, 1 ಬೌಂಡರಿ, 2 ಸಿಕ್ಸ್‌) ಮೂಲಕ ತಂಡದ ಮೊತ್ತವನ್ನ 170ರ ಗಡಿದಾಟಿಸಿದರು. ಸಿಎಸ್‌ಕೆ ಪರ ಮಹೀಶ್‌ ತೀಕ್ಷಣ(3/27), ಮೊಯಿನ್‌ ಅಲಿ(2/28), ಪ್ರಿಟೋರಿಯಸ್‌(1/40) ಉತ್ತಮ ಬೌಲಿಂಗ್‌ ಪ್ರದರ್ಶಿಸಿದರು.
