ಹರ್ಪ್ರೀತ್ ಬ್ರಾರ್(3/26) ಹಾಗೂ ನ್ಯಾಥನ್ ಎಲೀಸ್(3/40) ಪರಿಣಾಮಕಾರಿ ಬೌಲಿಂಗ್ ಹಾಗೂ ಲಿಯಮ್ ಲಿವಿಂಗ್ಸ್ಟೋನ್(49*) ಸ್ಪೋಟಕ ಬ್ಯಾಟಿಂಗ್ ನೆರವಿನಿಂದ ಸನ್ ರೈಸರ್ಸ್ ಹೈದ್ರಾಬಾದ್ ತಂಡವನ್ನ 5 ವಿಕೆಟ್ ಅಂತರದಿಂದ ಸೋಲಿಸಿದ ಪಂಜಾಬ್ ಕಿಂಗ್ಸ್, ಈ ಗೆಲುವಿನೊಂದಿಗೆ 2022ರ ಐಪಿಎಲ್ ಜರ್ನಿ ಮುಗಿಸಿದೆ.
ವಾಂಖೆಡೆ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದ ಸನ್ ರೈಸರ್ಸ್ ಹೈದ್ರಾಬಾದ್, ಬ್ಯಾಟಿಂಗ್ ವೈಫಲ್ಯ ಕಂಡಿತು. ಹೀಗಾಗಿ 20 ಓವರ್ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 157 ರನ್ ಕಲೆಹಾಕಿತು. ಟಾರ್ಗೆಟ್ ಬೆನ್ನತ್ತಿದ ಪಂಜಾಬ್ ಕಿಂಗ್ಸ್, 15.1 ಓವರ್ಗಳಲ್ಲಿ 5 ವಿಕೆಟ್ ಕಳೆದುಕೊಂಡು 160 ರನ್ಗಳಿಸುವ ಮೂಲಕ 5 ವಿಕೆಟ್ ಗಳ ಭರ್ಜರಿ ಗೆಲುವು ಸಾಧಿಸಿತು. ಇದರೊ‌ಂದಿಗೆ 15ನೇ ಆವೃತ್ತಿಯ ತನ್ನ ಕಡೆಯ ಲೀಗ್ ಪಂದ್ಯವನ್ನು ಗೆದ್ದ ಪಂಜಾಬ್ ಕಿಂಗ್ಸ್, 2022ರ ಟೂರ್ನಿಗೆ ಗೆಲುವಿನ ವಿದಾಯ ಹೇಳಿತು.
ಅಭಿಷೇಕ್ ಶರ್ಮ ಆಸರೆ:
ಮೊದಲು ಬ್ಯಾಟ್ ಮಾಡಿದ ಹೈದ್ರಾಬಾದ್, ನಿರೀಕ್ಷಿತ ಆರಂಭ ಪಡೆಯಲಿಲ್ಲ. ಆರಂಭಿಕನಾಗಿ ಕಣಕ್ಕಿಳಿದ ಪ್ರಿಯಮ್ ಗಾರ್ಗ್(4) ಬ್ಯಾಟಿಂಗ್ ವೈಫಲ್ಯ ಅನುಭವಿಸಿದರು. ಆದರೆ ಜವಾಬ್ದಾರಿಯ ಬ್ಯಾಟಿಂಗ್ ಪ್ರದರ್ಶಿಸಿದ ಅಭಿಷೇಕ್ ಶರ್ಮ(43) ತಂಡಕ್ಕೆ ಆಸರೆಯಾದರು. ಉಳಿದಂತೆ ರಾಹುಲ್ ತ್ರಿಪಾಠಿ(20), ಐಡೆನ್ ಮಾರ್ಕ್ರಂ(21) ದೊಡ್ಡ ಮೊತ್ತ ಕಲೆಹಾಕುವಲ್ಲಿ ಎಡವಿದರು. ನಂತರ ಬಂದ ನಿಕೋಲಸ್ ಪೂರನ್(5) ತಂಡಕ್ಕೆ ನೆರವಾಗಲಿಲ್ಲ. ಮಧ್ಯಮ ಕ್ರಮಾಂಕದಲ್ಲಿ ವಾಷಿಂಗ್ಟನ್ ಸುಂದರ್(25) ಹಾಗೂ ರೊಮಾರಿಯೊ ಶೆಫರ್ಡ್ (26*) ಉಪಯುಕ್ತ ರನ್ಗಳಿಸುವ ಮೂಲಕ ತಂಡದ ಮೊತ್ತ ಹೆಚ್ಚಿಸಿದರು. ಉಳಿದಂತೆ ಸುಚಿತ್(0), ಭುವನೇಶ್ವರ್(1) ಬಂದಷ್ಟೇ ವೇಗವಾಗಿ ಪೆವಿಲಿಯನ್ ಸೇರಿದರು. ಪರಿಣಾಮ ಹೈದ್ರಾಬಾದ್ 157 ರನ್ ಕಲೆಹಾಕಲಷ್ಟೇ ಶಕ್ತವಾಯಿತು.
ಬ್ರಾರ್ – ಎಲ್ಲಿಸ್ ದಾಳಿ:
ಪಂಜಾಬ್ ಕಿಂಗ್ಸ್ ಪರ ಬೌಲರ್ಗಳು ಸಂಘಟಿತ ಪ್ರದರ್ಶನ ನೀಡಿದರು. ಪ್ರಮುಖವಾಗಿ ಹರ್ಪ್ರೀತ್ ಬ್ರಾರ್(3/26) ಹಾಗೂ ನ್ಯಾಥನ್ ಎಲೀಸ್(3/40) ಪರಿಣಾಮಕಾರಿ ಬೌಲಿಂಗ್ ಪ್ರದರ್ಶಿಸಿದರೆ, ಕಗೀಸೋ ರಬಾಡ 1 ವಿಕೆಟ್ ಪಡೆದರು.
ಲಿವಿಂಗ್ಸ್ಟೋನ್ ಅಬ್ಬರ:
ಹೈದ್ರಾಬಾದ್ ನೀಡಿದ ಟಾರ್ಗೆಟ್ ಬೆನ್ನತ್ತಿದ ಪಂಜಾಬ್ ಕಿಂಗ್ಸ್ ಸಾಧಾರಣ ಆರಂಭ ಪಡೆಯಿತು. ಇನ್ನಿಂಗ್ಸ್ ಆರಂಭಿಸಿದ ಜಾನಿ ಬೈರ್ಸ್ಟೋವ್(23) ಬಿರುಸಿನ ಆಟವಾಡಿ ಹೊರನಡೆದರೆ. ಶಿಖರ್ ಧವನ್(39) ಉತ್ತಮ ಬ್ಯಾಟಿಂಗ್ ಪ್ರದರ್ಶಿಸಿದರು. ನಂತರದಲ್ಲಿ ಬಂದ ಶಾರೂಕ್ ಖಾನ್(19), ಮಯಂಕ್ ಅರ್ಗರ್ವಾಲ್(1) ಹಾಗೂ ಜಿತೇಶ್ ಶರ್ಮ(19) ನಿರೀಕ್ಷಿತ ಆಟವಾಡಲಿಲ್ಲ. ಈ ವೇಳೆ ಕಣಕ್ಕಿಳಿದ ಲಿಯಮ್ ಲಿವಿಂಗ್ಸ್ಟೋನ್(49*) ಕೇವಲ 22 ಬಾಲ್ ಗಳಲ್ಲಿ 5 ಸಿಕ್ಸ್ ಹಾಗೂ 2 ಬೌಂಡರಿ ನೆರವಿನಿಂದ ತಂಡಕ್ಕೆ ಗೆಲುವು ತಂದುಕೊಟ್ಟರು. ಹೈದ್ರಾಬಾದ್ ಪರ ಫರೂಕಿ 2, ಸುಚಿತ್, ಉಮ್ರಾನ್ ಹಾಗೂ ಸುಂದರ್ ತಲಾ 1 ವಿಕೆಟ್ ಪಡೆದರು.
