ಯುಎಇನಲ್ಲಿ ಮುಗಿದ ಟಿ20 ವಿಶ್ವಕಪ್ ನೆನಪು ಇನ್ನೂ ಮಾಸಿಲ್ಲ. ಆದರೆ ಅದಾಗಲೇ ಮತ್ತೊಂದು ಟಿ20 ವಿಶ್ವಕಪ್ನ ಮಾತು ಶುರುವಾಗಿದೆ. ಆಸ್ಟ್ರೇಲಿಯಾ ಆತಿಥ್ಯವಹಿಸುವ ಟಿ20 ವಿಶ್ವಕಪ್ಗೆ ಟೀಮ್ ಇಂಡಿಯಾ ಸಿದ್ಧವಾಗುತ್ತಿದೆ. ಆಯ್ಕೆಗಾರರು ವಿಶ್ವಕಪ್ ಗೆದ್ದುಕೊಡಬಲ್ಲ ಆಟಗಾರರ ಮೇಲೆ ಹದ್ದಿನ ಕಣ್ಣಿಟ್ಟಿದೆ.
ಓಪನರ್ಗಳು ಯಾರು..?
ಟೀಮ್ ಇಂಡಿಯಾದ ಒಂದು ಆರಂಭಿಕನ ಸ್ಥಾನ ನಾಯಕ ರೊಹಿತ್ ಶರ್ಮಾ ಹೆಸರಿನಲ್ಲಿ ಫಿಕ್ಸ್ ಆಗಿದೆ. ಆಗಿದೆ ಮತ್ತೊಬ್ಬ ಓಪನರ್ ಯಾರು ಅನ್ನವ ಪ್ರಶ್ನೆ ಇದೆ. ಉಪ ನಾಯಕ ಕೆ.ಎಲ್. ರಾಹುಲ್ ಫ್ರಂಟ್ ರನ್ನರ್ ಆದರೂ ಸ್ಥಾನ ಗ್ಯಾರೆಂಟಿಯಲ್ಲ. ಇಶನ್ ಕಿಶನ್ ಲೆಫ್ಟ್ ರೈಟ್ ಕಾಂಬಿನೇಷನ್ ಜೊತೆಗೆ ಬ್ಯಾಕ್ ಅಪ್ ವಿಕೆಟ್ ಕೀಪರ್ ಸ್ಥಾನದ ಕಡೆ ಗಮನ ಇಟ್ಟಿದ್ದಾರೆ. ಐಪಿಎಲ್ ಹೀರೋ ರುತುರಾಜ್ ಗಾಯಕ್ವಾಡ್ ಅವಕಾಶ ಸಿಕ್ಕರೆ ಸಾಕು, ಎರಡೂ ಕೈಗಳಿಂದಲೂ ಬಾಚಿಕೊಳ್ಳುವ ಉದ್ದೇಶದಲ್ಲಿದ್ದಾರೆ.
ಟಾಪ್ ಆರ್ಡರ್ ಕಥೆ ಏನು..?
ಸದ್ಯ ವಿರಾಟ್ ಕೊಹ್ಲಿ ಸ್ಥಾನ ಆಭಾದಿತ. ಆದರೆ ಮುಂದಿನ ದಿನಗಳಲ್ಲಿ ಈ ಸ್ಥಾನ ಯಾರ ಪಾಲಾಗುತ್ತದೆ ಅನ್ನುವ ಚರ್ಚೆ ಇದೆ. ವಿರಾಟ್ ಸ್ಟ್ರೈಕ್ ರೇಟ್ ಟಿ20 ಆಟಕ್ಕೆ ಸೂಕ್ತವಲ್ಲ ಅನ್ನುವ ಮಾತಿದೆ. ಈ ಸ್ಥಾನಕ್ಕಾಗಿ ವೆಂಕಟೇಶ್ ಅಯ್ಯರ್, ಶ್ರೇಯಸ್ ಅಯ್ಯರ್ ಮತ್ತು ಸೂರ್ಯಕುಮಾರ್ ಯಾದವ್ ಮತ್ತು ಆರಂಭಿಕನಾಗಿ ಸ್ಥಾನ ಸಿಗದೇ ಇದ್ದ ಪಕ್ಷದಲ್ಲಿ ಕೆ.ಎಲ್. ರಾಹುಲ್ ಕೂಡ ಕಣ್ಣಿಟ್ಟಿದ್ದಾರೆ.
ಮಿಡಲ್ ಆರ್ಡರ್ ಸ್ಥಾನಕ್ಕಾಗಿ ಫೈಟ್
ಟಿ20 ಕ್ರಿಕೆಟ್ನಲ್ಲಿ ಮಿಡಲ್ ಆರ್ಡರ್ ಅಂದರೆ ಫಿನಿಷರ್ಗಳ ಆಟವೇ. ಆದರೆ ಈ ಸ್ಥಾನ ಟಿ20 ವಿಶ್ವಕಪ್ನಲ್ಲಿ ಯಾರ ಪಾಲಾಗುತ್ತದೆ ಅನ್ನುವ ಕುತೂಹಲವಿದೆ. ವಿಕೆಟ್ ಕೀಪರ್ ರಿಷಬ್ ಪಂತ್ ಸ್ಥಾನ ಬಹುತೇಕ ಖಚಿತ. ಶ್ರೇಯಸ್ ಮತ್ತು ಸೂರ್ಯ ಆಟ ಚೆನ್ನಾಗಿದ್ದರೆ ಈ ಸ್ಥಾನದ ಚಿಂತೆ ಇಲ್ಲ. ಆದರೆ ಹಳೆಯ ಹುಲಿಗಳು ಈ ಈ ಸ್ಥಾನದ ಪೈಪೋಟಿಯನ್ನು ಬಿಟ್ಟಿವೆ. ಹೀಗಾಗಿ ಯುವ ಆಟಗಾರರಿಗೆ ಈ ಸ್ಥಾನ ಸಿಗಲಿದೆ.
ಆಲ್ರೌಂಡರ್ಗಳು ಯಾರು..?
ಶಾರ್ದೂಲ್ ಥಾಕೂರ್, ದೀಪಕ್ ಚಹರ್, ಹರ್ಷಲ್ ಪಟೇಲ್, ವೆಂಕಟೇಶ್ ಅಯ್ಯರ್, ವಾಷಿಂಗ್ಟನ್ ಸುಂದರ್ ಹೀಗೆ ಆಲ್ರೌಂಡರ್ಗಳ ದೊಡ್ಡ ಪಟ್ಟಿ ಇದೆ. ಇವರ ಜೊತೆ ರವೀಂದ್ರ ಜಡೇಜಾ ಫೈಟ್ ಮಾಡುತ್ತಿದ್ದಾರೆ. ಮರೆತು ಹೋಗಿರುವ ಹಾರ್ದಿಕ್ ಪಾಂಡ್ಯಾ ಕೂಡ ಈ ಸ್ಥಾನದ ಮೇಲೆ ಕಣ್ಣಿಟ್ಟಿದ್ದಾರೆ. ಸುಂದರ್ ಆಫ್ ಸ್ಪಿನ್ನರ್ ಆಗಿದ್ದರೆ, ಜಡೇಜಾ ಎಡಗೈ ಸ್ಪಿನ್ನರ್. ಉಳಿದವರು ಮಧ್ಯಮ ವೇಗದ ಬೌಲರ್ಗಳು. ಹೀಗಾಗಿ ಈ ಎರಡು ಸ್ಥಾನ ಜಡೇಜಾ, ಸುಂದರ್ ಮತ್ತು ಒಬ್ಬ ಮಧ್ಯಮ ವೇಗಿ ಕಂ ಬ್ಯಾಟ್ಸ್ಮನ್ಗೆ ಒಲಿಯಬಹುದು ಅನ್ನುವ ಲೆಕ್ಕಾಚಾರವಿದೆ.
ವೇಗಿಗಳು ಮತ್ತು ಸ್ಪಿನ್ನರ್ಗಳು
ಆಸ್ಟ್ರೇಲಿಯಾದಲ್ಲಿ ಟೂರ್ನಿ ನಡೆಯುವುದರಿಂದ ಫಾಸ್ಟ್ ಬೌಲರ್ಗಳು ಬೇಕೇ ಬೇಕು. ಮೊಹಮ್ಮದ್ ಸಿರಾಜ್ ಬೌಲಿಂಗ್ ವಿಭಾಗದ ಲೀಡರ್ ಆಗಬಹುದು. ಆವೇಶ್ ಖಾನ್ ಸ್ಥಾನ ಐಪಿಎಲ್ ಪ್ರದರ್ಶನದ ಮೇಲೆ ನಿರ್ಧಾರವಾಗಬಹದು. ಬ್ಯಾಟಿಂಗ್ ಬಲವನ್ನು ಗಟ್ಟಿ ಮಾಡುವ ಉದ್ದೇಶದಿಂದ ಮಧ್ಯಮ ವೇಗ ಹೊಂದಿರುವ ಬೌಲಿಂಗ್ ಆಲ್ರೌಂಡರ್ಗಳನ್ನು ತಂಡಕ್ಕೆ ಆಯ್ಕೆ ಮಾಡಬಹುದು. ಇನ್ನು ಒಬ್ಬ ಸ್ಪೆಷಲಿಸ್ಟ್ ಸ್ಪಿನ್ನರ್ ತಂಡಕ್ಕೆ ಆಯ್ಕೆ ಆಗಬಹುದು. ಜಡೇಜಾ ಮತ್ತು ಸುಂದರ್ ಬಲ ಸ್ಪಿನ್ನರ್ ಆಯ್ಕೆಯನ್ನು ಕಡಿತ ಮಾಡಬಹುದು.
ಒಟ್ಟಿನಲ್ಲಿ ಅಕ್ಟೋಬರ್ನಲ್ಲಿ ನಡೆಯುವ ವಿಶ್ವಕಪ್ ಟೂರ್ನಿಯಲ್ಲಿ ಪ್ರಶಸ್ತಿ ಗೆಲ್ಲಬೇಕು ಅಂದರೆ ಸುಲಭದ ಮಾತಲ್ಲ. ಉತ್ತಮ ಕಾಂಬಿನೇಷನ್ ಮತ್ತು ಆಟಗಾರರ ಫಾರ್ಮ್ ಕನಸಿಗೆ ಅರ್ಧ ಬಲ ನೀಡಬಹುದು.
