ಮುಂಬೈನ ಡಿ. ವೈ.ಪಾಟೀಲ್ ಕ್ರೀಡಾಂಗಣದಲ್ಲಿ ನಡೆಯುವ ಡೆಲ್ಲಿ ಕ್ಯಾಪಿಟಲ್ಸ್ ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ನಡುವಿನ ಪಂದ್ಯ ಸಿಕ್ಕಾಪಟ್ಟೆ ಮಹತ್ವ ಪಡೆದಿದೆ. ಚೆನ್ನೈ ಪಾಲಿಗೆ ಇದು ಪ್ಲೇ-ಆಫ್ ಸ್ಥಾನದ ಆಸೆಯನ್ನು ಜೀವಂತವಾಗಿಡಲು ಲೆಕ್ಕಾಚಾರದ ಪಂದ್ಯವಾಗಿದೆ. ಆದರೆ ಡೆಲ್ಲಿ ಕ್ಯಾಪಿಟಲ್ಸ್ಗೆ ಈ ಪಂದ್ಯ ಅತ್ಯಮೂಲ್ಯ. ಇಲ್ಲಿ ಗೆದ್ದರೆ ಸಿಗುವ ಎರಡು ಅಂಕಗಳು ಡೆಲ್ಲಿ ಕ್ಯಾಪಿಟಲ್ಸ್ನ ಭವಿಷ್ಯವನ್ನೂ ಬರೆಯಲಿದೆ.
ಡೆಲ್ಲಿ ತಂಡ ಕೋವಿಡ್ ಕಾರಣದಿಂದ ಸಾಕಷ್ಟು ಆಟಗಾರರನ್ನು ಕಳೆದುಕೊಂಡಿತ್ತು. ಗಾಯದ ಸಮಸ್ಯೆ ಕೂಡ ಕಾಡಿತ್ತು. 10 ಪಂದ್ಯಗಳಲ್ಲಿ 5ನ್ನು ಗೆದ್ದು, 5ನ್ನು ಸೋತಿದೆ. ಆದರೂ ರನ್ ರೇಟ್ + 0.641 ಇದೆ. ಇದು ಟೂರ್ನಿಯಲ್ಲಿ ತಂಡವೊಂದರ ಬೆಸ್ಟ್ ರನ್ ರೇಟ್ ಆಗಿದೆ. ಚೆನ್ನೈ ತಂಡ 10 ಪಂದ್ಯಗಳಲ್ಲಿ 3 ನ್ನು ಗೆದ್ದಿದೆ. ಉಳಿದ 4 ಪಂದ್ಯಗಳನ್ನು ಭರ್ಜರಿಯಾಗಿ ಗೆಹದ್ದರೂ ಚೆನ್ನೈ ಪ್ಲೇ-ಆಫ್ ಅವಕಾಶ ಲೆಕ್ಕಾಚಾರದ ಮೇಲೆ ಮಾತ್ರ ನಿಂತಿದೆ.
ಚೆನ್ನೈ ತಂಡಕ್ಕೆ ಟೂರ್ನಿಗೂ ಮುನ್ನ ದೀಪಕ್ ಚಹರ್ ಗಾಯ ದುಬಾರಿ ಆಗಿತ್ತು. ನಂತರ ಡ್ವೈನ್ ಬ್ತಾವೋ ಕೂಡ ಗಾಯಗೊಂಡಿದ್ದಾರೆ. ಮುಕೇಶ್ ಚೌಧರಿ, ಸಿಮರ್ ಜಿತ್ ಸಿಂಗ್, ಡ್ವೈನ್ ಪ್ರಿಟೋರಿಯಸ್ ಮತ್ತು ಮಹೀಶ್ ತೀಕ್ಷಣ ಪಾಲಿಗೆ ಇದು ಚೊಚ್ಚಲ ಐಪಿಎಲ್ ಸೀಸನ್ ಆಗಿದೆ. ಹೀಗಾಗಿ ತಂಡದಲ್ಲಿ ಅನುಭವದ ಕೊರತೆ ಕಾಣುತ್ತಿದೆ. ಇದರ ಜೊತೆಗೆ ರವೀಂದ್ರ ಜಡೇಜಾ ವೈಫಲ್ಯ ದುಬಾರಿ ಆಗಿದೆ. ಬ್ಯಾಟಿಂಗ್ನಲ್ಲಿ ಚೆನ್ನೈ ಶಕ್ತಿ ಮರಳಿ ಬಂದಿದೆ. ಡೆವೊನ್ ಕಾನ್ವೆ ಮತ್ತು ರುತುರಾಜ್ ಗಾಯಕ್ವಾಡ್ ಜೋಡಿ ಮುರಳಿ ವಿಜಯ್ ಮತ್ತು ಮೈಕ್ ಹಸ್ಸಿ ಜೋಡಿಯನ್ನು ನೆನಪಿಸುತ್ತಿದೆ. ರಾಬಿನ್ ಉತ್ತಪ್ಪ ಅದ್ಯಾಕೋ ಮಂಕಾಗಿದ್ದಾರೆ. ಅಂಬಾಟಿ ರಾಯುಡು ಮತ್ತು ಮೊಯಿನ್ ಅಲಿ ಸ್ಥಿರ ಆಟ ಆಡಬೇಕು., ಶಿವಂ ದುಬೆಗೆ ಸ್ಥಾನ ನೀಡಬೇಕು. ಧೋನಿ ಮತ್ತು ಜಡೇಜಾ ಫಿನಿಶಿಂಗ್ ಟಚ್ ಕೊಟ್ಟರೆ ಆಟ ಫಿನಿಷ್.
ಡೆಲ್ಲಿ ಕ್ಯಾಪಿಟಲ್ಸ್ ಬ್ಯಾಟಿಂಗ್ ಶಕ್ತಿಯೂ ಕಡಿಮೆ ಇಲ್ಲ. ಪೃಥ್ವಿ ಷಾ ಆಡುವ ತಂಡ ಸೇರಿಕೊಳ್ಳುವುದು ಖಚಿತ. ವಾರ್ನರ್ ಬ್ಯಾಟಿಂಗ್ ಸ್ಥಿರತೆ ಎದುರಾಳಿಗಳಿಗೆ ಚಾಲೆಂಜ್. ಮೂರನೇ ಕ್ರಮಾಂಕದಲ್ಲಿ ಯಶ್ ಧುಲ್ ಗೆ ಅವಕಾಶ ನೀಡುವ ಸಮಯ ಇದು. ಮಿಚೆಲ್ ಮಾರ್ಷ್ ಮತ್ತು ರಿಷಬ್ ಪಂತ್ ಮಧ್ಯಮ ಕ್ರಮಾಂಕದಲ್ಲಿ ಆಡಬೇಕಿದೆ. ರೋವ್ಮನ್ ಪೊವೆಲ್ ಬಿಗ್ ಹಿಟ್ಟಿಂಗ್ ಇನ್ನಿಂಗ್ಸ್ ಅಂತ್ಯಕ್ಕೆ ಬಲ ತುಂಬಿದೆ. ಲಲಿತ್ ಯಾದವ್, ಶಾರ್ದೂಲ್ ಥಾಕೂರ್ ಮತ್ತು ಅಕ್ಸರ್ ಪಟೇಲ್ ಕೂಡ ಬ್ಯಾಟಿಂಗ್ ಪಂಟರ್ ಗಳು.
ಡೆಲ್ಲಿ ಬೌಲಿಂಗ್ ಚೆನ್ನಾಗಿ ಕಾಣುತ್ತಿದೆ. ಅನ್ರಿಚ್ ನೋರ್ಟ್ಜೆ ವಾಪಾಸಾತಿ ಮತ್ತು ಖಲೀಲ್ ಅಹ್ಮದ್ ನಿಖರತೆ ಫಲಿತಾಂಶ ಬದಲಿಸಿದೆ. ಶಾರ್ದೂಲ್ ಥಾಕೂರ್ ಡೆತ್ ಓವರ್ ಎಕ್ಸಪರ್ಟ್. ಅಕ್ಸರ್ ಮತ್ತು ಕುಲ್ ದೀಪ್ ಸ್ಪಿನ್ ಜೋಡಿ ಮೋಡಿ ಮಾಡಿದೆ.
