5 ಬಾರಿಯ ಚಾಂಪಿಯನ್ ಮುಂಬೈ ಇಂಡಿಯನ್ಸ್, 4 ಬಾರಿಯ ಚಾಂಪಿಯನ್ ಚೆನ್ನೈ ಸೂಪರ್ ಕಿಂಗ್ಸ್. ಈ ಬಾರಿಯ ಐಪಿಎಲ್ನಲ್ಲಿ ಮಾತ್ರ ಇವೆರಡು ತಂಡಗಳ ಆಟ ನಡೆದಿಲ್ಲ. ಅಂಕಪಟ್ಟಿಯಲ್ಲಿ ಮುಂಬೈ 10ನೇ ಸ್ಥಾನದಲ್ಲಿದ್ದರೆ, ಚೆನ್ನೈ 9ನೇ ಸ್ಥಾನದಲ್ಲಿದೆ. ಆದರೆ ಚೆನ್ನೈ ಉಳಿದ 3 ಪಂದ್ಯಗಳನ್ನು ಗೆದ್ದರೆ ಪ್ಲೇ-ಆಫ್ ಲೆಕ್ಕಾಚಾರಕ್ಕೆ ಬರಬಹುದು. ಮುಂಬೈ ಈಗಾಗಲೇ ಟೂರ್ನಿಯಿಂದ ಹೊರ ಬಿದ್ದಿದೆ. ಇಷ್ಟಾದರೂ ವಾಂಖೆಡೆಯಲ್ಲಿ ನಡೆಯುವುದು ಐಪಿಎಲ್ನ El Classico..!
ಚೆನ್ನೈ ಮತ್ತು ಮುಂಬೈ ತಂಡಕ್ಕೆ ಗಾಯ ಬಿಟ್ಟುಬಿಡದೆ ಕಾಡಿದೆ. ದೀಪಕ್ ಚಹರ್ ಸೇವೆಯನ್ನು ಸಿಎಸ್ಕೆ ಆರಂಭದಲ್ಲೇ ಕಳೆದುಕೊಂಡರೆ, ಮುಂಬೈ ತಂಡಕ್ಕೆ ಜೋಫ್ರಾ ಆರ್ಚರ್ ಸೇವೆ ಲಭ್ಯ ಆಗಲಿಲ್ಲ. ಈಗ ರವೀಂದ್ರ ಜಡೇಜಾ ಗಾಯಕ್ಕೆ ಒಳಗಾಗಿದ್ದಾರೆ. ಸೂರ್ಯ ಕುಮಾರ್ ಯಾದವ್ ಕೂಡ ಮೈದಾನಕ್ಕಿಳಿಯುತ್ತಿಲ್ಲ. ಹೀಗಾಗಿ ಎರಡೂ ತಂಡಗಳದ್ದು ಒಂದೇ ರೀತಿಯ ಆಟ. ಮೊದಲ ಮುಖಾಮುಖಿಯಲ್ಲಿ ಮಹೇಂದ್ರ ಸಿಂಗ್ ಧೋನಿ ಕೊನೆಯ ಓವರ್ ನಲ್ಲಿ 17 ರನ್ ಸಿಡಿಸಿ ತಂಡವನ್ನು ಗೆಲ್ಲಿಸಿದ್ದರು. ಆದರೆ ಈಗ ಮುಂಬೈ ಸೇಡು ತೀರಿಸಿಕೊಳ್ಳುವ ಲೆಕ್ಕಾಚಾರದಲ್ಲಿದೆ.
ರುತುರಾಜ್ ಗಾಯಕ್ವಾಡ್ ಮತ್ತು ಡೆವೊನ್ ಕಾನ್ವೆ ನೀಡುವ ಆರಂಭದ ಸಿಎಸ್ಕೆ ಹಣೆ ಬರಹ ಬರೆಯುತ್ತಿದೆ. ರಾಬಿನ್ ಉತ್ತಪ್ಪ ಮತ್ತು ಅಂಬಟಿ ರಾಯುಡು ಆರಂಭದಲ್ಲಿ ತೋರಿದ ಸ್ಥಿರ ಆಟ ಮರೆತಿದ್ದಾರೆ. ಶಿವಂ ದುಬೆ ಮತ್ತು ಮಹೇಂದ್ರ ಸಿಂಗ್ ಧೋನಿಯಿಂದ ದೊಡ್ಡ ನಿರೀಕ್ಷೆ ಇದೆ. ಮೊಯಿನ್ ಅಲಿ ಮತ್ತು ಡ್ವೈನ್ ಬ್ರಾವೋ ಆಟ ಸೋಲು ಗೆಲುವನ್ನು ನಿರ್ಧಾರ ಮಾಡುತ್ತದೆ. ಮಹೀಶ್ ತೀಕ್ಷಣ ಮಿಸ್ಟ್ರಿ ವರ್ಕೌಟ್ ಆಗುತ್ತಿದೆ. ಮುಕೇಶ್ ಚೌಧರಿ ಮತ್ತು ಸಿಮರ್ ಜಿತ್ ಸಿಂಗ್ ಹೊಸ ಅನುಭವ ಪಡೆಯುತ್ತಿದ್ದಾರೆ.
ಮುಂಬೈ ತಂಡದಲ್ಲೂ ಎಲ್ಲವೂ ಹೊಸತು. ಇಶನ್ ಕಿಶನ್ ಮತ್ತು ರೋಹಿತ್ ಶರ್ಮಾ ನಿರೀಕ್ಷೆ ಮಾಡಿದಷ್ಟು ಉತ್ತಮ ಆಟ ಆಡಿಲ್ಲ. ತಿಲಕ್ ವರ್ಮಾ ಈ ಸೀಸನ್ನಲ್ಲಿ ಮುಂಬೈ ಇಂಡಿಯನ್ಸ್ ಪಾಲಿನ ಬೆಸ್ಟ್ ಪ್ಲೇಯರ್. ರಮನ್ ದೀಪ್ ಸಿಂಗ್ ಆಟದ ಬಗ್ಗೆ ಹೆಚ್ಚು ಗೊತ್ತಿಲ್ಲ. ಟಿಮ್ ಡೇವಿಡ್ ಬಿಗ್ ಹಿಟ್ಟಿಂಗ್ಗೆ ಫೇಮಸ್. ಕೈರಾನ್ ಪೊಲ್ಲಾರ್ಡ್ ಲಯ ಕಳೆದುಕೊಂಡಿದ್ದಾರೆ. ಡೇನಿಯಲ್ ಸ್ಯಾಮ್ಸ್ , ಹೃತಿಕ್ ಶೋಕಿನ್, ಕುಮಾರ್ ಕಾರ್ತಿಕೇಯ ಹೊಸ ಲಯದಲ್ಲಿದ್ದಾರೆ. ಜಸ್ ಪ್ರಿತ್ ಬುಮ್ರಾ ಮತ್ತೆ ಲಯಕ್ಕೆ ಮರಳಿದ್ದಾರೆ.
ವಾಂಖೆಡೆ ಮೈದಾನ ಬೌಲರ್ ಫ್ರೆಂಡ್ಲಿ ಆಗಿದೆ. ಅದರಲ್ಲೂ ವೇಗದ ಬೌಲರ್ ಗಳು ಆರಂಭದಲ್ಲಿ ಪಡೆಯುವ ಸ್ವಿಂಗ್ ಗಮನ ಸೆಳೆಯುತ್ತಿದೆ. ಹೀಗಾಗಿ ಟಾಸ್ ಗೆದ್ದವರ ನಿರ್ಧಾರವೂ ಪ್ರಮುಖವಾಗಿದೆ.
