ಐಸಿಸಿ ಮಹಿಳಾ ವಿಶ್ವಕಪ್ನಲ್ಲಿ ಆಸ್ಟ್ರೇಲಿಯಾದ ಅಜೇಯ ಓಟಕ್ಕೆ ಕಡಿವಾಣ ಹಾಕಲು ಕಷ್ಟವಾಗುತ್ತಿದೆ. ಲೀಗ್ನಲ್ಲಿ ಸತತ 7 ಪಂದ್ಯ ಗೆದ್ದಿದ್ದ ಕಾಂಗರೂ ತಂಡ ಈಗ ಸೆಮಿಫೈನಲ್ ಹೋರಾಟವನ್ನು ಕೂಡ 158 ರನ್ಗಳಿಂದ ಭರ್ಜರಿಯಾಗಿ ಗೆದು ಫೈನಲ್ ಪ್ರವೇಶಿಸಿದೆ. ಆಸೀಸ್ನ ಅಬ್ಬರದ ಆಟಕ್ಕೆ ವೆಸ್ಟ್ಇಂಡೀಸ್ ಹೇಳ ಹೆಸರಿಲ್ಲದೆ ಮುಗ್ಗರಿಸಿದೆ.
ವೆಲ್ಲಿಂಗ್ಟನ್ನಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ ಆಸ್ಟ್ರೇಲಿಯಾ ವೆಸ್ಟ್ಇಂಡೀಸ್ ಬೌಲರ್ಗಳನ್ನು ಮನಸ್ಸಿಗೆ ಬಂದ ಹಾಗೇ ಬೆಂಡೆತ್ತಿತ್ತು. ಅಲಿಸಾ ಹೀಲಿ ಮತ್ತು ರಾಶೆಲ್ ಹೇಯ್ನ್ಸ್ ಮೊದಲ ವಿಕೆಟ್ಗೆ 216 ರನ್ಗಳ ಜೊತೆಯಾಟ ಆಡಿದರು. ಅಬ್ಬರದ ಆಟವಾಡಿದ ಹೀಲಿ ಕೇವಲ 107 ಎಸೆತಗಳಲ್ಲಿ 17 ಬೌಂಡರಿ ಮತ್ತು 1 ಸಿಕ್ಸರ್ ನೆರವಿನಿಂದ 129 ರನ್ಗಳಿಸಿ ಔಟಾದರು. ರಾಶೆಲ್ ಹೇಯ್ನ್ಸ್ 100 ಎಸೆತಗಳಲ್ಲಿ 85 ರನ್ಗಳಿಸಿ ಪವೆಲಿಯನ್ ಸೇರಿಕೊಂಡರು. ಆ್ಯಶ್ ಗಾರ್ಡನರ್ 12 ರನ್ಗಳಿಸಿ ಮುಗ್ಗರಿಸಿದರು.
ನಾಯಕಿ ಮೆಗ್ ಲ್ಯಾನಿಂಗ್ ಮತ್ತು ಬೆಥ್ ಮೂನಿ ಫಿನಿಶಿಂಗ್ ಟಚ್ ಕೊಟ್ಟರು. ಲ್ಯಾನಿಂಗ್ ಅಜೇಯ 26 ರನ್ಗಳಿಸಿದರೆ, ಮೂನಿ 31 ಎಸೆತಗಳಲ್ಲಿ 43 ರನ್ ಸಿಡಿಸಿ ಅಜೇಯರಾಗುಳಿದರು. ನಿಗದಿತ 45 ಓವರುಗಳಲ್ಲಿ ಆಸ್ಟ್ರೇಲಿಯಾ 3 ವಿಕೆಟ್ ಕಳೆದುಕೊಂಡು 305 ರನ್ಗಳಿಸಿತು.
ಚೇಸಿಂಗ್ ವೇಳೆ ವೆಸ್ಟ್ಇಂಡೀಸ್ ಎಲ್ಲೂ ಪ್ರತಿರೋಧವನ್ನೇ ತೋರಲಿಲ್ಲ. ರಶಡಾ ವಿಲಿಯಮ್ಸ್ ಶೂನ್ಯ ಸುತ್ತಿದರೆ, ಡಿಯಾಂಡ್ರ ಡಾಟಿನ್ ಮತ್ತು ಹೇಲಿ ಮ್ಯಾಥ್ಯೂಸ್ ತಲಾ 34 ರನ್ಗಳಿಸಿದರು. ನಾಯಕಿ ಸ್ಟೆಫಾನಿ ಟೇಲರ್ ಒಬ್ಬರೇ 48 ರನ್ಗಳಿಸಿದ್ದು ಬಿಟ್ಟರೆ ಉಳಿದ ಆಟಗಾರ್ತಿಯರು ಎರಡಂಕಿ ಕೂಡ ಮುಟ್ಟಲಿಲ್ಲ. ಅನಿಸಾ ಮೊಹಮ್ಮದ್ ಹಾಗೂ ಹೆನ್ರಿ ಗಾಯದಿಂದಾಗಿ ಬ್ಯಾಟಿಂಗ್ಗೆ ಇಳಿಯಲಿಲ್ಲ. ವೆಸ್ಟ್ಇಂಡೀಸ್ 37 ಓವರುಗಳಲ್ಲಿ 8 ವಿಕೆಟ್ ಕಳೆದುಕೊಂಡು 148 ರನ್ಗಳಿಸಿದ್ದಾಗ ಇನ್ನಿಂಗ್ಸ್ ಅಂತ್ಯ ಮಾಡಿಕೊಂಡಿತು. ಆಸ್ಟ್ರೇಲಿಯಾ 158 ರನ್ಗಳ ಭರ್ಜರಿ ಜಯ ದಾಖಲಿಸಿತು.