ಟ್ರಾವಿಸ್ ಹೆಡ್(101) ಶತಕ ಹಾಗೂ ಆಡಂ ಜ್ಹಂಪ(38/4) ಉತ್ತಮ ಬೌಲಿಂಗ್ ನೆರವಿನಿಂದ ಪಾಕಿಸ್ತಾನ್ ವಿರುದ್ಧದ ಮೊದಲ ಏಕದಿನ ಪಂದ್ಯದಲ್ಲಿ ಆಸ್ಟ್ರೇಲಿಯಾ 88 ರನ್ಗಳ ಭರ್ಜರಿ ಗೆಲುವು ಸಾಧಿಸಿದೆ.
ಲಾಹೋರ್ನಲ್ಲಿ ಮಂಗಳವಾರ ನಡೆದ ಹಗಲು-ರಾತ್ರಿ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ ಅವಕಾಶ ಪಡೆದ ಆಸ್ಟ್ರೇಲಿಯಾ, 50 ಓವರ್ನಲ್ಲಿ 7 ವಿಕೆಟ್ಗೆ 313 ರನ್ಗಳಿಸಿತು. ಈ ಸವಾಲು ಬೆನ್ನತ್ತಿದ ಪಾಕಿಸ್ತಾನ, 45.2 ಓವರ್ನಲ್ಲಿ 225 ರನ್ಗಳಿಗೆ ಆಲೌಟ್ ಆಯಿತು. ಈ ಗೆಲುವಿನೊಂದಿಗೆ ಆಸ್ಟ್ರೇಲಿಯಾ ಮೂರು ಪಂದ್ಯಗಳ ಏಕದಿನ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿತು.
ಆಸೀಸ್ ನೀಡಿದ ಬೃಹತ್ ಸವಾಲು ಬೆನ್ನತ್ತಿದ ಪಾಕಿಸ್ತಾನ ಬ್ಯಾಟಿಂಗ್ ವೈಫಲ್ಯಕ್ಕೆ ಸಿಲುಕಿತು. ತಂಡದ ಪರ ಇನ್ನಿಂಗ್ಸ್ ಆರಂಭಿಸಿದ ಫಖರ್ ಜ಼ಮಾನ್(18) ಬಹುಬೇಗೆ ವಿಕೆಟ್ ಒಪ್ಪಿಸಿದರು. ಈ ಹಂತದಲ್ಲಿ ಜೊತೆಯಾದ ಇಮಾಮ್-ಉಲ್-ಹಕ್(103) ಹಾಗೂ ನಾಯಕ ಬಾಬರ್ ಆಜ಼ಂ(57) ಜವಾಬ್ದಾರಿಯ ಆಟವಾಡಿ 104 ರನ್ಗಳ ಜೊತೆಯಾಟವಾಡಿದರು. ಆದರೆ ಇವರಿಬ್ಬರನ್ನು ಹೊರತುಪಡಿಸಿ ಉಳಿದ ಆಟಗಾರರಿಂದ ನಿರೀಕ್ಷಿತ ಪ್ರದರ್ಶನ ಹೊರಬರಲಿಲ್ಲ. ಅಂತಿಮವಾಗಿ ಪಾಕಿಸ್ತಾನ 88 ರನ್ಗಳ ಸೋಲನುಭವಿಸಿತು.
ಆಸೀಸ್ ಪರ ಆಡಂ ಜ್ಹಂಪ(38/4) ವಿಕೆಟ್ ಪಡೆದು ಪಾಕ್ ಬ್ಯಾಟ್ಸ್ಮನ್ಗಳಿಗೆ ಕಡಿವಾಣ ಹಾಕಿದರು. ಇವರಿಗೆ ಸಾಥ್ ನೀಡಿದ ಮಿಚೆಲ್ ಸ್ವೀಪ್ಸನ್ ಹಾಗೂ ಟ್ರಾವಿಸ್ ಹೆಡ್ ತಲಾ 2 ವಿಕೆಟ್ ಪಡೆದರು. ಉಳಿದಂತೆ ಅಬೋಟ್, ಎಲ್ಲಿಸ್ ತಲಾ 1 ವಿಕೆಟ್ ಪಡೆದರು.
ಇದಕ್ಕೂ ಮುನ್ನ ಬ್ಯಾಟ್ ಮಾಡಿದ ಆಸ್ಟ್ರೇಲಿಯಾಕ್ಕೆ ಬ್ಯಾಟ್ಸ್ಮನ್ಗಳು ಆಸರೆಯಾದರು. ಆರಂಭಿಕನಾಗಿ ಕಣಕ್ಕಿಳಿದ ಟ್ರಾವಿಸ್ ಹೆಡ್ 101 (72 ಎಸೆತ, 12 ಬೌಂಡರಿ, 3 ಸಿಕ್ಸರ್) ಅದ್ಭುತ ಶತಕಗಳಿಸಿ ಮಿಂಚಿದರು. ಇವರೊಂದಿಗೆ ಬೆನ್ ಕಟ್ಟಿಂಗ್ 55 ಹಾಗೂ ಕೆಮರೂನ್ ಗ್ರೀನ್ 40 ರನ್ಗಳಿಸಿ ತಂಡಕ್ಕೆ ನೆರವಾದರು. ಪಾಕ್ ಪರ ಹ್ಯಾರಿಸ್ ರಾಫ್ ಹಾಗೂ ಜಹೀದ್ ಮೊಹಮೊದ್ ತಲಾ 2 ವಿಕೆಟ್ ಪಡೆದರೆ, ಇಫ್ತಿಕರ್ ಅಹ್ಮೆದ್ ಮತ್ತು ಕುಷ್ದಿಲ್ ಶಾ ಅವರುಗಳು 1 ವಿಕೆಟ್ ಪಡೆದರು.
ಉತ್ತಮ ಆಟವಾಡಿದ ಟ್ರಾವಿಸ್ ಹೆಡ್ ನಿರೀಕ್ಷೆಯಂತೆ ಪಂದ್ಯ ಶ್ರೇಷ್ಠ ಪ್ರಶಸ್ತಿ ಪಡೆದರು. ಉಭಯ ತಂಡಗಳ ನಡುವಿನ 2ನೇ ಪಂದ್ಯ ಮಾರ್ಚ್ 31ರಂದು ಲಾಹೋರ್ನಲ್ಲಿ ನಡೆಯಲಿದೆ.