ಟೀಮ್ ಇಂಡಿಯಾದ ಟೆಸ್ಟ್ ಕ್ಯಾಪ್ಟನ್ ವಿರಾಟ್ ಕೊಹ್ಲಿ ಕೆಲ ವರ್ಷಗಳ ಹಿಂದೆ ಶತಕಗಳ ಮೇಲೆ ಶತಕ ಬಾರಿಸಿದ್ದರು. ಆದರೆ ಇತ್ತೀಚಿನ ಎರಡು ವರ್ಷಗಳಲ್ಲಿ ವಿರಾಟ್ ಬ್ಯಾಟ್ನಿಂದ ಶತಕಗಳು ಸಿಡಿದಿಲ್ಲ. ಏಕದಿನ ಪಂದ್ಯ ಇರಲಿ, ಟೆಸ್ಟ್ ಮ್ಯಾಚ್ ಇರಲಿ ವಿರಾಟ್ ಶತಕ ಬಾರಿಸುವುದನ್ನು ಮರೆತು ಬಿಟ್ಟಿದ್ದಾರೆ. ಏಕದಿನ ಪಂದ್ಯಗಳಲ್ಲಿ ಸಚಿನ್ ದಾಖಲೆ ಮುರಿಯಬಲ್ಲ ಆಟಗಾರ ಎಂದು ಹೆಸರು ಮಾಡಿದರೂ, ಕಳೆದ 2 ವರ್ಷಗಳ ಶತಕದ ಬರ ವಿರಾಟ್ ದಾಖಲೆಯನ್ನು ಮುಂದೂಡುತ್ತಿದೆ.
ಅಂತರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಸಚಿನ್ 100 ಶತಕಗಳನ್ನು ಬಾರಿಸಿದ್ದರು. ಏಕದಿನ ಕ್ರಿಕೆಟ್ನಲ್ಲಿ 49 ಹಾಗೂ ಟೆಸ್ಟ್ ಕ್ರಿಕಟ್ನಲ್ಲಿ 51 ಶತಕ ಸಿಡಿಸಿದ್ದರು. ಸಚಿನ್ ಬಳಿಕ 71 ಶತಕ ಬಾರಿಸಿರುವ ರಿಕಿ ಪಾಂಟಿಂಗ್ 2ನೇ ಸ್ಥಾನದಲ್ಲಿದ್ದಾರೆ. ವಿರಾಟ್ ಖಾತೆಯಲ್ಲಿ 70 ಅಂತರಾಷ್ಟ್ರೀಯ ಶತಕಗಳಿವೆ. ವಿರಾಟ್ ಟೆಸ್ಟ್ನಲ್ಲಿ 27 ಹಾಗೂ ಏಕದಿನ ಕ್ರಿಕೆಟ್ನಲ್ಲಿ 43 ಶತಕ ಸಿಡಿಸಿದ್ದಾರೆ. ಟೆಸ್ಟ್ನಲ್ಲಿ ಸಚಿನ್ ಶತಕದ ಬಳಿ ಹೋಗುವುದು ವಿರಾಟ್ಗೆ ಕಷ್ಟದ ಮಾತು. ಆದರೆ ಏಕದಿನ ಕ್ರಿಕೆಟ್ನಲ್ಲಿ ವಿರಾಟ್ ಸಚಿನ್ ದಾಖಲೆಯನ್ನು ಮುರಿಯಬಹುದು ಅನ್ನುವ ಲೆಕ್ಕಾಚಾರವಿದೆ.
ಏಕದಿನ ಮತ್ತು ಟಿ-20 ಕ್ಯಾಪ್ಟನ್ಸಿ ವಿರಾಟ್ ಕೈಯಿಂದ ತಪ್ಪಿ ಹೋಗಿದೆ. ಹೀಗಾಗಿ ವಿರಾಟ್ ಕೊಂಚ ಗಲಿಬಿಲಿಯಾಗಿದ್ದಾರೆ. ಅದರಲ್ಲೂ ಏಕದಿನ ಕ್ರಿಕೆಟ್ನ ಕ್ಯಾಪ್ಟನ್ಸಿ ತಪ್ಪಿರುವುದು ವಿರಾಟ್ಗೆ ಅರಗಿಸಿಕೊಳ್ಳಲು ಆಗುತ್ತಿಲ್ಲ. ಹೀಗಾಗಿ ದಕ್ಷಿಣ ಆಫ್ರಿಕಾ ವಿರುದ್ಧದ ಏಕದಿನ ಸರಣಿಯಿಂದ ವಿರಾಮ ಪಡೆದುಕೊಂಡಿದ್ದಾರೆ. ಅಂದಹಾಗೇ, ವಿರಾಟ್ 2023ರಲ್ಲಿ ಭಾರತದಲ್ಲಿ ನಡೆಯುವ ಏಕದಿನ ವಿಶ್ವಕಪ್ನಲ್ಲಿ ಟೀಮ್ ಇಂಡಿಯಾವನ್ನು ಮುನ್ನಡೆಸುವ ಕನಸು ಕಂಡಿದ್ದರು. ಅದಾದ ಬಳಿಕ ಏಕದಿನ ಕ್ರಿಕೆಟ್ನಿಂದ ನಿವರತ್ತಿ ಪಡೆಯುವ ಕನಸು ವಿರಾಟ್ಗಿತ್ತು ಎನ್ನಲಾಗಿದೆ. ಆದರೆ ಸದ್ಯ ತಂಡವನ್ನು ಮುನ್ನಡೆಸುವ ಕನಸು ನನಸಾಗದು.
ಈ ಮಧ್ಯೆ ಏಕದಿನ ಕ್ರಿಕೆಟ್ನಲ್ಲಿ ಇನ್ನು 7 ಶತಕ ದಾಖಲಿಸಿದರೆ ವಿರಾಟ್ ಸಚಿನ್ ದಾಖಲೆಯನ್ನು ಮೀರಿ ನಿಲ್ಲುತ್ತಾರೆ. ಆದರೆ ಅವರ ಮಾನಸಿಕ ಗೊಂದಲಗಳು ಮತ್ತು ಇತ್ತೀಚಿನ ಫಾರ್ಮ್ ಸಮಸ್ಯೆ ಅವರನ್ನು ಈ ದಾಖಲೆ ಮಾಡಲು ಬಿಡುತ್ತಾ ಅನ್ನುವ ಪ್ರಶ್ನೆ ಕ್ರಿಕೆಟ್ ವಲಯದಲ್ಲಿ ದೊಡ್ಡ ಚರ್ಚೆಯಾಗುತ್ತಿದೆ.