ಏಕದಿನ ಕ್ರಿಕೆಟ್ನಲ್ಲಿ ವಿಶ್ವದಲ್ಲಿ ಅತ್ಯುತ್ತಮ ಬ್ಯಾಟ್ಸ್ಮನ್ ಯಾರಾದರು ಇದ್ದಾರೆ ಅಂದರೆ ಅದು ವಿರಾಟ್ ಕೊಹ್ಲಿ ಮಾತ್ರ. ಶತಕಗಳ ಸರದಾರ, ಯಾವುದೇ ಪಿಚ್ನಲ್ಲೂ ರನ್ಗಳಿಸುವ ತಾಕತ್ತು ಹೊಂದಿರುವ ಬ್ಯಾಟಿಂಗ್ ಕಿಂಗ್ ವಿರಾಟ್ ಕೊಹ್ಲಿ. ಏಕದಿನ ಕ್ರಿಕೆಟ್ನಲ್ಲಿ 43 ಶತಕಗಳನ್ನು ಬಾರಿಸಿರುವ ಕೊಹ್ಲಿ ಬಗ್ಗೆ ಎರಡು ಮಾತಿಲ್ಲ. ಸಚಿನ್ ತೆಂಡುಲ್ಕರ್ ಬಾರಿಸಿರುವ 49 ಶತಕಗಳು ಏಕದಿನ ಕ್ರಿಕೆಟ್ನಲ್ಲಿ ಆಟಗಾರನೊಬ್ಬ ಬಾರಿಸಿರುವ ಗರಿಷ್ಠ ಶತಕಗಳ ಸಂಖ್ಯೆಯಾದರೆ, ವಿರಾಟ್ ಬಾರಿಸಿರುವ 43 ಶತಕಗಳು 2ನೇ ಸ್ಥಾನ ಪಡೆದಿದೆ. ಸಚಿನ್ ಏಕದಿನ ಶತಕಗಳ ದಾಖಲೆಗೆ ಕೊಹ್ಲಿಯಿಂದ ಮಾತ್ರ ಬೆದರಿಕೆ ಇದೆ.
ಇತ್ತೀಚಿನ ದಿನಗಳಲ್ಲಿ ವಿರಾಟ್ ಬ್ಯಾಟಿಂಗ್ ಅದ್ಯಾಕೋ ಸ್ವಲ್ಪ ಮಂಕಾಗಿದೆ. ಶತಕಗಳು ಮಿಸ್ ಆಗುತ್ತಿವೆ. ಇಷ್ಟಾದರೂ ಕೊಹ್ಲಿಯ ರನ್ ಬೇಟೆ ಕಡಿಮೆ ಆಗಿಲ್ಲ. ಅರ್ಧಶತಕಗಳು ಕೊಹ್ಲಿ ಬ್ಯಾಟ್ನಿಂದ ಸಿಡಿಯುತ್ತಿವೆ. ಆದರೆ ಪಾರ್ಲ್ ನಲ್ಲಿ ನಡೆಯುತ್ತಿರುವ ಎರಡನೇ ಏಕದಿನ ಪಂದ್ಯದ ವೇಳೆ ವಿರಾಟ್ ಶೂನ್ಯಕ್ಕೆ ಔಟಾಗಿ ಹೊಸ ದಾಖಲೆ ಬರೆದರು.
256 ಇನ್ನಿಂಗ್ಸ್ಗಳಲ್ಲಿ ಕೇವಲ 10 ಬಾರಿ ಶೂನ್ಯ
ವಿರಾಟ್ ಏಕದಿನ ಕ್ರಿಕೆಟ್ನಲ್ಲಿ 256 ಇನ್ನಿಂಗ್ಸ್ಗಳನ್ನು ಆಡಿದ್ದಾರೆ. ಈ ಪೈಕಿ ಖಾತೆ ತೆರೆಯದೆ ಔಟಾಗಿದ್ದು ಕೇವಲ 10 ಬಾರಿ ಮಾತ್ರ. ಇಷ್ಟೊಂದು ಪಂದ್ಯಗಳ ಬಳಿಕ ಇಷ್ಟು ಕಡಿಮೆ ಶೂನ್ಯಗಳ ದಾಖಲೆ ಹೊಂದಿರುವ ಏಕೈಕ ಬ್ಯಾಟ್ಸ್ ಮನ್ ವಿರಾಟ್ ಕೊಹ್ಲಿಯಾಗಿದ್ದಾರೆ.
2019 ಡಿಸೆಂಬರ್ ಬಳಿಕ ಮೊದಲ ಶೂನ್ಯ..!
ವಿರಾಟ್ ಕೊಹ್ಲಿ ಏಕದಿನ ಕ್ರಿಕೆಟ್ನಲ್ಲಿ ಎಷ್ಟು ಸ್ಥಿರ ಪ್ರದರ್ಶನ ನೀಡುತ್ತಿದ್ದಾರೆ ಅನ್ನುವುದಕ್ಕೆ ಅವರ ರನ್ ಗಳಿಕೆಯೇ ಸಾಕ್ಷಿ. ಪಾರ್ಲ್ ನಲ್ಲಿ ಖಾತೆ ತೆರೆಯದೆ ಔಟಾಗುವುದಕ್ಕೆ ಮುನ್ನ ವಿರಾಟ್ ಡಿಸೆಂಬರ್ 18, 2019ರಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ವಿಶಾಖಪಟ್ಟಣಂನಲ್ಲಿ ಶೂನ್ಯಕ್ಕೆ ಔಟಾಗಿದ್ದರು. ಅದಾದ ಮೇಲೆ ಪಾರ್ಲ್ ಏಕದಿನ ಪಂದ್ಯದಲ್ಲೇ ವಿರಾಟ್ ಶೂನ್ಯಗಳಿಸಿದ್ದರು.
14 ಇನ್ನಿಂಗ್ಸ್ಗಳ ಹಿಂದೆ ಶೂನ್ಯ ಸಂಪಾದನೆ
ಅಂದಹಾಗೇ ವಿರಾಟ್ ಶೂನ್ಯಗಳಿಸಿ 14 ಇನ್ನಿಂಗ್ಸ್ಗಳನ್ನು ಮುಗಿದು ಹೋಗಿವೆ. ಈ 14 ಇನ್ನಿಂಗ್ಸ್ಗಳಲ್ಲಿ ಕೇವಲ 2 ಒಂದಂಕಿ ಇನ್ನಿಂಗ್ಸ್ಗಳು ಮಾತ್ರ ಇದ್ದವು. ಕಳೆದ 14 ಇನ್ನಿಂಗ್ಸ್ಗಳಲ್ಲಿ 9 ಬಾರಿ 50ಕ್ಕಿಂತ ಅಧಿಕ ರನ್ಗಳಿಸಿದ್ದರು ವಿರಾಟ್. ಏಕದಿನ ಕ್ರಿಕೆಟ್ನ ಸಾಮ್ರಾಟ ಪಾರ್ಲ್ನಲ್ಲಿ ಔಟಾಗಿದ್ದು ಅಚ್ಚರಿ ಆದರೂ ಅದರ ಹಿಂದೆಯೂ ವಿಶೇಷತೆ ಇದೆ ಅನ್ನುವುದು ಅವರ ಸ್ಥಿರ ಆಟಕ್ಕೆ ಸಾಕ್ಷಿ
