ಟಾಸ್ ಗೆದ್ದ ಟೀಮ್ ಇಂಡಿಯಾ ಮೊದಲು ದಕ್ಷಿಣ ಆಫ್ರಿಕಾ ತಂಡವನ್ನು ಕಣಕ್ಕಿಳಿಸಿತು. ಜನ್ನೆಮನ್ ಮಲನ್ (1), ನಾಯಕ ತೆಂಬ ಬವುಮಾ (8) ಮತ್ತು ಏಡಿಯನ್ ಮಾರ್ಕ್ ರಾಂ (15) ಬೇಗನೆ ಪವೆಲಿಯನ್ ಸೇರಿಕೊಂಡರು. ಆದರೆ ಕ್ವಿಂಟನ್ ಡಿ ಕಾಕ್ ಮತ್ತು ರಾಸಿ ವಾಂಡರ್ ಡ್ಯುಸನ್ 4ನೇ ವಿಕೆಟ್ಗೆ 144 ರನ್ಗಳ ಜೊತೆಯಾಟ ಕಟ್ಟಿ ತಂಡಕ್ಕೆ ಚೇತರಿಕೆ ನೀಡಿದರು.
ಕ್ವಿಂಟನ್ ಡಿಕಾಕ್ ಅಬ್ಬರದ ಆಟವಾಡಿ ಶತಕ ಸಂಭ್ರಮ ಆಚರಿಸಿಕೊಂಡರು. 12 ಬೌಂಡರಿ ಮತ್ತು 2 ಸಿಕ್ಸರ್ ಸಿಡಿಸಿದ ಡಿ ಕಾಕ್ 124 ರನ್ಗಳಿಸಿ ಔಟಾದರು. ರಾಸಿ ವಾಂಡರ್ ಡ್ಯುಸನ್ 52 ರನ್ ಸಿಡಿಸಿದರೆ, ಡೇವಿಡ್ ಮಿಲ್ಲರ್ 39 ರನ್ ಗಳಿಸಿ ಔಟಾದರು. ಕೊನೆಯಲ್ಲಿ ದಕ್ಷಿಣ ಆಫ್ರಿಕಾ ಫೆಹಲ್ವುಕಾಯೋ, ಕೇಶವ್ ಮಹಾರಜ್ ವಿಕೆಟ್ ಕಳೆದುಕೊಂಡರೂ ಪ್ರಿಟೋರಿಯಸ್ 20 ರನ್ ಸಿಡಿಸಿದರು. ದಕ್ಷಿಣ ಅಫ್ರಿಕಾ 49.5 ಓವರುಗಳಲ್ಲಿ 287 ರನ್ಗಳಿಗೆ ಆಲೌಟ್ ಆಯಿತು.
ಟಾರ್ಗೆಟ್ ಬೆನ್ನು ಹತ್ತಿದ ಟೀಮ್ ಇಂಡಿಯಾ ಮೊದಲು ನಾಯಕ ಕೆ.ಎಲ್ ರಾಹುಲ್ (9) ವಿಕೆಟ್ ಕಳೆದುಕೊಂಡಿತು. ಆದರೆ ಶಿಖರ್ ಧವನ್ ಮತ್ತು ವಿರಾಟ್ ಕೊಹ್ಲಿ 2ನೇ ವಿಕೆಟ್ಗೆ 108 ರನ್ಗಳ ಜೊತೆಯಾಟ ಕಟ್ಟಿದರು. ಧವನ್ 61 ರನ್ಗಳಿಸಿ ನಿರ್ಗಮಿಸಿದರು. ರಿಷಬ್ ಪಂತ್ ಶೂನ್ಯಕ್ಕೆ ನಿರ್ಗಮಿಸಿದರು. 65 ರನ್ಗಳಿಸಿದ ವಿರಾಟ್ ಕೊಹ್ಲಿ ಕೂಡ ಔಟಾದಾಗ ಭಾರತಕ್ಕೆ ಶಾಕ್.
ಇದರ ನಡುವೆ ಶ್ರೇಯಸ್ ಅಯ್ಯರ್ (26) ಮತ್ತು ಸೂರ್ಯಕುಮಾರ್ ಯಾದವ್ (39) ತಂಡವನ್ನು ಗೆಲುವಿನ ಬಳಿಗೆ ಕರೆದುಕೊಂಡು ಹೋಗಲಿಲ್ಲ. ಜಯಂತ್ ಯಾದವ್ ಕೂಡ ಬೇಗನೆ ಔಟಾದರು. ಆದರೆ ದೀಪಕ್ ಚಹರ್ ಉಪನಾಯಕ ಜಸ್ ಪ್ರಿತ್ ಬುಮ್ರಾ ಜೊತೆ ಸೇರಿ ಜೊತೆಯಾಟ ಕಟ್ಟಿದರು. ಅಷ್ಟೇ ಅಲ್ಲ ತಂಡವನ್ನು ಗೆಲುವಿನ ಬಳಿಗೆ ಕರೆದುಕೊಂಡು ಹೋದರು. ಚಹರ್ ಕೇವಲ 34 ಎಸೆತಗಳಲ್ಲಿ 54 ರನ್ ಸಿಡಿಸಿ ನಿರ್ಗಮಿಸಿದರು.
ಕೊನೆಯ ಎರಡು ಓವರುಗಳಲ್ಲಿ ಟೀಮ್ ಇಂಡಿಯಾದ ಜಯಕ್ಕೆ 8 ರನ್ಗಳು ಬೇಕಿತ್ತು. ಆದರೆ 49ನೇ ಓವರ್ನಲ್ಲಿ ಬುಮ್ರಾ ಔಟಾದರು. ಕೊನೆಯ ಓವರ್ನಲ್ಲಿ ಭಾರತದ ಗೆಲುವಿಗೆ 6 ರನ್ಗಳ ಅವಶ್ಯಕತೆ ಇತ್ತು. ಪ್ರಸಿದ್ ಕೃಷ್ಣ ಮೊದಲ ಎಸೆತದಲ್ಲಿ 1 ರನ್ ಪಡೆದು ಚಹಲ್ಗೆ ಸ್ಟ್ರೈಕ್ ನೀಡಿದರು. ಆದರೆ 2ನೇ ಎಸೆತದಲ್ಲಿ ಚಹಲ್ ಔಟಾದರು. ದಕ್ಷಿಣ ಆಫ್ರಿಕಾ ಕೇವಲ 4 ರನ್ಗಳಿಂದ ಪಂದ್ಯ ಗೆದ್ದು ಬೀಗಿತು. ಸರಣಿಯನ್ನು 3-0ಯಿಂದ ಕ್ಲೀನ್ ಸ್ವೀಪ್ ಮಾಡಿತು.
