Rafael Nadal- 324 ನಿಮಿಷಗಳ ಹೋರಾಟ.. ಸೋಲಿನ ಭೀತಿಯಲ್ಲಿ ಗೆಲುವಿನ ಘರ್ಜನೆ.. ಇದು ನಡಾಲ್ ಸ್ಪೆಷಲ್
ಅದು 5 ಗಂಟೆ 24 ನಿಮಿಷಗಳ ಹೋರಾಟ. ಸ್ಪೇನ್ ನ ಗೂಳಿ ರಫೆಲ್ ನಡಾಲ್ ಗೆ 35ರ ಹರೆಯ. ಎದುರಾಳಿ ರಷ್ಯಾದ ಡೇನಿಯಲ್ ಮೆಡ್ವೆಡೇವ್ ಗೆ 25 ವರ್ಷ. ವಯಸ್ಸಿನಲ್ಲಿ ಹತ್ತು ವರ್ಷಗಳ ಅಂತರ. ಡೇನಿಯಲ್ ಬಿಸಿ ರಕ್ತದ ಯುವಕ.. ಆದ್ರೆ ನಡಾಲ್ ಗೆ ದೈಹಿಕ ಸಮಸ್ಯೆ. ಫಿಟ್ ನೆಸ್ ತೊಂದರೆ ಜೊತೆಗೆ ಗಾಯದ ಸಮಸ್ಯೆ. ಆದ್ರೂ ನಡಾಲ್ಗೆ ಪ್ಲಸ್ ಪಾಯಿಂಟ್ ಆಗಿದ್ದು ಅನುಭವ.
ಹೀಗಾಗಿಯೇ ರಫೆಲ್ ನಡಾಲ್ ಅವರು ಆಸ್ಟ್ರೇಲಿಯನ್ ಓಪನ್ ಪ್ರಶಸ್ತಿ ಗೆದ್ದುಕೊಂಡ್ರು. ಅಷ್ಟೇ ಅಲ್ಲ 21 ಗ್ರ್ಯಾಂಡ್ ಸ್ಲ್ಯಾಮ್ ಪ್ರಶಸ್ತಿ ಪಡೆದು 145 ವರ್ಷಗಳ ಗ್ರ್ಯಾಂಡ್ ಸ್ಲ್ಯಾಂ ಇತಿಹಾಸದಲ್ಲೇ ಗರಿಷ್ಠ ಪ್ರಶಸ್ತಿ ಪಡೆದ ಮೊದಲ ಆಟಗಾರನಾಗಿ ಹೊರಹೊಮ್ಮಿದ್ರು.
ಹಾಗೇ ನೋಡಿದ್ರೆ ಈ ಬಾರಿಯ ಆಸ್ಟ್ರೇಲಿಯನ್ ಓಪನ್ ಟೂರ್ನಿಯಲ್ಲಿ ರಫೆಲ್ ನಡಾಲ್ ಪ್ರಶಸ್ತಿ ಗೆಲ್ಲುವುದು ಖಚಿತವಾಗಿತ್ತು. ಯಾಕಂದ್ರೆ ಬದ್ದ ಎದುರಾಳಿಗಳಾದ ರೋಜರ್ ಫೆಡರರ್ ಮತ್ತು ನೊವಾಕ್ ಜಾಕೊವಿಕ್ ಟೂರ್ನಿಯಲ್ಲಿ ಆಡಿರಲಿಲ್ಲ. ಫೆಡರರ್ ಗೆ ಗಾಯದ ಸಮಸ್ಯೆ. ನೊವಾಕ್ ಜಾಕೊವಿಕ್ ಕೋವಿಡ್ ಲಸಿಕೆ ವಿಚಾರದಲ್ಲಿ ಅಧಿಕಪ್ರಸಂಗ ಮಾಡಲು ಹೋಗಿ ಟೂರ್ನಿಯಲ್ಲಿ ಆಡುವ ಅವಕಾಶವನ್ನು ಕಳೆದುಕೊಂಡಿದ್ದರು. ಹೀಗಾಗಿ ರಫೆಲ್ ನಡಾಲ್ ಗೆ ಪ್ರಶಸ್ತಿ ಗೆಲ್ಲುತ್ತಾರೆ ಅನ್ನೋ ನಂಬಿಕೆ ಇತ್ತು. ಅದಕ್ಕೆ ತಕ್ಕಂತೆ ಫೈನಲ್ ಪಂದ್ಯದವರೆಗೂ ಆಡ್ಕೊಂಡು ಬಂದಿದ್ದರು.
ಆದ್ರೆ ರಫೆಲ್ ನಡಾಲ್ ಅವರಿಗೆ ಫೈನಲ್ ಪಂದ್ಯ ಅಷ್ಟೊಂದು ಸುಲಭವಿರಲಿಲ್ಲ. ಎರಡನೇ ಶ್ರೇಯಾಂಕಿತ ರಷ್ಯಾದ ಡೇನಿಯಲ್ ಮೆಡ್ವೆಡೇವ್ ಅವರು ರಫೆಲ್ ಗೆಲುವಿನ ಓಟಕ್ಕೆ ಬ್ರೇಕ್ ಹಾಕುವ ಸೂಚನೆ ನೀಡಿದ್ರು. ಅಲ್ಲದೆ ಮೊದಲ ಎರಡು ಸೆಟ್ ಗಳಲ್ಲಿ ಮುನ್ನಡೆ ಪಡೆದುಕೊಂಡು ಪ್ರಶಸ್ತಿ ಗೆಲ್ಲುತ್ತೇನೆ ಎಂಬ ವಿಶ್ವಾಸದಲ್ಲಿದ್ದರು.
ಆದ್ರೆ ಅಂತಿಮ ಮೂರು ಸೆಟ್ ಗಳಲ್ಲಿ ಸ್ಪೇನ್ ಗೂಳಿಯ ಆರ್ಭಟಕ್ಕೆ ಡೇನಿಯಲ್ ಬತ್ತಳಿಕೆಯಲ್ಲಿ ಯಾವುದೇ ಅಸ್ತ್ರವಿರಲಿಲ್ಲ. 324 ನಿಮಿಷಗಳ ಕಾಲ ಹೋರಾಟ ನಡೆಸಿದ್ದ ರಫೆಲ್ ಕೊನೆಗೂ ಗೆಲುವಿನ ನಗೆ ಬೀರಲು ಯಶಸ್ವಿಯಾದ್ರು. ನಡಾಲ್ ಬೆವರಿಳಿಸಿದ ಡೇನಿಯಲ್ ಅವರಿಗೆ ಕೈಗೆ ಬಂದ ತುತ್ತು ಬಾಯಿಗೆ ಬರಲಿಲ್ಲ ಎಂಬಂತೆ ಪ್ರಶಸ್ತಿ ಗೆಲ್ಲುವ ಅವಕಾಶವನ್ನು ಕಳೆದುಕೊಂಡ್ರು.
ಸುಸ್ತಾಗಿದ್ದ ರಫೆಲ್ ನಡಾಲ್ ಗೆ ದಾಖಲೆ ಪ್ರಶಸ್ತಿಯ ಸಂಭ್ರಮವನ್ನು ಅನುಭವಿಸಲು ಕೂಡ ಎನರ್ಜಿ ಇರಲಿಲ್ಲ. ಅಷ್ಟೊಂದು ಸುಸ್ತಾಗಿದ್ದರು.
ಇದು ನನ್ನ ಪಾಲಿಗೆ ಭಾವನಾತ್ಮಕ ರಾತ್ರಿ. ದೈಹಿಕವಾಗಿ ನಾನು ಬಹಳ ಕುಗ್ಗಿ ಹೋಗಿದ್ದೇನೆ. ಈ ಪಂದ್ಯದ ಅವಿಸ್ಮರಣೀಯ ಘಟನೆಗಳನ್ನು ನನಗೆ ಮೆಲುಕು ಹಾಕಲು ಕೂಡ ನನಗೆ ಸಾಧ್ಯವಿಲ್ಲ. ಯಾಕಂದ್ರೆ ನಾನು ಅಷ್ಟೊಂದು ಸುಸ್ತಾಗಿದ್ದೇನೆ. ಆದ್ರೂ ನಾನು ಹೋರಾಟವನ್ನು ಇಷ್ಟಪಡುತ್ತೇನೆ. ಆದ್ರೆ ಇಂತಹ ಕಾದಾಟಕ್ಕೆ ನಾನು ದೈಹಿಕವಾಗಿ ರೆಡಿಯಾಗಿರಲಿಲ್ಲ. ಯಾಕಂದ್ರೆ ನಾನು ಸರಿಯಾಗಿ ತರಬೇತಿ ಕೂಡ ನಡೆಸಿರಲಿಲ್ಲ. ಆದ್ರೆ ಈ ಪ್ರಶಸ್ತಿ ನನಗೆ ವಿಶೇಷವಾಗಿದೆ. ನನ್ನನ್ನು ನಂಬಿ. ನಾನು ಸೂಪರ್. ಸೂಪರ್ ಆಗಿಯೇ ಸುಸ್ತಾಗಿದ್ದೇನೆ. ನನಗೆ ಸಂಭ್ರಮಿಸಲು ಸಾಧ್ಯವಾಗುತ್ತಿಲ್ಲ ಎಂದು ರಫೆಲ್ ನಡಾಲ್ ಪ್ರಶಸ್ತಿ ಗೆದ್ದ ನಂತರ ಹೇಳಿದ್ರು.
ಅಂದ ಹಾಗೇ ರಫೆಲ್ ನಡಾಲ್ ಅವರು ಆಸ್ಟ್ರೇಲಿಯನ್ ಓಪನ್ ಪ್ರಶಸ್ತಿ ಗೆಲ್ಲುತ್ತಿರುವುದು ಇದು ಎರಡನೇ ಬಾರಿ. ಈ ಹಿಂದೆ 2009ರಲ್ಲಿ ಗೆದ್ದಿದ್ದರು. ಇದೀಗ 13 ವರ್ಷಗಳ ಬಳಿಕ ಬ್ಲ್ಯೂ ಕೋರ್ಟ್ ನಲ್ಲಿ ಪ್ರಶಸ್ತಿ ಗೆದ್ದಿದ್ದಾರೆ. ನಾಲ್ಕು ಬಾರಿ ಫೈನಲ್ ನಲ್ಲಿ ಸೋತಿದ್ದಾರೆ.
ಒಟ್ಟಿನಲ್ಲಿ ರಫೆಲ್ ಟೆನಿಸ್ ಇತಿಹಾಸದಲ್ಲಿ ಹೊಸ ದಾಖಲೆಯನ್ನು ಬರೆದಿದ್ದಾರೆ. ಎರಡು ಆಸ್ಟ್ರೇಲಿಯನ್ ಓಪನ್, 13 ಬಾರಿ ಫ್ರೆಂಚ್ ಓಪನ್, ಎರಡು ಬಾರಿ ವಿಂಬಲ್ಡನ್ ಮತ್ತು ನಾಲ್ಕು ಬಾರಿ ಯುಎಸ್ ಓಪನ್ ಪ್ರಶಸ್ತಿ ಗೆದ್ದುಕೊಂಡಿದ್ದಾರೆ. ಸ್ವಿಜರ್ಲೆಂಡ್ ನ ರೋಜರ್ ಫೆಡರರ್ ಮತ್ತು ಸರ್ಬಿಯಾದ ನೊವಾಕ್ ಜಾಕೊವಿಕ್ ಅವರು ಈಗ 20 ಗ್ರ್ಯಾಂಡ್ ಸ್ಲ್ಯಾಂ ಪ್ರಶಸ್ತಿಗಳನ್ನು ಗೆದ್ದು ಇದೀಗ ಜಂಟಿಯಾಗಿ ಎರಡನೇ ಸ್ಥಾನದಲ್ಲಿದ್ದಾರೆ.
21 ಗ್ರ್ಯಾಂಡ್ ಸ್ಲ್ಯಾಂ ಪ್ರಶಸ್ತಿಗಳ ಒಡೆಯ ರಫೆಲ್ ನಡಾಲ್
ಆಸ್ಟೇಲಿಯನ್ ಓಪನ್ – 2009 ಮತ್ತು 2022
ಫ್ರೆಂಚ್ ಓಪನ್ – 2005, 2006, 2007, 2008, 2010, 2011, 2012, 2013, 2014, 2017, 2018, 2019, 2020
ವಿಂಬಲ್ಡನ್ – 2008, 2010
ಯುಎಸ್ ಓಪನ್ – 2010, 2013, 2017, 2019