ಭಾರತದ ಪ್ರತಿಭಾವಂತ ಬ್ಯಾಡ್ಮಿಂಟನ್ ಆಟಗಾರ್ತಿ ಪಿ.ವಿ.ಸಿಂಧು ಇಂಡೋನೇಷ್ಯಾದ ಬಾಲಿಯಲ್ಲಿ ನಡೆಯುತ್ತಿರುವ ಬಿಡಬ್ಲ್ಯುಎಫ್ ಟೂರ್ ಫೈನಲ್ಸ್ನಲ್ಲಿ ಅಂತಿಮ ಸುತ್ತು ಪ್ರವೇಶಿಸಿದ್ದಾರೆ.
ಶುಕ್ರವಾರ ಥಾಯ್ಲೆಂಡ್ ನ ಪೋರ್ನ್ಪಾವೀ ಚೋಚುವಾಂಗ್ ಕೈಯಲ್ಲಿ ಮೂರು ಗೇಮ್ಗಳ ಹೋರಾಟದಲ್ಲಿ ಸೋಲು ಕಂಡಿದ್ದರೂ ಸಿಂಧು, ಮಹಿಳಾ ವಿಭಾಗದ ಸಿಂಗಲ್ಸ್ `ಎ’ ಗುಂಪಿನಲ್ಲಿ ಎರಡನೇ ಸ್ಥಾನ ಪಡೆದು ಸೆಮಿಫೈನಲ್ಗೆ ಅರ್ಹತೆ ಪಡೆದಿದ್ದರು.
ಶುಕ್ರವಾರ ರಾತ್ರಿ ನಡೆದ ಸೆಮಿಫೈನಲ್ ಪಂದ್ಯದಲ್ಲಿ ಸಿಂಧು, ಎರಡನೇ ಶ್ರೇಯಾಂಕದ ಆಟಗಾರ್ತಿ ಜಪಾನಿನ ಅಕಾನೆ ಯಮಗುಚಿ ಅವರನ್ನು 21-15, 15-21, 21-19ರಿಂದ ಮೂರು ಗೇಮ್ಗಳ ಆಟದಲ್ಲಿ ಸೋಲಿಸಿ ಪ್ರಶಸ್ತಿ ಸುತ್ತು ಪ್ರವೇಶಿಸಿದರು.
ಮೊದಲ ಗೇಮ್ನಲ್ಲಿ ಉತ್ತಮ ಆಟದ ಪ್ರದರ್ಶನ ನೀಡಿದ ಸಿಂಧು, ಗೇಮ್ ಅನ್ನು ಹೆಚ್ಚಿನ ಪರಿಶ್ರಮ”ಲ್ಲದೇ 21-15 ರಿಂದ ಸೋಲಿಸಿ 1-0 ರ ಮುನ್ನಡೆಯೊಂದಿಗೆ ಎರಡನೇ ಗೇಮ್ ಆಡಲು ಸಜ್ಜಾದರು.
ಎರಡನೇ ಗೇಮ್ನಲ್ಲಿ ತಿರುಗೇಟು ನೀಡಿದ ಜಪಾನಿನ ಅಕಾನೆ ಯಮಗುಚಿ, ಗೇಮ್ ಅನ್ನು 21-15 ರಿಂದ ಸೋಲಿಸಿ ಪಂದ್ಯವನ್ನು 1-1ರಿಂದ ಸಮಸ್ಥಿತಿಗೆ ತಂದು ಅಂತಿಮ ಹೋರಾಟಕ್ಕೆ ಸಜ್ಜಾದರು.
ನಿರ್ಣಾಯಕ ಎನಿಸಿದ್ದ ಮೂರನೇ ಗೇಮ್ನಲ್ಲಿ ಉಭಯ ಆಟಗಾರ್ತಿಯರು ಶ್ರೇಷ್ಠ ಪ್ರದರ್ಶನ ನೀಡಿದ್ದರಿಂದ ಪ್ರತಿ ಅಂಕಕ್ಕೂ ಜಿದ್ದಾಜಿದ್ದಿನ ಸೆಣಸಾಟ ನಡೆತು.
ಅಂತಿಮವಾಗಿ ಗೇಮ್ನ್ನು 21-19ರಿಂದ ಗೆದ್ದ ಸಿಂಧು, ಬಿಡಬ್ಲ್ಯುಎಫ್ ಟೂರ್ ಫೈನಲ್ಸ್ನಲ್ಲಿ ಅಂತಿಮ ಸುತ್ತಿನಲ್ಲಿ ಆಡುವ ಅವಕಾಶವನ್ನು ಪಡೆದರು.
ಇನ್ನೊಂದು ಸೆಮಿಫೈನಲ್ ಹೋರಾಟದಲ್ಲಿ ದಕ್ಷಿಣ ಕೊರಿಯಾದ ಅನ್ ಸೆ ಯಂಗ್ 25-23, 21-12 ರಿಂದ ಪರನ್ಪಾವು ಚೌಚುವಾಂಗ್ ಅವರನ್ನು ಪರಾಜಯಗೊಳಿಸಿ ಮುನ್ನಡೆದರು.