ಆಕ್ರಮಣಕಾರಿ ಬೌಲಿಂಗ್‌ ಮೂಲಕ ನ್ಯೂಜಿ಼ಲ್ಯಾಂಡ್‌ ಟೆಸ್ಟ್‌ ತಂಡಕ್ಕೆ ಅದ್ಭುತ ಕಮ್‌ ಬ್ಯಾಕ್‌ ಮಾಡಿದ ವೇಗಿ ಮ್ಯಾಟ್‌ ಹೆನ್ರಿ (23ಕ್ಕೆ 7), ಸೌತ್‌ ಆಫ್ರಿಕಾ ವಿರುದ್ಧದ ಮೊದಲ ಟೆಸ್ಟ್‌ ಪಂದ್ಯದಲ್ಲಿ ಎದುರಾಳಿ ತಂಡವನ್ನ ಕೇವಲ 95 ರನ್‌ಗಳಿಗೆ ಕಟ್ಟಿಹಾಕುವಲ್ಲಿ ಪ್ರಮುಖ ಪಾತ್ರವಹಿಸಿದರು.
ಕ್ರೈಸ್ಟ್‌ ಚರ್ಚ್‌ನಲ್ಲಿ ಗುರುವಾರ ಆರಂಭಗೊಂಡ ಉಭಯ ತಂಡಗಳ ನಡುವಿನ ಮೊದಲ ಟೆಸ್ಟ್‌ ಪಂದ್ಯದಲ್ಲಿ ಟಾಸ್‌ ಗೆದ್ದ ನ್ಯೂಜಿ಼ಲೆಂಡ್‌, ಬೌಲಿಂಗ್‌ ಆಯ್ಕೆ ಮಾಡಿಕೊಂಡಿತು. ನಾಯಕ ನಿರೀಕ್ಷೆಯಂತೆ ಆರಂಭದಿಂದಲೇ ಅಬ್ಬರಿಸಿದ ಕಿವೀಸ್‌ ಬೌಲರ್‌ಗಳು, ಎದುರಾಳಿ ತಂಡದ ಬ್ಯಾಟ್ಸಮನ್‌ಗಳಿಗೆ ಕಡಿವಾಣ ಹಾಕಿದರು. ಪರಿಣಾಮ ಸೌತ್‌ ಆಫ್ರಿಕಾ 49.2 ಓವರ್‌ಗಳಲ್ಲಿ ಕೇವಲ 95 ರನ್‌ಗಳಿಗೆ ಸರ್ವಪತನ ಕಂಡಿತು. ಇದಕ್ಕುತ್ತರವಾಗಿ ಮೊದಲ ಇನ್ನಿಂಗ್ಸ್‌ ಆರಂಭಿಸಿರುವ ನ್ಯೂಜಿ಼ಲ್ಯಾಂಡ್‌ ಮೊದಲ ದಿನದಂತ್ಯಕ್ಕೆ 3 ವಿಕೆಟ್‌ ನಷ್ಟಕ್ಕೆ 116 ರನ್‌ಗಳಿಸುವ ಮೂಲಕ 21 ರನ್‌ಗಳ ಮುನ್ನಡೆ ಕಾಯ್ದುಕೊಂಡಿದೆ.
ಕಿವೀಸ್‌ ಪರ ಅದ್ಭುತ ಬೌಲಿಂಗ್‌ ಪ್ರದರ್ಶಿಸಿದ ಮ್ಯಾಟ್‌ ಹೆನ್ರಿ, ತಮ್ಮ ತವರಿನ ಅಂಗಳದಲ್ಲೇ ಅಬ್ಬರಿಸಿದರು. ಮೊದಲ ಓವರ್‌ನಿಂದಲೇ ಆಕ್ರಮಣಕಾರಿ ದಾಳಿ ನಡೆಸಿದ ಹೆನ್ರಿ, 15 ಓವರ್‌ಗಳಲ್ಲಿ ಕೇವಲ 23 ರನ್‌ ನೀಡಿ 7 ವಿಕೆಟ್‌ಗಳನ್ನು ಪಡೆದು ಮಿಂಚಿದರು. ಆ ಮೂಲಕ ಬಹುದಿನಗಳ ಬಳಿಕ ನ್ಯೂಜಿ಼ಲೆಂಡ್‌ ತಂಡದಲ್ಲಿ ಸ್ಥಾನ ಪಡೆದಿರುವ ಮ್ಯಾಟ್‌ ಹೆನ್ರಿ, ಬಲಿಷ್ಠ ಕಮ್‌ ಬ್ಯಾಕ್‌ ಮಾಡಿದರು. ಉಳಿದಂತೆ ಕಿವೀಸ್‌ ಪರ ಸೌತಿ, ಜೇಮಿಸನ್‌ ಹಾಗೂ ವ್ಯಾಗ್ನರ್ ತಲಾ 1 ವಿಕೆಟ್‌ ಪಡೆದರು.
ಮ್ಯಾಟ್‌ ಹೆನ್ರಿ ಬೌಲಿಂಗ್‌ ದಾಳಿಗೆ ತತ್ತರಿಸಿದ ಸೌತ್‌ ಆಫ್ರಿಕಾ ಪರ ಹಂಝಾ಼(25) ಗರಿಷ್ಠ ಸ್ಕೋರ್‌ ಗಳಿಸಿದರು. ಉಳಿದಂತೆ ಎರ್ವೆ(10), ಮಾರ್ಕ್ರಂ(15) ಹಾಗೂ ವೆರ್ವೇನ್(18) ಎರಡಂಕ್ಕಿ ಮೊತ್ತ ಗಳಿಸಿದ್ದು ಬಿಟ್ಟರೆ, ನಾಯಕ ಎಲ್ಗರ್(1) ಸೇರಿದಂತೆ ಉಳಿದ ಬ್ಯಾಟ್ಸಮನ್‌ಗಳು ಬ್ಯಾಟಿಂಗ್‌ ವೈಫಲ್ಯ ಅನುಭವಿಸಿದರು. ನಂತರ ಮೊದಲ ಇನ್ನಿಂಗ್ಸ್‌ ಆರಂಭಿಸಿದ ನ್ಯೂಜಿ಼ಲ್ಯಾಂಡ್‌ 39 ಓವರ್‌ಗಳಲ್ಲಿ 3 ವಿಕೆಟ್‌ ನಷ್ಟಕ್ಕೆ 116 ರನ್‌ಗಳಿಸಿದ್ದು, ಹೆನ್ರಿ ನಿಕೋಲ್ಸ್(37*) ಹಾಗೂ ವ್ಯಾಗ್ನರ್ (2*) ಎರಡನೇ ದಿನಕ್ಕೆ ಬ್ಯಾಟಿಂಗ್‌ ಕಾಯ್ದುಕೊಂಡಿದ್ದಾರೆ. ಇದಕ್ಕೂ ಕಿವೀಸ್‌ ಪರ ಇನ್ನಿಂಗ್ಸ್‌ ಆರಂಭಿಸಿದ ನಾಯಕ ಲಾಥಂ(18), ವಿಲ್‌ ಯಂಗ್(8) ಉತ್ತಮ ಆರಂಭ ಇನ್ನಿಂಗ್ಸ್‌ ಕಟ್ಟುವಲ್ಲಿ ವಿಫಲರಾದರು. ನಂತರ ಬಂದ ಕಾನ್ವೆ(36) ದೊಡ್ಡ ಇನ್ನಿಂಗ್ಸ್‌ ಕಟ್ಟುವಲ್ಲಿ ಎಡವಿದರು. ಸೌತ್‌ ಆಫ್ರಿಕಾ ಪರ ಓಲಿವಿಯರ್‌ 2 ಹಾಗೂ ಜಾನ್ಸೆನ್‌ 1 ವಿಕೆಟ್‌ ಪಡೆದಿದ್ದಾರೆ.
