IPL 2022 Auction – ಕೋಟ್ಯಾಧಿಪತಿಯಾದ ಎಲೆಕ್ಟ್ರಿಷಿಯನ್ ಮಗ..!
![IPL 2022 Auction - ಕೋಟ್ಯಾಧಿಪತಿಯಾದ ಎಲೆಕ್ಟ್ರಿಷಿಯನ್ ಮಗ..! 2 tilak varma sports karnataka mumbai indians](http://sportskarnataka.com/wp-content/uploads/2022/02/tilak-varma1.jpg)
ಐಪಿಎಲ್.. ಈ ಟೂರ್ನಿಯ ಖದರೇ ಅಂತಹುದ್ದು. ಐಪಿಎಲ್ ಅಂದ್ರೆ ಕೇವಲ ಆಟವಲ್ಲ.. ಹಾಗಂತ ಮನರಂಜನೆಯೂ ಅಲ್ಲ. ಅದನ್ನೆಲ್ಲಾ ದಾಟಿ ಸಾಗುತ್ತಿರುವ ದೇಸಿ ಟಿ-20 ಕ್ರಿಕೆಟ್ ಟೂರ್ನಿ.
ಐಪಿಎಲ್ ಅಂದ್ರೆ ದುಡ್ಡು.. ದುಡ್ಡು ಅಂದ್ರೆ ಐಪಿಎಲ್. ಹಾಗಂತ ಹೇಳುವುದು ತುಂಬಾ ಸುಲಭ. ಅದು ನಿಜ ಕೂಡ. ಆದ್ರೆ ನೆನಪಿಡಿ.. ಐಪಿಎಲ್ ಟೂರ್ನಿ ಕೇವಲ ಸ್ಟಾರ್ ಆಟಗಾರರಿಗೆ ಸೀಮಿತವಾಗಿಲ್ಲ. ಅದೆಷ್ಟೋ ಬಡ ಪ್ರತಿಭಾನ್ವಿತ ಯುವ ಕ್ರಿಕೆಟಿಗರ ಬಾಳನ್ನು ಬಂಗಾರವನ್ನಾಗಿಸಿದ್ದ ಟೂರ್ನಿ ಇಂಡಿಯನ್ ಪ್ರೀಮಿಯರ್ ಲೀಗ್.
ಅಂದ ಹಾಗೇ ಐಪಿಎಲ್ ಟೂರ್ನಿಯಿಂದ ಸ್ಟಾರ್ ಆಟಗಾರರಾಗಿ ಹೊರಹೊಮ್ಮಿರುವ ಅನೇಕ ಆಟಗಾರರು ನಮ್ಮ ಕಣ್ಣ ಮುಂದೆ ಇದ್ದಾರೆ. ಇದಕ್ಕೆ ಈಗ ಮತ್ತೊಂದು ಸೇರ್ಪಡೆ ತಿಲಕ್ ವರ್ಮಾ.
ಹೌದು, ಐಪಿಎಲ್ ಮೆಗಾ ಹರಾಜಿನಲಿ ಹೈದ್ರಬಾದ್ ನ ತಿಲಕ್ ವರ್ಮಾ ಅವರನ್ನು ಮುಂಬೈ ಇಂಡಿಯನ್ಸ್ ತಂಡ 1.7 ಕೋಟಿ ರೂಪಾಯಿ ನೀಡಿ ಖರೀದಿ ಮಾಡಿದೆ.
2020ರ 19 ವಯೋಮಿತಿ ಭಾರತ ವಿಶ್ವಕಪ್ ತಂಡದಲ್ಲಿದ್ದ ತಿಲಕ್ ವರ್ಮಾ ಮೂರು ವರ್ಷಗಳ ಹಿಂದೆ ರಣಜಿ ಟೂರ್ನಿಯಲ್ಲಿ ಅಡಿದ್ದರು. ಆ ನಂತರ ವಿಜಯ ಹಜಾರೆ, ಸೈಯ್ಯದ್ ಮುಷ್ತಾಕ್ ಆಲಿ ಟೂರ್ನಿಯಲ್ಲೂ ಆಡಿದ್ದಾರೆ. ಬ್ಯಾಟಿಂಗ್ ಜೊತೆಗೆ ಬೌಲಿಂಗ್ ಕೂಡ ಮಾಡುವ ತಿಲಕ್ ವರ್ಮಾಗೆ ಈ ಬಾರಿಯ ಐಪಿಎಲ್ ನಲ್ಲಿ ಭಾರೀ ಬೇಡಿಕೆ ಕೂಡ ಇತ್ತು. ಕೊನೆಗೆ ಮುಂಬೈ ಇಂಡಿಯನ್ಸ್ ಜಿದ್ದಿನಿಂದ ಬಿಡ್ ಮಾಡಿ ತಿಲಕ್ ವರ್ಮಾ ಅವರನ್ನು ತಂಡಕ್ಕೆ ಸೇರಿಸಿಕೊಂಡಿದೆ.
![IPL 2022 Auction - ಕೋಟ್ಯಾಧಿಪತಿಯಾದ ಎಲೆಕ್ಟ್ರಿಷಿಯನ್ ಮಗ..! 4 tilak varma sports karnataka mumbai indians](http://sportskarnataka.com/wp-content/uploads/2022/02/tilka-varma2.jpg)
ಯಾರಿದು ತಿಲಕ್ ವರ್ಮಾ… ?
ತಿಲಕ್ ವರ್ಮಾ.. ಹೈದ್ರಬಾದ್ ನವರು. ಬಾಡಿಗೆ ಮನೆಯಲ್ಲಿ ವಾಸ. ಅಪ್ಪ ಎಲೆಕ್ಟ್ರಿಷಿಯನ್. ಆಧುನಿಕ ಕ್ರಿಕೆಟ್ ಜಗತ್ತಿನ ಹೈಫೈ ಕ್ರಿಕೆಟ್ ಅಕಾಡೆಮಿಯಲ್ಲಿ ತರಬೇತಿ ಪಡೆಯುವುದು ಕನಸಿನ ಮಾತಾಗಿತ್ತು. ಆದ್ರೆ ತಿಲಕ್ ವರ್ಮಾ ಅವರಲ್ಲಿ ಅದ್ಭುತ ಪ್ರತಿಭೆ ಇತ್ತು. ಯಾವುದೇ ತರಬೇತಿ ಇಲ್ಲದೇ ಆಡುವ ರೀತಿ, ಕೌಶಲ್ಯಗಳನ್ನು ಸೂಕ್ಷ್ಮವಾಗಿ ಗಮನಿಸಿದವರು ಕೋಚ್ ಸಲಾಮ್ ಬಾಯಶ್.
ಆದ್ರೆ ತಿಲಕ್ ವರ್ಮಾಗೆ ಎದುರಾಗಿದ್ದು ಆರ್ಥಿಕ ಸಮಸ್ಯೆ. ಕ್ರಿಕೆಟ್ ಅಕಾಡೆಮಿ ಸೇರಿಕೊಳ್ಳಲು ದುಡ್ಡಿರಲಿಲ್ಲ. ಆದ್ರೆ ಈ ಹುಡುಗ ಮುಂದೊಂದು ದಿನ ಕ್ರಿಕೆಟ್ ಆಟಗಾರನಾಗುತ್ತಾರೆ ಅನ್ನೋದು ಗುರು ಸಲಾಮ್ ಬಾಯಶ್ ಮನದಲ್ಲಿತ್ತು. ಹಾಗಾಗಿಯೇ ಸಲಾಮ್ ಬಾಯಶ್ ಅವರು ಸ್ವಂತ ದುಡ್ಡಿನಲ್ಲೇ ತಿಲಕ್ ವರ್ಮಾ ಅವರು ಕ್ರಿಕೆಟ್ ಆಟದ ಗ್ಲಾಮರ್ ಗಳನ್ನು ಕಲಿತುಕೊಂಡ್ರು. ನೋಡ ನೋಡುತ್ತಲೇ ಅದ್ಭುತ ಆಟಗಾರನಾಗುವ ಸೂಚನೆಯನ್ನು ಕೂಡ ನೀಡಿದ್ದರು.
ಬಾಡಿಗೆ ಮನೆಯಲ್ಲಿದ್ದ ತಿಲಕ್ ವರ್ಮಾ ಅವರ ತಂದೆ ನಂಬೂರಿ ನಾಗರಾಜು ಅವರಿಗೆ ಈಗ ಖುಷಿಯಲ್ಲಿ ಮಾತನಾಡಲು ಆಗುತ್ತಿಲ್ಲ. ನನ್ನ ಮಗನ ಕ್ರಿಕೆಟ್ ಯಶಸ್ಸಿನ ಹಿಂದೆ ನನಗಿಂತ ಸಲಾಮ್ ಬಾಯಶ್ ಅವರದ್ದು.
ಕೋವಿಡ್ ಸಮಯದಲ್ಲಿ ತಿಲಕ್ ವರ್ಮಾ ಕುಟುಂಬ ಪಟ್ಟ ಕಷ್ಟ ಅಷ್ಟಿಷ್ಟಲ್ಲ. ಆದ್ರೂ ಕೋಚ್ ಮತ್ತು ಮನೆಯವರು ತಿಲಕ್ ಕ್ರಿಕೆಟ್ ಆಟಕ್ಕೆ ಒಂಚೂರು ದಕ್ಕೆಯಾಗದಂತೆ ನೋಡಿಕೊಂಡ್ರು.
ತಿಲಕ್ ವರ್ಮಾ ಪಟ್ಟ ಶ್ರಮಕ್ಕೆ ಈಗ ಪ್ರತಿಫಲ ಸಿಕ್ಕಿದೆ. 20 ಲಕ್ಷ ಮೂಲ ಬೆಲೆಯನ್ನು ಹೊಂದಿದ್ದ ತಿಲಕ್ ವರ್ಮಾ 1.7 ಕೋಟಿಗೆ ಮುಂಬೈ ಇಂಡಿಯನ್ಸ್ ತಂಡಕ್ಕೆ ಸೇಲಾದ್ರು. ಸನ್ ರೈಸರ್ಸ್ ಹೈದ್ರಬಾದ್, ಚೆನ್ನೈ ಸೂಪರ್ ಕಿಂಗ್ಸ್, ರಾಜಸ್ತಾನ ರಾಯಲ್ಸ್ ತಂಡಗಳ ಪೈಪೋಟಿಯ ನಡುವೆ ಮುಂಬೈ ಇಂಡಿಯನ್ಸ್ ತಂಡ ತಿಲಕ್ ವರ್ಮಾ ಅವರನ್ನು ಖರೀದಿ ಮಾಡಲು ಯಶಸ್ವಿಯಾಯ್ತು.
ಸದ್ಯ ತಿಲಕ್ ವರ್ಮಾ ಅವರು ಕಟಕ್ ನಲ್ಲಿದ್ದಾರೆ. ಹೈದ್ರಬಾದ್ ರಣಜಿ ತಂಡದಲ್ಲಿದ್ದಾರೆ.
ನನಗೆ ಐಪಿಎಲ್ ಆಡುತ್ತೇನೆ ಅನ್ನೋ ವಿಶ್ವಾಸವಿತ್ತು. ಆದ್ರೆ ಇಷ್ಟೊಂದು ಮೊತ್ತದ ಹಣವನ್ನು ಪಡೆಯುತ್ತೇನೆ ಅಂತ ಕನಸಿನಲ್ಲೂ ಅಂದುಕೊಂಡಿರಲಿಲ್ಲ ಅಂತಾರೆ ತಿಲಕ್ ವರ್ಮಾ
ತಿಲಕ್ ವರ್ಮಾ ಅವರು ಮೂರನೇ ಕ್ರಮಾಂಕದಲ್ಲಿ ಹೆಚ್ಚಾಗಿ ಆಡುತ್ತಾರೆ. ಮುಂಬೈ ಇಂಡಿಯನ್ಸ್ ತಂಡದಲ್ಲಿ ಅವರಿಗೆ ಆಡುವ 11ರ ಬಳಗದಲ್ಲಿ ಅವಕಾಶ ಸಿಕ್ಕಿದ್ರೆ ಖಂಡಿತವಾಗಿಯೂ ಅವಕಾಶವನ್ನು ಬಳಸಿಕೊಳ್ಳುತ್ತಾನೆ ಎಂದು ಕೋಚ್ ಸಲಾಮ್ ಹೇಳ್ತಾರೆ.