2012 ರ ಅಂಡರ್-19 ವಿಶ್ವಕಪ್ ಗೆದ್ದ ಭಾರತ ನಾಯಕ ಉನ್ಮುಕ್ತ್ ಚಂದ್ ಅವರು ಬಾಂಗ್ಲಾದೇಶ ಪ್ರೀಮಿಯರ್ ಲೀಗ್ನಲ್ಲಿ (ಬಿಪಿಎಲ್) ಆಡಲಿದ್ದಾರೆ. ಚಟ್ಟೋಗ್ರಾಮ್ ಚಾಲೆಂಜರ್ಸ್ ತಂಡವು ಪ್ಲೇಯರ್ಸ್ ಡ್ರಾಫ್ಟ್ ಮೂಲಕ ಅವರನ್ನು ತನ್ನ ತಂಡದಲ್ಲಿ ಸೇರಿಸಿಕೊಂಡಿದೆ. ಈ ಮೂಲಕ ಉನ್ಮುಕ್ತ್ ಬಾಂಗ್ಲಾದೇಶದ ಫ್ರಾಂಚೈಸಿ ಲೀಗ್ನ ಭಾಗವಾದ ಮೊದಲ ಭಾರತೀಯ ಆಟಗಾರ ಎನಿಸಿಕೊಂಡಿದ್ದಾರೆ. BPL 6 ಜನವರಿ 2023 ರಿಂದ ಪ್ರಾರಂಭವಾಗುತ್ತದೆ.
ಕಳೆದ ವರ್ಷ ಭಾರತ ತೊರೆದು ಅಮೆರಿಕಕ್ಕೆ ತೆರಳಿದ್ದ ಚಂದ್, ಕಳೆದ ವಾರವೇ ಬಿಪಿಎಲ್ ಆಟಗಾರರ ಡ್ರಾಫ್ಟ್ನಲ್ಲಿ ತಮ್ಮ ಹೆಸರನ್ನು ನೊಂದಾಯಿಸಿದ್ದರು. ಹೆಸರು ಕಳುಹಿಸಿದ ಕೆಲವೇ ದಿನಗಳಲ್ಲಿ ಇವರು ತಂಡ ಸೇರಿಕೊಂಡಿದ್ದಾರೆ.
ಚಟ್ಟೋಗ್ರಾಮ್ ಚಾಲೆಂಜರ್ಸ್ ತಂಡವು ಉನ್ಮುಕ್ತ್ ಅವರನ್ನು ಎರಡನೇ ಸುತ್ತಿನ ವಿದೇಶಿ ಆಟಗಾರರ ಡ್ರಾಫ್ಟ್ನಲ್ಲಿ ಖರೀದಿಸಿತು. ಚಾಲೆಂಜರ್ಸ್ ಮಾಲೀಕ ರಿಫಾತುಝಾಮನ್ ಈ ಬಗ್ಗೆ ಮಾತನಾಡಿದ್ದು, ‘ಅನೇಕ ಅಭಿಮಾನಿಗಳು ಭಾರತೀಯ ಆಟಗಾರರನ್ನು ನೋಡಲು ಕ್ರೀಡಾಂಗಣಕ್ಕೆ ಬರುತ್ತಾರೆ. ಈ ಅಭಿಮಾನಿ ಬಳಗವನ್ನು ಬಳಸಿಕೊಳ್ಳಲು ನಾವು ಭಾರತೀಯ ಆಟಗಾರರನ್ನು ತಂಡಕ್ಕೆ ಸೇರಿಸಿಕೊಂಡಿದ್ದೇವೆ’ ಎಂದಿದ್ದಾರೆ.
BPL ಬಾಂಗ್ಲಾದೇಶದ ಫ್ರಾಂಚೈಸಿ ಕ್ರಿಕೆಟ್ ಲೀಗ್ ಆಗಿದೆ. 2012 ರಿಂದ ಆಡಲಾಗುತ್ತಿರುವ ಲೀಗ್ನ 9 ನೇ ಋತುವು 2023ರ ಜನವರಿ 6 ರಿಂದ ಪ್ರಾರಂಭವಾಗುತ್ತದೆ. ಚಟ್ಟೋಗ್ರಾಮ್ ಚಾಲೆಂಜರ್ಸ್ ಅಲ್ಲದೆ, ಢಾಕಾ ಡಾಮಿನೇಟರ್ಸ್, ಫಾರ್ಚೂನ್ ಬಾರಿಶಾಲ್, ಖುಲ್ನಾ ಟೈಗರ್ಸ್, ಸಿಲ್ಹೆಟ್ ಸ್ಟ್ರೈಕರ್ಸ್ ಮತ್ತು ಕೊಮಿಲ್ಲಾ ವಿಕ್ಟೋರಿಯನ್ಸ್ ತಂಡಗಳು ಸಹ ಲೀಗ್ನಲ್ಲಿ ಆಡಲಿವೆ.
India’s Under-19 World Cup, Captain, Bangladesh Premier League