ಬೆಂಗಳೂರಿನಲ್ಲಿ ನಡೆಯುತ್ತಿರುವ ಪ್ರೊ ಕಬಡ್ಡಿ ಲೀಗ್ ನ ಎಂಟನೇ ಆವೃತ್ತಿಯ 77ನೇ ಪಂದ್ಯದಲ್ಲಿ ಹರಿಯಾಣ ಸ್ಟೀಲರ್ಸ್ 39-39 ರಿಂದ ತೆಲುಗು ಟೈಟಾನ್ಸ್ ವಿರುದ್ಧ ಡ್ರಾ ಸಾಧಿಸಿದ್ದು ಉಭಯ ತಂಡಗಳು ಅಂಕಗಳನ್ನು ಹಂಚಿಕೊಂಡಿವೆ.
ಈ ಪಂದ್ಯದಲ್ಲಿ ಡ್ರಾ ಸಾಧಿಸುವ ಮೂಲಕ ಹರಿಯಾಣ ಟೂರ್ನಿಯಲ್ಲಿ ಮೂರನೇ ಬಾರಿಗೆ ಅಂಕವನ್ನು ಹಂಚಿಕೊಂಡಿದೆ. ಆಡಿದ 14 ಪಂದ್ಯಗಳಲ್ಲಿ 42 ಅಂಕ ಕಲೆ ಹಾಕಿರುವ ಸ್ಟೀಲರ್ಸ್ ಮೂರನೇ ಸ್ಥಾನದಲ್ಲಿದೆ. ಟೈಟಾನ್ಸ್ ಇಷ್ಟೇ ಪಂದ್ಯಗಳಿಂದ 22 ಅಂಕ ಸೇರಿಸಿದ್ದು ಕೊನೆಯ ಸ್ಥಾನದಲ್ಲಿದೆ.
ಮೊದಲಾವಧಿಯ ಆಟದಿಂದಲೂ ಉಭಯ ತಂಡಗಳು ಭರ್ಜರಿ ಆಟದ ಪ್ರದರ್ಶನ ನೀಡಿದವು. ಪರಿಣಾಮ ಸ್ಟೀಲರ್ಸ್ 20-19 ರಿಂದ ಟೈಟಾನ್ಸ್ ವಿರುದ್ಧ ಮುನ್ನಡೆ ಸಾಧಿಸಿತು. ಅಲ್ಲದೆ ರೈಡ್ ನಲ್ಲಿ 12 ಅಂಕ ಕಲೆ ಹಾಕಿದ ಹರಿಯಾಣ ಒಂದು ಬಾರಿ ಆಲೌಟ್ ಆಯಿತು. ಇನ್ನು ಟೈಟಾನ್ಸ್ ಸಹ ಟ್ಯಾಕಲ್ ನಲ್ಲಿ 8 ಅಂಕ ಸೇರಿಸಿದರೆ, ಎದುರಾಳಿ ತಂಡವನ್ನು ಒಂದು ಬಾರಿ ಆಲೌಟ್ ಮಾಡಿತು. ಎರಡನೇ ಅವಧಿಯ ಆಟದಲ್ಲಿ ಹರಿಯಾಣ 19-20 ರಿಂದ ಹಿನ್ನಡೆ ಸಾಧಿಸಿ ಟೈ ಸಾಧಿಸಿತು. ಟೈಟಾನ್ಸ್ ತಂಡ ಟ್ಯಾಕಲ್ ನಲ್ಲಿ ಅಮೋಘ ಪ್ರದರ್ಶನ ನೀಡಿ ಗಮನ ಸೆಳೆಯಿತು.
ಹರಿಯಾಣ ತಂಡದ ಪರ ವಿಕಾಸ್ ಕಂಡೋಲಾ 10, ಟೈಟಾನ್ಸ್ ಪರ ಅಂಕಿತ್ ಬೆನಿವಾಲ್ 10 ಅಂಕವನ್ನು ಕಲೆ ಹಾಕಿ ಮಿಂಚಿದರು.
