ದಕ್ಷಿಣ ಅಫ್ರಿಕಾ ಫೈನಲ್ಗೇರುವ ಫೆವರೀಟ್ ಆಗಿತ್ತು. ಆದರೆ ಹಾಲಿ ಚಾಂಪಿಯನ್ ಇಂಗ್ಲೆಂಡ್ ತನ್ನೆಲ್ಲಾ ಶಕ್ತಿಯನ್ನು ಸಂಘಟಿತ ಆಡದ ಮೇಲೆ ಹಾಕಿತ್ತು. ಸೆಮಿಫೈನಲ್ ಪಂದ್ಯದಲ್ಲಿ ಬಲಿಷ್ಠ ದಕ್ಷಿಣ ಆಫ್ರಿಕಾವನ್ನು ಇಂಗ್ಲೆಂಡ್ 137 ರನ್ಗಳಿಂದ ಮಣಿಸಿತು. ಆಸ್ಟ್ರೇಲಿಯಾ ವಿರುದ್ಧದ ಫೈನಲ್ ಪಂದ್ಯಕ್ಕೆ ಇಂಗ್ಲೆಂಡ್ ಟಿಕೆಟ್ ಪಡೆದುಕೊಂಡಿತು.
ಮೊದಲು ಬ್ಯಾಟಿಂಗ್ ಮಾಡಿದ ಇಂಗ್ಲೆಂಡ್ 77 ರನ್ಗಳಿಗೆ 3 ವಿಕೆಟ್ ಕಳೆದುಕೊಂಡಿತ್ತು. ಟಾಮಿ ಬಿಮೌಂಟ್ (7), ನಾಯಕಿ ಹೀದರ್ ನೈಟ್ (1) ಮತ್ತು ನ್ಯಾಟ್ ಸಿವಿರ್ (15)ರನ್ಗಳಿಸಿ ಔಟಾಗಿದ್ದರು. ಇನ್ನೊಂದು ಕಡೆ ಡ್ಯಾನಿ ವ್ಯಾಟ್ ಬಿರುಸಾಗಿ ಆಡುತ್ತಾ ರನ್ ರೇಟ್ ಕಡಿಮೆ ಆಗದಂತೆ ನೋಡಿಕೊಂಡಿದ್ದರು.
ವ್ಯಾಟ್ಗೆ ಮೊದಲು ಏಮಿ ಜೋನ್ಸ್ (28) ಸಾಥ್ ನೀಡಿದರು. ವ್ಯಾಟ್ ಅರ್ಧಶತಕದ ಸಂಭ್ರಮ ಆಚರಿಸಿಕೊಂಡರೂ ಜೋನ್ಸ್ ಔಟಾದರು. ಈ ಹಂತದಲ್ಲಿ ವ್ಯಾಟ್ಗೆ ಜೊತೆಯಾದ ಸೋಫಿಯಾ ಡಂಕ್ಲಿ 5ನೇ ವಿಕೆಟ್ಗೆ 116 ರನ್ಗಳ ಜೊತೆಯಾಟ ಕಟ್ಟಿ ಇಂಗ್ಲೆಂಡ್ನ ಬೃಹತ್ ಮೊತ್ತಕ್ಕೆ ಕಾರಣವಾದರು. ಅಬ್ಬರಿಸುತ್ತಾ ಸಾಗಿದ ವ್ಯಾಟ್ ಶತಕ ಸಂಭ್ರ ಆಚರಿಸಿದರು. ವ್ಯಾಟ್ 125 ಎಸೆತಗಳಲ್ಲಿ 129 ರನ್ಗಳಿಸಿ ಔಟಾದರು. ಡಂಕ್ಲಿ 60 ರನ್ಗಳ ಕೊಡುಗೆ ನೀಡಿದರು. ಕೊನೆಯಲ್ಲಿ ಸೋಫಿ ಎಕ್ಲಸ್ಟೋನ್ 11 ಎಸೆತಗಳಲ್ಲಿ 24 ರನ್ ಸಿಡಿಸಿದರು. ನಿಗದಿತ 50 ಓವರುಗಳಲ್ಲಿ ಇಂಗ್ಲೆಂಡ್ 8 ವಿಕೆಟ್ ಕಳೆದುಕೊಂಡು 293 ರನ್ಗಳಿಸಿತು.
ಸವಾಲಿನ ಮೊತ್ತ ಬೆನ್ನಟ್ಟಿದ ದಕ್ಷಿಣ ಅಫ್ರಿಕಾ ವಿಕೆಟ್ ಮೇಲೆ ವಿಕೆಟ್ ಕಳೆದುಕೊಂಡಿತು. ವೇಗಿ ಅನ್ಯ ಶ್ರುಬ್ಸೋಲ್ ಡೇಂಜರಸ್ ಆಟಗಾರ್ತಿ ಲಾರ ವೊಲ್ವಾರ್ಡ್ (0) ಮತ್ತು ಲಿಝೆಲ್ ಲಿ (2) ವಿಕೆಟ್ ವಿಕೆಟ್ ಪಡೆದರು. ನಾಯಕಿ ಸುನ್ ಲಸ್ (21) ಕೇಟ್ ಕ್ರಾಸ್ಗೆ ವಿಕೆಟ್ ಒಪ್ಪಿಸಿದರು. ಲಾರಾ ಗೂಡಲ್ (28) ಚಾರ್ಲಿ ಡೀನ್ ಎಸೆತದಲ್ಲಿ ಕ್ಲೀನ್ ಬೌಲ್ಡ್ ಆದರು.
ಎಡಗೈ ಸ್ಪಿನ್ನರ್ ಸೋಫಿಯಾ ಎಕ್ಲಸ್ಟೋನ್ ದಕ್ಷಿಣ ಆಫ್ರಿಕಾದ ಆಟಗಾರ್ತಿಯರನ್ನು ಗಿರಗಿರನೆ ತಿರುಗಿಸಿದರು. ಮರಿಝಾನ್ ಕಾಪ್ (21), ಚೋಲ್ ಟ್ರಯನ್ (3) ಮತ್ತು ಮಿಗ್ನಾನ್ ಡು ಫ್ರಿಝ್ (30) ಎಕ್ಲಸ್ಟೋನ್ಗೆ ಬಲಿಯಾದಾಗ ಇಂಗ್ಲೆಂಡ್ ಜಯ ಖಾತ್ರಿ ಆಗಿತ್ತು. ಕೊನೆಯ ಸರದಿಯ 3 ಆಟಗಾರ್ತಿಯರು ಕೂಡ ಎಕ್ಲಸ್ಟೋನ್ ಸ್ಪಿನ್ ಬಲೆಯನ್ನು ಬೇಧಿಸಲಿಲ್ಲ. ದಕ್ಷಿಣ ಆಫ್ರಿಕಾ 38 ಓವರುಗಳಲ್ಲಿ 156 ರನ್ಗಳಿಗೆ ಆಲೌಟ್ ಆಗಿ 137 ರನ್ಗಳ ಸೋಲನುಭವಿಸಿತು. ಎಕ್ಲಸ್ಟೋನ್ 36 ರನ್ಗಳಿಗೆ 6 ವಿಕೆಟ್ ಪಡೆದು ಮಿಂಚಿದರು. ಸೋಲಿನ ಮೂಲಕ ದಕ್ಷಿಣ ಆಫ್ರಿಕಾ ಟೂರ್ನಿಗೆ ಗುಡ್ ಬೈ ಹೇಳಿದರೆ, ಇಂಗ್ಲೆಂಡ್ ಸತತ 2ನೇ ಬಾರಿಗೆ ಕಪ್ ಎತ್ತುವ ಕನಸು ಕಾಣುತ್ತಿದೆ.
