ಮೊದಲ ಪಂದ್ಯದ ಸೋಲಿನ ಬಳಿಕ ಸಂಘಟಿತ ಪ್ರದರ್ಶನದ ಮೂಲಕ ಸ್ಟ್ರಾಂಗ್‌ ಕಮ್‌ಬ್ಯಾಕ್‌ ಮಾಡಿದ ಇಂಗ್ಲೆಂಡ್‌(England), ಭಾರತದ ವಿರುದ್ಧದ 2ನೇ ODI ಪಂದ್ಯದಲ್ಲಿ 100 ರನ್‌ಗಳ ಭರ್ಜರಿ ಗೆಲುವು ಸಾಧಿಸಿದೆ. ಕ್ರಿಕೆಟ್ ಕಾಶಿ ಲಾರ್ಡ್ಸ್‌(Lords) ಅಂಗಳದಲ್ಲಿ ನಡೆದ ಪಂದ್ಯದಲ್ಲಿ ಅತಿಥೇಯ ಇಂಗ್ಲೆಂಡ್‌ ಆಲ್ರೌಂಡ್‌ ಪ್ರದರ್ಶನ ನೀಡಿತು. ಟಾಸ್‌ ಸೋತು ಮೊದಲ ಬ್ಯಾಟಿಂಗ್‌ ಅವಕಾಶ ಪಡೆದ ಇಂಗ್ಲೆಂಡ್‌, ಬ್ಯಾಟಿಂಗ್‌ ವೈಫಲ್ಯದ ನಡುವೆಯೂ 49 ಓವರ್‌ಗಳಲ್ಲಿ 246 ರನ್‌ಗಳಿಗೆ ಆಲೌಟ್‌ ಆಯಿತು. ಆದರೆ ಈ ಟಾರ್ಗೆಟ್‌ ಬೆನ್ನತ್ತಿದ ಭಾರತ(India) 38.5 ಓವರ್‌ಗಳಲ್ಲಿ 146 ರನ್‌ಗಳಿಗೆ ಸರ್ವಪತನಗೊಂಡಿತು. ಈ ಗೆಲುವಿನೊಂದಿಗೆ ಅತಿಥೇಯ ಇಂಗ್ಲೆಂಡ್‌ ಸರಣಿಯಲ್ಲಿ 1-1ರ ಸಮಬಲ ಸಾಧಿಸಿತು.
ಆಂಗ್ಲರಿಗೆ ಚಹಲ್‌ ಕಮಾಲ್‌:
ಟಾಸ್‌ ಸೋತು ಮೊದಲು ಬ್ಯಾಟ್‌ ಮಾಡಿದ ಇಂಗ್ಲೆಂಡ್‌ಗೆ ಭಾರತದ ಸ್ಪಿನ್‌ ಚಾಣಾಕ್ಷ ಯುಜು಼ವೇಂದ್ರ ಚಹಲ್‌(4/47) ಕಡಿವಾಣ ಹಾಕಿದರು. ಆಂಗ್ಲರ ಪರ ಇನ್ನಿಂಗ್ಸ್‌ ಆರಂಭಿಸಿದ ಜೇಸನ್‌ ರಾಯ್‌(23) ಹಾಗೂ ಜಾನಿ ಬೈರ್ಸ್ಟೋವ್‌(38) ಉಪಯುಕ್ತ ರನ್‌ಗಳಿಸಿದರು. ನಂತರ ಬಂದ ರೂಟ್‌(11), ಸ್ಟೋಕ್ಸ್‌(21) ಹಾಗೂ ಬಟ್ಲರ್‌(4) ಬ್ಯಾಟಿಂಗ್‌ ವೈಫಲ್ಯ ಅನುಭವಿಸಿದರು. ಪರಿಣಾಮ 102ಕ್ಕೆ 5 ವಿಕೆಟ್‌ ಕಳೆದುಕೊಂಡಿದ್ದ ಇಂಗ್ಲೆಂಡ್‌ ಅಲ್ಪಮೊತ್ತಕ್ಕೆ ಕುಸಿಯುವ ಆತಂಕಕ್ಕೆ ಸಿಲುಕಿತ್ತು. ಈ ಹಂತದಲ್ಲಿ ಕಣಕ್ಕಿಳಿದ ಲಿವಿಂಗ್‌ಸ್ಟೋನ್‌(33), ಮೊಯಿನ್‌ ಅಲಿ(47) ಹಾಗೂ ಡೇವಿಡ್‌ ವಿಲ್ಲಿ(41) ಜವಾಬ್ದಾರಿಯುತ ಬ್ಯಾಟಿಂಗ್‌ ಮೂಲಕ ತಂಡಕ್ಕೆ ನೆರವಾದರು. ಇದರ ಪರಿಣಾಮ ಇಂಗ್ಲೆಂಡ್‌ 246 ರನ್‌ಗಳ ಗೌರವಯುತ ಮೊತ್ತ ಕಲೆಹಾಕುವಲ್ಲಿ ಯಶಸ್ವಿಯಾಯಿತು. ಭಾರತದ ಪರ ಹಾರ್ದಿಕ್‌, ಬುಮ್ರಾ ತಲಾ 2 ವಿಕೆಟ್‌ ಪಡೆದರೆ. ಶಮಿ ಹಾಗೂ ಪ್ರಸಿದ್ಧ್‌ ತಲಾ 1 ವಿಕೆಟ್‌ ಪಡೆದರು.
ಭಾರತದ ಕಳಪೆ ಬ್ಯಾಟಿಂಗ್‌:
ಇಂಗ್ಲೆಂಡ್‌ ನೀಡಿದ 247 ರನ್‌ಗಳ ಟಾರ್ಗೆಟ್‌ ಬೆನ್ನತ್ತಿದ ಭಾರತ ಕಳಪೆ ಬ್ಯಾಟಿಂಗ್‌ ಪ್ರದರ್ಶಿಸಿತು. ರೀಸ್‌ ಟಾಪ್ಲಿ(6/24) ಆಕ್ರಮಣಕಾರಿ ಬೌಲಿಂಗ್‌ ದಾಳಿಗೆ ತತ್ತರಿಸಿದ ಭಾರತ, 146ಕ್ಕೆ ಸರ್ವಪತನ ಕಂಡಿತು. ಆರಂಭಿಕರಾಗಿ ಕಣಕ್ಕಿಳಿದ ರೋಹಿತ್‌ ಶರ್ಮ(0) ಹಾಗೂ ಧವನ್‌(9) ಬಹುಬೇಗನೆ ವಿಕೆಟ್‌ ಒಪ್ಪಿಸಿದರೆ. ನಂತರ ಬಂದ ವಿರಾಟ್‌ ಕೊಹ್ಲಿ(16) ಹಾಗೂ ರಿಷಬ್‌ ಪಂತ್(0) ಬೇಜಾವಾಬ್ದಾರಿಯ ಆಟವಾಡಿದರು. ಮಧ್ಯಮ ಕ್ರಮಾಂಕದಲ್ಲಿ ಸೂರ್ಯಕುಮಾರ್‌(27), ಹಾರ್ದಿಕ್‌(29), ಜಡೇಜಾ(29) ಹಾಗೂ ಶಮಿ(23) ರನ್‌ಗಳಿಸಿದ್ದು ಬಿಟ್ಟರೆ, ಕೆಳ ಕ್ರಮಾಂಕದ ಆಟಗಾರರು ಬಂದಷ್ಟೇ ಬೇಗ ಪೆವಿಲಿಯನ್‌ ಸೇರಿದರು. ಇಂಗ್ಲೆಂಡ್‌ ಪರ ಡೇವಿಡ್‌ ವಿಲ್ಲಿ, ಕಾರ್ಸ್‌, ಮೊಯಿನ್‌ ಹಾಗೂ ಲಿವಿಂಗ್‌ಸ್ಟೋನ್‌ ತಲಾ 1 ವಿಕೆಟ್‌ ಪಡೆದರು.
ENG v IND 2nd ODI : ಟಾಪ್‌”ಕ್ಲಾಸ್‌ ಆಟಕ್ಕೆ ಶರಣಾದ ಭಾರತ
