ಐಸಿಸಿ ಮಹಿಳಾ ವಿಶ್ವಕಪ್ನ ಕಟ್ಟಕಡೆಯ ಪಂದ್ಯ ಇದು. ಹಾಲಿ ಚಾಂಪಿಯನ್ ಇಂಗ್ಲೆಂಡ್ ಸತತ 2ನೇ ಬಾರಿ ಕಪ್ ಎತ್ತುವ ತಯಾರಿಯಲ್ಲಿದೆ. ಮಾಜಿ ಚಾಂಪಿಯನ್ ಆಸ್ಟ್ರೇಲಿಯಾ ಇಂಗ್ಲೆಂಡ್ ತಂಡವನ್ನು ಮಣಿಸಿ ವಿಶ್ವವಿಜೇತ ತಂಡವಾಗುವ ಕನಸಿನಲ್ಲಿದೆ. ಹೀಗಾಗಿ ಕ್ರೈಸ್ಟ್ ಚರ್ಚ್ನಲ್ಲಿ ರೋಚಕ ಹೋರಾಟ ಖಚಿತ.
ಆಸ್ಟ್ರೇಲಿಯಾ ಮತ್ತು ಇಂಗ್ಲೆಂಡ್ ತಂಡಗಳ ಫೈನಲ್ ಹಾದಿ ವಿಭಿನ್ನ. ಆಸ್ಟ್ರೇಲಿಯಾ ಸೋಲೇ ಇಲ್ಲದ ತಂಡವಾಗಿ ಫೈನಲ್ಗೆ ಎಂಟ್ರಿಕೊಟ್ಟಿದೆ. ಸೆಮಫೈನಲ್ನಲ್ಲಿ ವೆಸ್ಟ್ಇಂಡೀಸ್ ತಂಡವನ್ನು ಧೂಳೀಪಟ ಮಾಡಿ ಅಂತಿಮ ಪಂದ್ಯಕ್ಕೆ ತಯಾರಿ ಮಾಡಿಕೊಂಡಿದೆ. ಇಂಗ್ಲೆಂಡ್ ಸತತ 3 ಸೋಲಿನೊಂದಿಗೆ ಟೂರ್ನಿ ಆರಂಭಿಸಿತು. ಅದಾದ ಮೇಲೆ ಸತತ 4 ಲೀಗ್ ಪಂದ್ಯಗಳನ್ನು ಗೆದ್ದು ಸೆಮೀಸ್ಗೆ ಎಂಟ್ರಿ ಕೊಟ್ಟಿತ್ತು. ಸೆಮಿಫೈನಲ್ನಲ್ಲಿ ಬಲಿಷ್ಠ ದಕ್ಷಿಣ ಆಫ್ರಿಕಾ ತಂಡಕ್ಕೆ ಮಣ್ಣುಮುಕ್ಕಿಸಿತ್ತು.
ಆಸ್ಟ್ರೇಲಿಯಾ ತಂಡದ ಕಾಂಬಿನೇಷನ್ ಬಗ್ಗೆ ತಲೆನೋವಿಲ್ಲ. ಅಲಿಸಾ ಹೀಲಿ, ರಾಶೆಲ್ ಹೇಯ್ನ್ಸ್ ಸ್ಪೋಟಕ ಆರಂಭ ತಂದುಕೊಡುತ್ತಿದ್ದಾರೆ. ನಾಯಕಿ ಮೆಗ್ ಲ್ಯಾನಿಂಗ್ ಮತ್ತು ಬೆಥ್ ಮೂನಿ ಆಟವೂ ಸುಂದರವಾಗಿದೆ. ಆ್ಯಶ್ಲೆ ಗಾರ್ಡನರ್, ತಾಹಿಲ್ ಮೆಕ್ರಗಾಥ್ ಮತ್ತು ಅನಬೆಲ್ ಸದರ್ಲೆಂಡ್ ಆಲ್ರೌಂಡರ್ ಜಾಗವನ್ನು ಭರ್ತಿಮಾಡಿದ್ದಾರೆ. ಅಲೆನಾ ಕಿಂಗ್ ಮತ್ತು ಜೆಸ್ ಜೊನಾಸನ್ ಸ್ಪಿನ್ ಸ್ಪೆಷಲಿಸ್ಟ್ಗಳು. ಡಾರ್ಸಿ ಬ್ರೌನ್, ಮೆಗ್ಗಾನ್ ಶಟ್ ವೇಗದ ಬೌಲಿಂಗ್ನ ಶಕ್ತಿಗಳು. ಈ ಮಧ್ಯೆ ಆಲ್ರೌಂಡರ್ ಎಲಿಸ್ ಪೆರ್ರಿ ಬ್ಯಾಟಿಂಗ್ ಮಾತ್ರ ಮಾಡಬಹುದು ಅನ್ನುವ ಫಿಟ್ನೆಸ್ ರಿಪೋರ್ಟ್ ಇದೆ. ಆಸ್ಟ್ರೇಲಿಯಾ ಪೆರ್ರಿ ವಿಚಾರದಲ್ಲಿ ಕಾದುನೋಡುವ ತಂತ್ರಮಾಡುತ್ತಿದೆ.
ಇಂಗ್ಲೆಂಡ್ ತಂಡದ ಬ್ಯಾಟಿಂಗ್ ಕೊಂಚ ವೀಕ್ ಆಗಿದೆ. ಡ್ಯಾನಿ ವ್ಯಾಟ್ ಮತ್ತು ಅಲ್ರೌಂಡರ್ ಸೋಫಿಯಾ ಡಂಕ್ಲಿ ಬಿಟ್ಟರೆ ಉಳಿದವರಿಂದ ಸ್ಥಿರ ಪ್ರದರ್ಶನ ಬಂದಿಲ್ಲ. ಟಾಮಿ ಬಿಮೌಂಟ್, ನಾಯಿ ಹೀದರ್ ನೈಟ್ ಮತ್ತು ಅನುಭವಿ ನ್ಯಾಟ್ ಸಿವಿರ್ ಫೈನಲ್ನಲ್ಲಿ ತಂಡದ ಕೈ ಹಿಡಿಯಲೇ ಬೇಕು. ವಿಕೆಟ್ ಕೀಪರ್ ಏಮಿ ಜೋನ್ಸ್ ಆಟವೂ ನಿರ್ಣಾಯಕ. ಕೆಥರಿನ್ ಬ್ರಂಟ್, ಕೇಟ್ ಕ್ರಾಸ್ ಮತ್ತು ಅನ್ರ ಶ್ರುಬ್ಸೋಲ್ ವೇಗದ ಬೌಲಿಂಗ್ನ ಶಕ್ತಿಗಳು. ಚಾರ್ಲಿ ಡೀನ್ ಮತ್ತು ಸೋಫಿಯಾ ಎಕ್ಲಸ್ಟೋನ್ ಸ್ಪಿನ್ ಶಕ್ತಿಗಳು.
ಕ್ರೈಸ್ಟ್ ಚರ್ಚ್ ಪಿಚ್ ಆರಂಭದಲ್ಲಷ್ಟೇ ವೇಗದ ಬೌಲರ್ಗಳಿಗೆ ನೆರವು ನೀಡುತ್ತದೆ. ಆಮೇಲೆ ಬ್ಯಾಟಿಂಗ್ಗೆ ನೆರವು ನೀಡುತ್ತದೆ. ಹೀಗಾಗಿ ಪಂದ್ಯ ತೀವ್ರ ಕುತೂಹಲ ಕೆರಳಿಸಿದೆ.
