16ನೇ ಆವೃತ್ತಿಯ ಐಪಿಎಲ್ ಟೂರ್ನಿಗೆ ಭರ್ಜರಿ ಆರಂಭ ದೊರೆತಿದ್ದು, ಗುಜರಾತ್ ಟೈಟನ್ಸ್ ಹಾಗೂ ಚೆನ್ನೈ ಸೂಪರ್ ಕಿಂಗ್ಸ್ ನಡುವೆ ನಡೆದ ಉದ್ಘಾಟನಾ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ಸ್ ಜಯದ ನಗೆಬೀರುವಲ್ಲಿ ಯಶಸ್ವಿಯಾಯಿತು.
ಅಹ್ಮದಾಬಾದ್ನ ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ನಡೆದ ಮೊದಲ ಪಂದ್ಯದಲ್ಲೇ ಹಲವು ಆಟಗಾರರು ಹೊಸ ಮೈಲುಗಲ್ಲು ತಲುಪುವುದರ ಮೂಲಕ ಗಮನ ಸೆಳೆದರು. ಪ್ರಮುಖವಾಗಿ ಸಿಎಸ್ಕೆ ತಂಡದ ಕ್ಯಾಪ್ಟನ್ ಎಂಎಸ್ ಧೋನಿ, ಆರಂಭಿಕ ಬ್ಯಾಟರ್ ಋತುರಾಜ್ ಗಾಯಕ್ವಾಡ್ ಮತ್ತು ಗುಜರಾತ್ ಟೈಟನ್ಸ್ನ ವೇಗದ ಬೌಲರ್ ಮೊಹಮ್ಮದ್ ಶಮಿ ಹೊಸ ಮೈಲುಗಲ್ಲು ತಲುಪಿದರು.
![IPL 2023: ಮೊದಲ ದಿನವೇ ಹೊಸ ಮೈಲುಗಲ್ಲು ತಲುಪಿದ ಆಟಗಾರರು 3 MSD 1](http://sportskarnataka.com/wp-content/uploads/2023/03/MSD-1-300x225.png)
ಸಿಎಸ್ಕೆ ಪರ 200 ಸಿಕ್ಸ್:
ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಕ್ಯಾಪ್ಟನ್ ಎಂಎಸ್ ಧೋನಿ, ಐಪಿಎಲ್ ಟೂರ್ನಿಯಲ್ಲಿ ಸಿಎಸ್ಕೆ ಪರವಾಗಿ 200ನೇ ಸಿಕ್ಸ್ ದಾಖಲಿಸಿ ಮಿಂಚಿದರು. ಗುಜರಾತ್ ವಿರುದ್ಧದ ಪಂದ್ಯದ ಕೊನೆಯ ಓವರ್ನಲ್ಲಿ ಭರ್ಜರಿ ಸಿಕ್ಸ್ ಸಿಡಿಸಿದ ಧೋನಿ, ಆ ಮೂಲಕ ಸಿಎಸ್ಕೆ ಪರವಾಗಿ 200ನೇ ಸಿಕ್ಸ್ ಬಾರಿಸಿದ ಹೆಗ್ಗಳಿಕೆ ಪಡೆದರು. ಒಟ್ಟಾರೆಯಾಗಿ ಐಪಿಎಲ್ನಲ್ಲಿ ಧೋನಿ 230 ಸಿಕ್ಸ್ ಬಾರಿಸಿದ್ದು, 30 ಸಿಕ್ಸ್ಗಳನ್ನ ರೈಸಿಂಗ್ ಪುಣೆ ಸೂಪರ್ಜೈಂಟ್ಸ್ ಪರವಾಗಿ ದಾಖಲಿಸಿದ್ದಾರೆ.
100 ವಿಕೆಟ್ ಕ್ಲಬ್ ಸೇರಿದ ಶಮಿ:
ಗುಜರಾತ್ ಟೈಟನ್ಸ್ ವೇಗದ ಬೌಲರ್ ಮೊಹಮ್ಮದ್ ಶಮಿ, ಐಪಿಎಲ್ ಟೂರ್ನಿಯಲ್ಲಿ 100 ವಿಕೆಟ್ಗಳ ಕ್ಲಬ್ ಸೇರಿದರು. ಸಿಎಸ್ಕೆ ವಿರುದ್ಧದ ಪಂದ್ಯದಲ್ಲಿ 4 ಓವರ್ಗಳಲ್ಲಿ 29 ರನ್ ನೀಡಿ 2 ವಿಕೆಟ್ ಪಡೆಯುವ ಮೂಲಕ ಶಮಿ ಈ ಸಾಧನೆ ಮಾಡಿದರು. ಇದರೊಂದಿಗೆ ಐಪಿಎಲ್ನಲ್ಲಿ 100 ವಿಕೆಟ್ ಪಡೆದ 14ನೇ ಭಾರತೀಯ ಆಟಗಾರ ಎನಿಸಿದರು.
ಋತುರಾಜ್ ವೇಗದ ಅರ್ಧಶತಕ:
ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಆರಂಭಿಕ ಬ್ಯಾಟರ್ ಋತುರಾಜ್ ಗಾಯಕ್ವಾಡ್, ಮೊದಲ ಪಂದ್ಯದಲ್ಲೇ ಭರ್ಜರಿ ಬ್ಯಾಟಿಂಗ್ ಮೂಲಕ 92 ರನ್ಗಳಿಸಿ ಮಿಂಚಿದರು. ಕೇವಲ 50 ಬಾಲ್ಗಳಲ್ಲಿ 92 ರನ್ಗಳಿಸಿದ ಋತುರಾಜ್, 23 ಬಾಲ್ಗಳಲ್ಲೇ ಅರ್ಧಶತಕ ದಾಖಲಿಸಿ ಅಬ್ಬರಿಸಿದರು. ಆ ಮೂಲಕ ಐಪಿಎಲ್ನಲ್ಲಿ ವೇಗದ ಅರ್ಧಶತಕ ಬಾರಿಸಿದ 6ನೇ ಬ್ಯಾಟರ್ ಎಂಬ ಹೆಗ್ಗಳಿಕೆ ಪಡೆದರು. ಚೆನ್ನೈ ಪರ ಸುರೇಶ್ ರೈನಾ ಕೇವಲ 16 ಬಾಲ್ಗಳಲ್ಲಿ ಅರ್ಧಶತಕ ಬಾರಿಸಿದ್ದು ಈವರೆಗಿನ ದಾಖಲೆಯಾಗಿದೆ.
IPL 2023, Chennai Super Kings, Gujrat Titans, MS Dhoni, Mohammad Shami, ruturaj gaikwad,