ಆರಂಭಿಕ ಬ್ಯಾಟರ್ ಹ್ಯಾರಿ ಬ್ರೂಕ್(100*) ಬೊಂಬಾಟ್ ಶತಕ ಹಾಗೂ ಐಡೆನ್ ಮಾರ್ಕ್ರಂ(50) ಸ್ಪೋಟಕ ಅರ್ಧಶತಕದ ನೆರವಿನಿಂದ ಭರ್ಜರಿ ಬ್ಯಾಟಿಂಗ್ ಪ್ರದರ್ಶಿಸಿದ ಸನ್ರೈಸರ್ಸ್ ಹೈದ್ರಾಬಾದ್ 23 ರನ್ಗಳ ಅಂತರದಿಂದ ಕೊಲ್ಕತ್ತಾ ನೈಟ್ರೈಡರ್ಸ್ ವಿರುದ್ಧ ಗೆದ್ದುಬೀಗಿತು.
ಕೊಲ್ಕತ್ತಾದ ಐತಿಹಾಸಿಕ ಈಡನ್ ಗಾರ್ಡನ್ಸ್ನಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡುವ ಅವಕಾಶ ಪಡೆದ ಸನ್ರೈಸರ್ಸ್ 20 ಓವರ್ಗಳಲ್ಲಿ ಕೇವಲ 4 ವಿಕೆಟ್ ನಷ್ಟಕ್ಕೆ 228 ರನ್ಗಳ ಬೃಹತ್ ಮೊತ್ತ ಕಲೆಹಾಕಿತು. ಈ ಟಾರ್ಗೆಟ್ ಬೆನ್ನತ್ತಿದ ನೈಟ್ರೈಡರ್ಸ್ ನಾಯಕ ನಿತೀಶ್ ರಾಣ(75) ಹಾಗೂ ರಿಂಕು ಸಿಂಗ್(58*) ಹೋರಾಟದ ನಡುವೆಯೂ 20 ಓವರ್ಗಳಲ್ಲಿ 7 ವಿಕೆಟ್ಗೆ 205 ರನ್ಗಳಿಸಲಷ್ಟೇ ಶಕ್ತವಾಯಿತು.
ಬ್ರೂಕ್ ಚೊಚ್ಚಲ ಶತಕ:
ಮೊದಲು ಬ್ಯಾಟ್ ಮಾಡಿದ ಸನ್ರೈಸರ್ಸ್ ಆರಂಭದಲ್ಲೇ ಮಯಂಕ್ ಅಗರ್ವಾಲ್(9) ಹಾಗೂ ರಾಹುಲ್ ತ್ರಿಪಾತಿ(9) ಅವರ ವಿಕೆಟ್ಗಳನ್ನ ಕಳೆದುಕೊಂಡು ಆಘಾತ ಕಂಡಿತು. ಆದರೆ ನಂತರ ಜೊತೆಯಾದ ಹ್ಯಾರಿ ಬ್ರೂಕ್(100* ರನ್, 55 ಬಾಲ್, 12 ಬೌಂಡರಿ, 3 ಸಿಕ್ಸ್) ಹಾಗೂ ಐಡೆನ್ ಮಾರ್ಕ್ರಂ(50 ರನ್, 26 ಬಾಲ್, 2 ಬೌಂಡರಿ, 5 ಸಿಕ್ಸ್) ಕೊಲ್ಕತ್ತಾ ಬೌಲಿಂಗ್ ದಾಳಿಯನ್ನ ಧೂಳಿಪಟ ಮಾಡಿದರು. ಕೊನೆಯವರೆಗೂ ಜವಾಬ್ದಾರಿಯ ಆಟವಾಡಿದ ಬ್ರೂಕ್, ಐಪಿಎಲ್ನಲ್ಲಿ ಚೊಚ್ಚಲ ಶತಕ ದಾಖಲಿಸಿದರೆ. ಮಾರ್ಕ್ರಂ ಅರ್ಧಶತಕ ಸಿಡಿಸಿ ತಂಡಕ್ಕೆ ಆಸರೆಯಾದರು. ಬಳಿಕ ಮಧ್ಯಮ ಕ್ರಮಾಂಕದಲ್ಲಿ ಬಂದ ಅಭಿಷೇಕ್ ಶರ್ಮ(32) ಹಾಗೂ ಕ್ಲಾಸೆನ್(16*) ಬಿರುಸಿನ ಆಟದಿಂದ ತಂಡದ ಮೊತ್ತವನ್ನ 228ಕ್ಕೆ ಏರಿಸಿದರು. ಕೆಕೆಆರ್ ಪರ ಆಂಡ್ರೆ ರಸೆಲ್ 3 ವಿಕೆಟ್ ಪಡೆದು ಮಿಂಚಿದರು.
ರಾಣಾ-ರಿಂಕು ವ್ಯರ್ಥ ಆಟ:
ಹೈದ್ರಾಬಾದ್ ನೀಡಿದ 229 ರನ್ಗಳ ಕಠಿಣ ಸವಾಲು ಬೆನ್ನತ್ತಿದ ಕೊಲ್ಕತ್ತಾ ಬ್ಯಾಟಿಂಗ್ ವೈಫಲ್ಯಕ್ಕೆ ಸಿಲುಕಿತು. ಗುರ್ಬಾಜ್(0), ವೆಂಕಟೇಶ್ ಅಯ್ಯರ್(10), ನರೈನ್(0), ರಸೆಲ್(3) ಹಾಗೂ ಶಾರ್ದೂಲ್(12) ನಿರೀಕ್ಷಿತ ಆಟವಾಡುವಲ್ಲಿ ವಿಫಲವಾದರು. ಆದರೆ ಪ್ರಮುಖ ಬ್ಯಾಟ್ಸ್ಮನ್ಗಳ ವೈಫಲ್ಯದ ನಡುವೆಯೂ ಜವಾಬ್ದಾರಿಯ ಆಟವಾಡಿದ ನಾಯಕ ನಿತೀಶ್ ರಾಣ(75 ರನ್, 41 ಬಾಲ್, 5 ಬೌಂಡರಿ, 6 ಸಿಕ್ಸ್) ಹಾಗೂ ರಿಂಕು ಸಿಂಗ್(58* ರನ್, 31 ಬಾಲ್, 4 ಬೌಂಡರಿ, 4 ಸಿಕ್ಸ್) ತಂಡದ ಗೆಲುವಿಗಾಗಿ ಕೊನೆಯ ಹಂತದವರೆಗೂ ಹೋರಾಡಿದರು ಪ್ರಯೋಜನವಾಗಲಿಲ್ಲ. ಪರಿಣಾಮ ಕೆಕೆಆರ್ 20 ಓವರ್ಗಳಿಗೆ 205/7 ರನ್ಗಳಿಗೆ ತನ್ನ ಹೋರಾಟ ನಿಲ್ಲಿಸಿತು. ಹೈದ್ರಾಬಾದ್ ಪರ ಜಾನ್ಸೆನ್ ಹಾಗೂ ಮಾರ್ಕಂಡೆ ತಲಾ 2 ವಿಕೆಟ್ ಪಡೆದರೆ, ಭುವನೇಶ್ವರ್, ನಟರಾಜನ್ ಮತ್ತು ಮಲ್ಲಿಕ್ ತಲಾ 1 ವಿಕೆಟ್ ಪಡೆದುಕೊಂಡರು.
ಸ್ಪೋಟಕ ಬ್ಯಾಟಿಂಗ್ ಮೂಲಕ ಐಪಿಎಲ್ನಲ್ಲಿ ಚೊಚ್ಚಲ ಶತಕ ಸಿಡಿಸಿ ಸನ್ರೈಸರ್ಸ್ ಗೆಲುವಿಗೆ ಕಾರಣವಾದ ಇಂಗ್ಲೆಂಡ್ನ ಹ್ಯಾರಿ ಬ್ರೂಕ್ ನಿರೀಕ್ಷೆಯಂತೆ ಪಂದ್ಯ ಶ್ರೇಷ್ಠ ಪ್ರಶಸ್ತಿ ಪಡೆದುಕೊಂಡರು.
IPL 2023, Kolkata Knight Riders, Sunrisers Hyderabad, Harry Brook, Sports Karnataka