ಅಬುಧಾಬಿಯಲ್ಲಿ ಆಸ್ಟ್ರೇಲಿಯಾ ಕಣಕ್ಕಿಳಿಯುವ ಮುನ್ನ ಎಲ್ಲವನ್ನೂ ಪ್ಲಾನ್ ಮಾಡಿಕೊಂಡಿತು. ಕೇವಲ ಗೆಲುವು ಮಾತ್ರವಲ್ಲ, ಭರ್ಜರಿ ಗೆಲುವಿನ ಲೆಕ್ಕಾಚಾರ ಹಾಕಿಕೊಂಡಿತ್ತು. ಅದನ್ನು ವೆಸ್ಟ್ಇಂಡೀಸ್ ವಿರುದ್ಧ ಅಪ್ಲೈ ಮಾಡಿ ಪಂದ್ಯವನ್ನು ಭರ್ಜರಿಯಾಗಿ ಗೆದ್ದು ಬೀಗಿತು. ಅಷ್ಟೇ ಅಲ್ಲ ನೆಟ್ ರನ್ರೇಟ್ನಲ್ಲಿ ದಕ್ಷಿಣ ಆಫ್ರಿಕಾಗಿಂತ ಮುಂದೆ ಸಾಗಿತು.
ಟಾಸ್ ಗೆದ್ದು ಫೀಲ್ಡಿಂಗ್ ಆಯ್ದುಕೊಂಡ ಆಸ್ಟ್ರೇಲಿಯಾ ಲೆಕ್ಕಾಚಾರದಲ್ಲೇ ಆಟ ಆರಂಭಿಸಿತು. ಆದರೆ ಕ್ರಿಸ್ಗೇಲ್ ಮತ್ತು ಎವಿನ್ ಲೆವಿಸ್ 2ನೇ ಓವರ್ನಲ್ಲೇ 19 ರನ್ ದೋಚಿ ಆಸೀಸ್ಗೆ ಶಾಕ್ ನೀಡಿದರು. ಆದರೆ 3ನೇ ಓವರ್ನಲ್ಲಿ ಎಲ್ಲವೂ ಉಲ್ಟಾ ಆಯಿತು. ಕ್ರಿಸ್ ಗೇಲ್ (19 ರನ್) ಕಮಿನ್ಸ್ ಎಸೆತದಲ್ಲಿ ಕ್ಲೀನ್ ಬೌಲ್ಡ್ ಆದರು. ದಾಳಿಗಿಳಿದ ಹ್ಯಾಜಲ್ವುಡ್ ನಿಕೊಲಸ್ ಪೂರ್ (4 ರನ್) ಮತ್ತು ರೋಸ್ಟನ್ ಚೇಸ್ (0 ರನ್) ಒಂದೇ ಓವರ್ನಲ್ಲಿ ಔಟ್ ಮಾಡಿದರು. ಆ್ಯಡಂ ಜಂಪಾ 29 ರನ್ಗಳಿಸಿದ್ದ ಲೆವಿಸ್ ವಿಕೆಟ್ ಪಡೆದರು.
ಶಿಮ್ರನ್ ಹೆಟ್ಮಯರ್ (27 ರನ್) ಮತ್ತು ಕೈರಾನ್ ಪೊಲ್ಲಾರ್ಡ್ (44 ರನ್) ಇನ್ನಿಂಗ್ಸ್ ಬೆಳೆಸಿದರು. ಆದರೆ ಹ್ಯಾಜಲ್ ವುಡ್ ಹೆಟ್ಮಯರ್ ಮತ್ತು ಡ್ವೈನ್ ಬ್ರಾವೋ (10 ರನ್) ವಿಕೆಟ್ ಪಡೆದು ವಿಂಡೀಸ್ ಆಟಕ್ಕೆ ಅಡ್ಡಿಯಾದರು. ಸ್ಟಾರ್ಕ್ ಪೊಲ್ಲಾರ್ಡ್ ವಿಕೆಟ್ ಪಡೆದರು. ಕೊನೆಯಲ್ಲಿ ರಸೆಲ್ 18ರನ್ ಗಳಿಸಿದರೂ ವೆಸ್ಟ್ಇಂಡೀಸ್ 20 ಓವರುಗಳಲ್ಲಿ 7 ವಿಕೆಟ್ ಕಳೆದುಕೊಂಡು 157 ರನ್ ಮಾತ್ರಗಳಿಸಿತ್ತು. ಹ್ಯಾಜಲ್ವುಡ್ 4 ವಿಕೆಟ್ ಪಡೆದು ಮಿಂಚಿದರು.
ಅಬ್ಬರದ ಚೇಸಿಂಗ್ ಮಾಡಬೇಕು ಅಂತ ಆಸ್ಟ್ರೇಲಿಯಾ ಮೊದಲೇ ನಿರ್ಧಾರ ಮಾಡಿಕೊಂಡಿತ್ತು. ಹೀಗಾಗಿ ವಾರ್ನರ್ ಮತ್ತು ಫಿಂಚ್ ವೇಗವಾಗಿ ಆಟ ಆರಂಭಿಸಿದರು. ಫಿಂಚ್ 9 ರನ್ಗಳಿಸಿ ಔಟಾದರು. ಆದರೆ ವಾರ್ನರ್ ಜೊತೆ ಸೇರಿದ ಶಾನ್ ಮಾರ್ಷ್ ವಿಂಡೀಸ್ ಬೌಲರ್ಗಳನ್ನು ದಂಡಿಸಿದರು. ಬೌಂಡರಿ ಸಿಕ್ಸರ್ಗಳ ಸುರಿಮಳೆ ಆಯಿತು. ಆಸ್ಟ್ರೇಲಿಯಾ ಸಂಪೂರ್ಣ ಹಿಡಿತ ಸಾಧಿಸಿತು.
ವಾರ್ನರ್ ಕೇವಲ 56 ಎಸೆತಗಳಲ್ಲಿ 9 ಫೋರ್ ಮತ್ತು 4 ಸಿಕ್ಸರ್ ನೆರವಿನಿಂದ ಅಜೇಯ 89 ರನ್ಗಳಿಸಿ ಗೆಲುವಿನ ರೂವಾರಿ ಆದರು. ಮಾರ್ಷ್ 32 ಎಸೆತಗಳಲ್ಲಿ 5 ಫೋರ್ ಮತ್ತು 2 ಸಿಕ್ಸರ್ ನೆರವಿನಿಂದ 53 ರನ್ಗಳಿಸಿದರು. ಆಸ್ಟ್ರೇಲಿಯಾ 16.2 ಓವರುಗಳಲ್ಲಿ ಗುರಿ ತಲುಪಿ ಗೆಲುವಿನಿಂದ ಬೀಗಿತು. 22 ಎಸೆತಗಳು ಬಾಕಿ ಇರುವಂತೆ ಗೆದ್ದ ಆಸ್ಟ್ರೇಲಿಯಾ ನೆಟ್ ರನ್ರೇಟ್ ಅನ್ನು ಹೆಚ್ಚಿಸಿಕೊಂಡು ಸೆಮಿಫೈನಲ್ ತಲುಪಿತು.