ಟೀಮ್ ಇಂಡಿಯಾ ಕಾನ್ಪುರ ಟೆಸ್ಟ್ನಲ್ಲಿ ಗೆಲುವಿನ ಕನಸು ಕಾಣಲು ಆರಂಭಿಸಿದೆ. ಮೊದಲು ಬ್ಯಾಟಿಂಗ್ನಲ್ಲಿ ಶ್ರೇಯಸ್, ಅಶ್ವಿನ್ ಮತ್ತು ವೃದ್ಧಿಮಾನ್ ಸಾಹಾ ಸಾಹಸದಿಂದ ಚೇತರಿಸಿಕೊಂಡ ಟೀಮ್ ಇಂಡಿಯಾ, ದಿನದ ಕೊನೆಯಲ್ಲಿ ಅಶ್ವಿನ್ ಕಿವೀಸ್ ಓಪನರ್ ವಿಲ್ ಯಂಗ್ ವಿಕೆಟ್ ಪಡೆದು ಟೆಸ್ಟ್ ಗೆಲುವಿನ ಕನಸು ಹುಟ್ಟಿಸಿದ್ದಾರೆ. ನಾಲ್ಕೂ ದಿನ ಸಮಬಲದ ಹೋರಾಟ ನೀಡಿದ ನ್ಯೂಜಿಲೆಂಡ್ ಟೆಸ್ಟ್ ಉಳಿಸಿಕೊಳ್ಳುವ ಲೆಕ್ಕಾಚಾರದಲ್ಲಿದೆ.
4ನೇ ದಿನ ಆಟ ಆರಂಭಿಸಿದ ಟೀಮ್ ಇಂಡಿಯಾ ಸಾಕಷ್ಟು ರನ್ಗಳಿಸುವ ಮೊದಲೇ ವಿಕೆಟ್ ಮೇಲೆ ವಿಕೆಟ್ ಕಳೆದುಕೊಂಡಿತು. ಚೇತೇಶ್ವರ ಪೂಜಾರಾ (22) ಮತ್ತು ಅಜಿಂಕ್ಯಾ ರಹಾನೆ (4) ವಿಕೆಟ್ ಕಳೆದುಕೊಂಡಿತು. ನಿಧಾನವಾಗಿ ಬ್ಯಾಟಿಂಗ್ ಮಾಡುತ್ತಿದ್ದ ಅಗರ್ವಾಲ್ (17) ಹಾಗೂ ಜಡೇಜಾ (0) ಒಂದೇ ಓವರ್ನಲ್ಲಿ ಪವೆಲಿಯನ್ ಸೇರಿಕೊಂಡಾಗ ಟೀಮ್ ಇಂಡಿಯಾ ಒಟ್ಟಾರೆ ಮುನ್ನಡೆ ಕೇವಲ 100 ರನ್ ಮಾತ್ರ ಆಗಿತ್ತು.
ಮೊದಲ ಇನ್ನಿಂಗ್ಸ್ನ ಹೀರೋ ಶ್ರೇಯಸ್ ಅಯ್ಯರ್ ಮತ್ತು ಅಶ್ವಿನ್ ತಂಡದ ರಕ್ಷಣೆಗೆ ನಿಂತರು. 6ನೇ ವಿಕೆಟ್ಗೆ ಈ ಜೋಡಿ 52 ರನ್ಗಳ ಜೊತೆಯಾಟ ಕಟ್ಟಿತು. ಈ ಹಂತದಲ್ಲಿ ಅಶ್ವಿನ್ (32) ಜೇಮಿಸನ್ ಎಸೆತದಲ್ಲಿ ಔಟಾದರು. ಶ್ರೇಯಸ್ ಅಯ್ಯರ್ಗೆ ಜೊತೆಯಾದ ವೃದ್ಧಿಮಾನ್ ಸಾಹಾ ರನ್ಬೇಟೆಯ ಜೊತೆ ಎಚ್ಚರಿಕೆಯ ಆಟ ಆಡಿದರು. ಶ್ರೇಯಸ್ ಎರಡನೇ ಇನ್ನಿಂಗ್ಸ್ನಲ್ಲಿ ಅರ್ಧಶತಕದ ಗಡಿ ದಾಟಿದರು. ಈ ಜೋಡಿ 7ನೇ ವಿಕೆಟ್ಗೆ 64 ರನ್ಗಳ ಜೊತೆಯಾಟ ಆಡಿ ಟೀಮ್ ಇಂಡಿಯಾವನ್ನು ಅಪಾಯದಿಂದ ಕಾಪಾಡಿತು. ಶ್ರೇಯಸ್ 65 ರನ್ಗಳಿಸಿ ಔಟಾದರು.
ದಿನದ ಅಂತಿಮ ಅವಧಿಯಲ್ಲಿ ವೃದ್ಧಿಮಾನ್ ಸಾಹಾ ಮತ್ತು ಅಕ್ಸರ್ ಪಟೇಲ್ ರನ್ಗಳಿಕೆಗೆ ವೇಗ ನೀಡಿದರು. ಸಾಹಾ ಅಜೇಯ 61 ರನ್ಗಳಿಸಿದರೆ ಅಕ್ಸರ್ ಅಜೇಯ 28 ರನ್ಗಳಿಸಿದರು. ಟೀಮ್ ಇಂಡಿಯಾ 2ನೇ ಇನ್ನಿಂಗ್ಸ್ನಲ್ಲಿ 7 ವಿಕೆಟ್ ಕಳೆದುಕೊಂಡು 234 ರನ್ಗಳಿಸಿದ್ದಾಗ ಡಿಕ್ಲೇರ್ ಮಾಡಿಕೊಂಡಿತು. ನ್ಯೂಜಿಲೆಂಡ್ಗೆ ಒಟ್ಟಾರೆ 284 ರನ್ಗಳ ಸವಾಲು ನೀಡಿತು.
ಟೆಸ್ಟ್ ಉಳಿಸಿಕೊಳ್ಳುವ ಲೆಕ್ಕಾಚಾರದಲ್ಲಿ ಆಟಕ್ಕಿಳಿದ ನ್ಯೂಜಿಲೆಂಡ್ ಆರಂಭಿಕರು ಟೀಮ್ ಇಂಡಿಯಾದ ಸ್ಪಿನ್ ಮುಂದೆ ಕಂಗೆಟ್ಟರು. 3ನೇ ಓವರ್ನಲ್ಲಿ ವಿಲ್ ಯಂಗ್ ಅಶ್ವಿನ್ ಎಸೆತದಲ್ಲಿ ಎಲ್ಬಿ ಬಲೆಗೆ ಬಿದ್ದರು. ನೈಟ್ ವಾಚ್ಮನ್ ವಿಲಿಯಂ ಸೊಮರ್ವಿಲ್ಲೆ ಮತ್ತು 2 ರನ್ಗಳಿಸಿರುವ ಟಾಮ್ ಲೇಥಂ ಅಂತಿಮ ದಿನ ಆಟ ಆರಂಭಿಸಲಿದ್ದಾರೆ. ನ್ಯೂಜಿಲೆಂಡ್ 1 ವಿಕೆಟ್ ಕಳೆದುಕೊಂಡು 4 ರನ್ಗಳಿಸಿದೆ.