ಐಸಿಸಿ ಮಹಿಳಾ ವಿಶ್ವಕಪ್ನಲ್ಲಿ ಈಗ ಲೆಕ್ಕಾಚಾರದ್ದೇ ಮಾತು. ಅವರು ಗೆದ್ದರೆ ಹೀಗಾಗುತ್ತೆ, ಇವರು ಗೆದ್ದರೆ ಇವರು ಔಟ್ ಅನ್ನುವ ಮಾತು ಜೋರಾಗಿದೆ. ಆಸ್ಟ್ರೇಲಿಯಾ ಮತ್ತು ದಕ್ಷಿಣ ಆಫ್ರಿಕಾದ ಸ್ಥಾನ ಸೆಮಿಫೈನಲ್ನಲ್ಲಿ ಗಟ್ಟಿಯಾಗಿದೆ. ಭಾರತ ಮತ್ತು ವೆಸ್ಟ್ಇಂಡೀಸ್ ಸ್ಥಾನ ಡೌಟ್ನಲ್ಲಿದೆ. ಇಂಗ್ಲೆಂಡ್ ಕೊನೆಯ ಎರಡು ಪಂದ್ಯವನ್ನು ಗೆದ್ದರೆ ಅಂತಿಮ ಘಟ್ಟಕ್ಕೆ ಲಗ್ಗೆ ಇಡುತ್ತದೆ. ನ್ಯೂಜಿಲೆಂಡ್ ಎದುರು ಅಸಾಧ್ಯ ಅನ್ನುವ ಆದರೂ ಲೆಕ್ಕಾಚಾರದಲ್ಲಿ ಸಾಧ್ಯವಿರುವ ಆಟವಿದೆ. ಬಾಂಗ್ಲಾ ಮತ್ತು ಪಾಕ್ ತಂಡಕ್ಕೆ ಟೂರ್ನಿಯಲ್ಲಿ 2 ಮ್ಯಾಚ್ ಆಡುವುಷ್ಟೇ ಉಳಿದಿದೆ.
ಪಂದ್ಯ ಗೆಲುವು ಅಂಕ ರನ್ರೇಟ್
-
ಆಸ್ಟ್ರೇಲಿಯಾ 06 06 12 +1.287
-
ದಕ್ಷಿಣ ಆಫ್ರಿಕಾ 05 04 08 +0.092
-
ಭಾರತ 06 03 06 +0.768
-
ವೆಸ್ಟ್ಇಂಡೀಸ್ 06 03 06 -0.885
-
ಇಂಗ್ಲೆಂಡ್ 05 02 04 +0.327
-
ನ್ಯೂಜಿಲೆಂಡ್ 06 02 04 -0.229
-
ಬಾಂಗ್ಲಾದೇಶ 05 01 02 -0.754
-
ಪಾಕಿಸ್ತಾನ 05 01 02 -0.878
ಸೆಮಿಫೈನಲ್ ಲೆಕ್ಕಾಚಾರ:
ಆಸ್ಟ್ರೇಲಿಯಾ ತನ್ನ ಕೊನೆಯ ಪಂದ್ಯವನ್ನು ಬಾಂಗ್ಲಾದೇಶ ವಿರುದ್ಧ ಆಡಲಿದೆ. ಈ ಪಂದ್ಯದ ಫಲಿತಾಂಶ ಅಂಕಪಟ್ಟಿಯ ಮೊದಲ 4 ಸ್ಥಾನಗಳಲ್ಲಿ ಬದಲಾವಣೆ ಮಾಡುವುದಿಲ್ಲ.
ದಕ್ಷಿಣ ಆಫ್ರಿಕಾ ತನ್ನ ಕೊನೆಯ ಎರಡು ಪಂದ್ಯಗಳನ್ನು ವೆಸ್ಟ್ಇಂಡೀಸ್ ಹಾಗೂ ಬಾಂಗ್ಲಾದೇಶ ವಿರುದ್ಧ ಆಡಲಿದೆ. ಒಂದು ವೇಳೆ ವೆಸ್ಟ್ಇಂಡೀಸ್ ಸೋತರೆ ಟೂರ್ನಿಯಿಂದ ಹೊರ ಬಿದ್ದಂತೆ. ಯಾಕಂದರೆ ಇಂಗ್ಲೆಂಡ್ ಬಾಂಗ್ಲಾದೇಶ ಮತ್ತು ಪಾಕ್ ವಿರುದ್ಧದ ಪಂದ್ಯಗಳ ಪೈಕಿ 1 ನ್ನು ಗೆದ್ದರೂ ರನ್ ರೇಟ್ ಆಧಾರದಲ್ಲಿ ಸೆಮಿಫೈನಲ್ ಪ್ರವೇಶಿಸಿದಲಿದೆ.
ಒಂದು ವೇಳೆ ವೆಸ್ಟ್ಇಂಡೀಸ್ ಗೆದ್ದರೆ ಭಾರತ ತನ್ನ ಕೊನೆಯ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಗೆಲ್ಲಬೇಕು. ಇಂಗ್ಲೆಂಡ್ ಪಾಕ್ಮತ್ತು ಬಾಂಗ್ಲಾ ವಿರುದ್ಧ ಗೆದ್ದರೆ ರನ್ ರೇಟ್ ಲೆಕ್ಕಾಚಾರ ಬರುತ್ತದೆ. ಭಾರತ, ದಕ್ಷಿಣ ಆಫ್ರಿಕಾ ಮತ್ತು ಇಂಗ್ಲೆಂಡ್ ರನ್ ರೇಟ್ ಹೆಚ್ಚಿದೆ. ವೆಸ್ಟ್ಇಂಡೀಸ್ ರನ್ ರೇಟ್ ಕಡಿಮೆ ಇದೆ. ಹೀಗಾಗಿ ಮುಂದಿನ ಪಂದ್ಯಗಳಲ್ಲಿ ಸೋಲು ಗೆಲುವಿನ ಜೊತೆ ಅಂತರವೂ ಮುಖ್ಯವಾಗುತ್ತದೆ.
ಆತಿಥೇಯ ನ್ಯೂಜಿಲೆಂಡ್ ತನ್ನ ಕೊನೆಯ ಪಂದ್ಯವನ್ನು ಪಾಕ್ ವಿರುದ್ಧ ಆಡಲಿದೆ. ಮೈನಸ್ ರನ್ ರೇಟ್ ಹೊಂದಿರುವ ಕಿವೀಸ್ 200 ರನ್ಗಳಿಗಿಂತ ಹೆಚ್ಚಿನ ಅಂತರದಲ್ಲಿ ಗೆದ್ದು, ವೆಸ್ಟ್ಇಂಡೀಸ್ ದಕ್ಷಿಣ ಆಫ್ರಿಕಾ ವಿರುದ್ಧ ಮತ್ತು ಇಂಗ್ಲೆಂಡ್ ಮುಂದಿನ 2 ಪಂದ್ಯಗಳನ್ನು ಹೀನಾಯವಾಗಿ ಸೋಲುವಂತೆ ಪ್ರಾರ್ಥನೆ ಮಾಡುತ್ತಿದೆ. ಮೇಲ್ನೋಟಕ್ಕೆ ಇದು ಅಸಾಧ್ಯ.
ಬಾಂಗ್ಲಾದೇಶ ಮತ್ತು ಪಾಕಿಸ್ತಾನದ ಆಟ ಟೂರ್ನಿಯಲ್ಲಿ ಕೊನೆಗೊಂಡಿದೆ. ಮೈನಸ್ ರನ್ ರೇಟ್ ಮತ್ತು ಕಡಿಮೆ ಗೆಲುವು ಈ ತಂಡಗಳ ಹೋರಾಟವನ್ನು ಅಂತ್ಯಗೊಳಿಸಿದೆ.
ಈ ಮಧ್ಯೆ ವೆಸ್ಟ್ ಇಂಡೀಸ್ ಮತ್ತು ಆಫ್ರಿಕಾ ನಡುವಿನ ಪಂದ್ಯ ಮಳೆಯಿಂದ ರದ್ದುಗೊಂಡರೆ ಅಂತಿಮ ಪಂದ್ಯವನ್ನು ಭಾರತ ಗೆಲ್ಲಲೇಬೇಕು. ಒಂದು ವೇಳೆ ಭಾರತ ಮತ್ತು ದಕ್ಷಿಣ ಆಫ್ರಿಕಾ ವಿರುದ್ಧದ ಪಂದ್ಯ ಮಳೆಯಿಂದ ರದ್ದುಗೊಂಡು, ಇಂಗ್ಲೆಂಡ್ ಉಳಿದ 2 ಪಂದ್ಯಗಳನ್ನು ಗೆದ್ದರೆ ಭಾರತ ತವರಿಗೆ ಮರಳುವುದು ಗ್ಯಾರೆಂಟಿ.
ಒಟ್ಟಿನಲ್ಲಿ ವೆಸ್ಟ್ಇಂಡೀಸ್, ದಕ್ಷಿಣ ಆಫ್ರಿಕಾ ವಿರುದ್ಧದ ಪಂದ್ಯವನ್ನು ಭಾರತ ಗಮನಿಸಲಿದೆ. ಅಷ್ಟೇ ಅಲ್ಲ ಕೆರಿಬಿಯನ್ನರ ಸೋಲಿಗೆ ಸದ್ಯ ಪ್ರಾರ್ಥನೆ ಮಾಡುತ್ತಿದೆ.