ಎಂಟನೇ ಆವೃತ್ತಿಯ ಪ್ರೊ ಕಬಡ್ಡಿ ಲೀಗ್ ನ ಮೊದಲ ಎಲಿಮಿನೇಟರ್ ಪಂದ್ಯದಲ್ಲಿ ಭರ್ಜರಿ ಪ್ರದರ್ಶನ ನೀಡಿರುವ ಯು.ಪಿ ಯೋಧಾ ತಂಡ ಸೆಮಿಫೈನಲ್ಸ್ ಪ್ರವೇಶಿಸಿದೆ.
ಸೋಮವಾರ ನಡೆದ ಮೊದಲ ಎಲಿಮಿನೇಟರ್ ಪಂದ್ಯದಲ್ಲಿ ಪುಣೇರಿ ನಿರಾಸೆ ಕಂಡಿದೆ. ಪಂದ್ಯದಲ್ಲಿ ಸೊಗಸಾದ ಪ್ರದರ್ಶನ ನೀಡಿದ ಯು.ಪಿ ಮುಂದಿನ ಹಂತಕ್ಕೆ ಸುಲಭವಾಗಿ ಅರ್ಹತೆ ಪಡೆದಿದೆ. ಯೋಧಾ ತಂಡ ಬುಧವಾರ ನಡೆಯಲಿರುವ ಮೊದಲ ಸೆಮಿಫೈನಲ್ಸ್ ಪಂದ್ಯದಲ್ಲಿ ಮಾಜಿ ಚಾಂಪಿಯನ್ ಪಾಟ್ನಾ ಪೈರೇಟ್ಸ್ ತಂಡದ ವಿರುದ್ಧ ಸೆಣಸಾಟ ನಡೆಸಲಿದೆ.
ಮೊದಲಾವಧಿಯ ಆಟದಲ್ಲೇ ಯು.ಪಿ ಸೊಗಸಾದ ಪ್ರದರ್ಶನ ನೀಡಿ ಮುನ್ನಡೆ ಸಾಧಿಸಿತು. ಈ ಅವಧಿಯುಲ್ಲಿ ಯೋಧಾ ತಂಡ 25-17 ರಿಂದ ಪುಣೇರಿ ವಿರುದ್ಧ ಮುನ್ನಡೆಯಿತು. ಮೊದಲ 20 ನಿಮಿಷದಲ್ಲಿ ಯು.ಪಿ ದಾಳಿಯಲ್ಲಿ 15, ಟ್ಯಾಕಲ್ ನಲ್ಲಿ 5 ಅಂಕ ಕಲೆ ಹಾಕಿತು. ಇನ್ನು ಈ ಅವಧಿಯಲ್ಲಿ ಪುಣೇರಿ ಎರಡು ಬಾರಿ ಆಲೌಟ್ ಆದರೆ, ಯು.ಪಿ ಒಂದು ಬಾರಿ ಆಲೌಟ್ ಆಯಿತು. ಪುಣೇರಿ ದಾಳಿಯಲ್ಲಿ 10 ಅಂಕ ಸೇರಿಸಿ ಮಿಂಚಿತು.
ಎರಡನೇ ಅವಧಿಯ ಆಟದಲ್ಲಿ ಎಚ್ಚರಿಕೆಯ ಆಟವಾಡಿದ ಪುಣೇರಿ ಅಂಕಗಳಿಕೆ ಹಿಗ್ಗಿಸುವಲ್ಲಿ ಪ್ರಯತ್ನಿಸಿತು. ಆದರೆ ಬೇಕಾದಷ್ಟು ಅಂಕ ದಾಖಲಾಗಾದ ಕಾರಣ ನಿರಾಸೆ ಕಂಡಿತು. ಈ ಅವಧಿಯಲ್ಲಿ ಯು.ಪಿ 17-14 ರಿಂದ ಮುನ್ನಡೆ ಸಾಧಿಸಿತು. ಪುಣೇರಿ ದಾಳಿಯಲ್ಲಿ 11ಅಂಕ ಕಲೆ ಹಾಕಿತು. ಯು.ಪಿ ದಾಳಿಯಲ್ಲಿ 9 ಅಂಕ ಪೇರಿಸಿತು. ಎರಡನೇ ಅವಧಿಯಲ್ಲಿ ಪುಣೇರಿ ಮತ್ತೊಮ್ಮೆ ಆಲೌಟ್ ಆಯಿತು.
ಯು.ಪಿ ಪರ ಪ್ರದೀಪ್ ನರ್ವಾಲ್ 21 ಬಾರಿ ಎದುರಾಳಿ ಕೋರ್ಟ್ ಗೆ ಎಂಟ್ರಿ ನೀಡಿ 17 ಟಚ್ ಹಾಗೂ 1 ಬೋನಸ್ ಅಂಕವನ್ನು ಪಡೆದರು. ಸುರೇಂದ್ರ ಗಿಲ್ ಹಾಗೂ ಸುಮಿತ್ ತಲಾ ಐದು ಅಂಕ ಸೇರಿಸಿದರು. ಮಹತ್ವದ ಪಂದ್ಯದಲ್ಲಿ ಅಸ್ಲಂ ಇನಾಂದಾರ್ 10 ಅಂಕ ಸೇರಿಸಿ ಸೋಲಿನಲ್ಲಿ ಮಿಂಚಿದರು.