ಪಾರ್ಲ್ನಲ್ಲಿ ಭಾರತ ಮತ್ತು ದಕ್ಷಿಣ ಆಫ್ರಿಕಾ ನಡುವಿನ ಏಕದಿನ ಸರಣಿಯ ಮೊದಲ ಪಂದ್ಯ ಆತಿಥೇಯ ದಕ್ಷಿಣ ಆಫ್ರಿಕಾದ ಪಾಲಾಗಿದೆ. ಟೀಮ್ ಇಂಡಿಯಾ ಅಂದುಕೊಂಡಿದ್ದು ಯಾವುದೂ ಸರಿಯಾಗಿ ನಡೆಯಲಿಲ್ಲ. ಶಿಖರ್ ಧವನ್ ಆರಂಭದಲ್ಲಿ ಹಾಗೂ ಲಾರ್ಡ್ ಖ್ಯಾತಿಯ ಶಾರ್ದೂಲ್ ಥಾಕೂರ್ ಅಂತ್ಯದಲ್ಲಿ ಮಿಂಚಿದ್ದು ಬಿಟ್ಟರೆ ಮೊದಲ ಪಂದ್ಯದಲ್ಲಿ ಟೀಮ್ ಇಂಡಿಯಾಕ್ಕೆ ಏನೂ ಸಿಗಲಿಲ್ಲ.
ಟಾಸ್ ಗೆದ್ದ ದಕ್ಷಿಣ ಆಫ್ರಿಕಾ ಮೊದಲು ಬ್ಯಾಟಿಂಗ್ ಆರಿಸಿಕೊಂಡಿತು. ಜನ್ನೆಮನ್ ಮಲನ್ 6 ರನ್ ಮತ್ತು ಕ್ವಿಂಟನ್ ಡಿ ಕಾಕ್ 27 ರನ್ಗಳಿಸಿ ನಿರ್ಗಮಿಸಿದ್ದರು. ಏಡಿಯನ್ ಮಾರ್ಕ್ ರಾಂ ಕೂಡ 6 ರನ್ಗಳಿಸಿದ್ದಾಗ ರನ್ ಔಟ್ ಆಗಿದ್ದರು. ಟೀಮ್ ಇಂಡಿಯಾದ ಕೈಯಲ್ಲಿದ್ದ ಪಂದ್ವಯನ್ನು ನಾಯಕ ಟೆಂಬ ಬವುಮಾ ಮತ್ತು ರಾಸಿ ವಾಂಡರ್ ಡ್ಯುಸನ್ 204 ರನ್ಗಳ ಜೊತೆಯಾಟ ಆಡುವ ಮೂಲಕ ಆತಿಥೇಯರ ಪರ ವಾಲಿಸಿದರು. ಬವುಮಾ 143 ಎಸೆತಗಳಲ್ಲಿ 8 ಬೌಂಡರಿಗಳ ನೆರವಿನಿಂದ 110 ರನ್ಗಳಿಸಿ ಔಟಾದರು.
ರಾಸಿ ವಾಂಡರ್ ಡ್ಯುಸನ್ ಅಬ್ಬರಿಸಿ ಬೊಬ್ಬರಿದರು. 96 ಎಸೆತಗಳಲ್ಲಿ 9 ಬೌಂಡರಿ ಮತ್ತು 4 ಸಿಕ್ಸರ್ ಗಳ ನೆರವಿನಿಂದ ಅಜೇಯ 129 ರನ್ಗಳಿಸಿ ಮಿಂಚಿದರು. ದಕ್ಷಿಣ ಆಫ್ರಿಕಾ 50 ಓವರುಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 296 ರನ್ಗಳಿಸಿತು.
ಚೇಸಿಂಗ್ಗೆ ಹೊರಟ ಟೀಮ್ ಇಂಡಿಯಾಕ್ಕೆ ಮಾರ್ಕ್ ರಾಂ ನಾಯಕ ಕೆ.ಎಲ್ ರಾಹುಲ್ (12) ವಿಕೆಟ್ ಪಡೆಯುವ ಮೂಲಕ ಶಾಕ್ ನೀಡಿದರು. ಶಿಖರ್ ಧವನ್ ಮತ್ತು ವಿರಾಟ್ ಕೊಹ್ಲಿ ನಡುವೆ 92 ರನ್ಗಳ ಜೊತೆಯಾಟ ಬಂದಾಗ ಗೆಲುವಿನ ಕನಸು ಹುಟ್ಟಿಕೊಂಡಿತ್ತು. ಧವನ್ 84 ಎಸೆತಗಳಲ್ಲಿ 79 ರನ್ಗಳಿಸಿ ಔಟಾದರೆ, ವಿರಾಟ್ 63 ಎಸೆತಗಳಲ್ಲಿ 51 ರನ್ಗಳಿಸಿ ಹೊರ ನಡೆದರು.
ಮಧ್ಯಮ ಸರದಿಯಲ್ಲಿ ಟೀಮ್ ಇಂಡಿಯಾ ಕುಸಿತ ಕಂಡಿತು. ಶ್ರೇಯಸ್ ಅಯ್ಯರ್ (17), ರಿಷಬ್ ಪಂತ್ (16), ವೆಂಕಟೇಶ್ ಅಯ್ಯರ್ (2), ರವಿಚಂದ್ರನ್ ಅಶ್ವಿನ್ (7) ಮತ್ತು ಭುವನೇಶ್ವರ್ ಕುಮಾರ್ (4) ಹೆಚ್ಚಿನ ಕೊಡುಗೆ ನೀಡಲಿಲ್ಲ. ಹೀನಾಯ ಸೋಲಿನ ಕಡೆ ಮುಖ ಮಾಡಿದ್ದ ಟೀಮ್ ಇಂಡಿಯಾದ ಮಾನ ಉಳಿಸಿದ್ದು ಲಾರ್ಡ್ ಖ್ಯಾತಿಯ ಶಾರ್ದೂಲ್ ಥಾಕೂರ್. ಶಾರ್ಧೂಲ್ ಕೇವಲ 43 ಎಸೆತಗಳಲ್ಲಿ 5 ಬೌಂಡರಿ ಮತ್ತು 1 ಸಿಕ್ಸರ್ ನೆರವಿನಿಂದ ಅಜೇಯ 50 ರನ್ಗಳಿಸಿದರು. 50 ಓವರುಗಳಲ್ಲಿ ಟೀಮ್ ಇಂಡಿಯಾ 8 ವಿಕೆಟ್ ಕಳೆದುಕೊಂಡು 265 ರನ್ಗಳನ್ನಷ್ಟೇ ಗಳಿಸಿ 31 ರನ್ಗಳ ಸೋಲನುಭವಿಸಿತು. 3 ಪಂದ್ಯಗಳ ಸರಣಿಯಲ್ಲಿ ಟೀಮ್ ಇಂಡಿಯಾ 1-0 ಹಿನ್ನಡೆ ಹೊಂದಿದೆ. ಎರಡನೇ ಪಂದ್ಯವೂ ಪಾರ್ಲ್ ಮೈದಾನದಲ್ಲೇ ನಡೆಯಲಿದೆ.