ವಿಶ್ವ ಕ್ರಿಕೆಟ್‌ನಲ್ಲಿ ಹಲವು ದಾಖಲೆಗಳನ್ನ ಬ್ರೇಕ್‌ ಮಾಡಿರುವ ಟೀಂ ಇಂಡಿಯಾ(Team India)ದ ರನ್‌ ಮಷಿನ್‌ ವಿರಾಟ್‌ ಕೊಹ್ಲಿ(Virat Kohli), ಇದೀಗ ಮತ್ತೊಂದು ದಾಖಲೆಯ ಮೇಲೆ ಕಣ್ಣಿಟ್ಟಿದ್ದಾರೆ.
ತಮ್ಮ ಸರ್ವಶ್ರೇಷ್ಠ ಪ್ರದರ್ಶನದ ಮೂಲಕ ದಾಖಲೆಗಳ ಸರದಾರ ಎನಿಸಿರುವ ಕಿಂಗ್‌ ಕೊಹ್ಲಿ, T20 ಕ್ರಿಕೆಟ್ ವಿಶ್ವಕಪ್‌ ಟೂರ್ನಿಯಲ್ಲಿ ಭಾರತದ ಕ್ರಿಕೆಟ್ ದಿಗ್ಗಜ ಸಚಿನ್‌ ತೆಂಡುಲ್ಕರ್‌(Sachin Tendulkar) ಹೆಸರಿನಲ್ಲಿರುವ ಅಪರೂಪದ ಐಸಿಸಿ ದಾಖಲೆಯನ್ನ ಸರಿಗಟ್ಟುವ ನಿರೀಕ್ಷೆಯಲ್ಲಿದ್ದಾರೆ. ಐಸಿಸಿ ವೈಟ್‌ ಬಾಲ್‌ ಪಂದ್ಯಾವಳಿಯಲ್ಲಿ ಸಚಿನ್‌ ತೆಂಡುಲ್ಕರ್‌ ಹಾಗೂ ವಿರಾಟ್‌ ಕೊಹ್ಲಿ ತಲಾ 23 ಫಿಫ್ಟಿ ಪ್ಲಸ್‌ ಸ್ಕೋರ್‌ ಮಾಡಿದ ದಾಖಲೆ ಹೊಂದಿದ್ದಾರೆ. ಹೀಗಾಗಿ ಆಸ್ಟ್ರೇಲಿಯಾದಲ್ಲಿ ನಡೆಯುತ್ತಿರುವ 2022ರ ICC T20 ವಿಶ್ವಕಪ್‌ ಟೂರ್ನಿಯಲ್ಲಿ ವಿರಾಟ್‌ ಕೊಹ್ಲಿ, ಕೇವಲ ಒಂದು ಪಂದ್ಯದಲ್ಲಿ 50ಕ್ಕಿಂತ ಹೆಚ್ಚು ಸ್ಕೋರ್‌ ಮಾಡಿದರೆ, ಸಚಿನ್‌ ತೆಂಡುಲ್ಕರ್‌ ಹೆಸರಿನಲ್ಲಿರುವ ICC ದಾಖಲೆಯನ್ನ ವಿರಾಟ್‌ ಕೊಹ್ಲಿ, ಸರಿಗಟ್ಟಲಿದ್ದಾರೆ.
ಕ್ರಿಕೆಟ್ ಲೋಕದ ದೇವರೆನಿಸಿರುವ ಸಚಿನ್‌ ತೆಂಡುಲ್ಕರ್‌, ಐಸಿಸಿ ವೈಟ್‌ ಬಾಲ್‌ ಪಂದ್ಯಾವಳಿಗಳಲ್ಲಿ 61 ಪಂದ್ಯಗಳಲ್ಲಿ 23 ಫಿಫ್ಟಿ ಪ್ಲಸ್‌ ಸ್ಕೋರ್‌ ಮಾಡಿದ್ದು, ಇದರಲ್ಲಿ 7 ಶತಕಗಳು ಒಳಗೊಂಡಿದೆ. ಇನ್ನೂ ವಿರಾಟ್‌ ಕೊಹ್ಲಿ ಐಸಿಸಿ ವೈಟ್‌ ಬಾಲ್‌ ಪಂದ್ಯಾವಳಿಗಳಲ್ಲಿ 2 ಶತಕ ಹಾಗೂ 22 ಅರ್ಧಶತಕಗಳನ್ನು ದಾಖಲಿಸಿದ್ದಾರೆ.
ಸಚಿನ್‌ ತೆಂಡುಲ್ಕರ್‌ ಐಸಿಸಿ 50 ಓವರ್‌ಗಳ ಪಂದ್ಯಾವಳಿ ಹಾಗೂ ಐಸಿಸಿ ಚಾಂಪಿಯನ್ಸ್‌ ಟ್ರೋಫಿ ಪಂದ್ಯಾವಳಿಯಲ್ಲಿ ಮಾತ್ರ ಆಡಿದ್ದಾರೆ. ವಿರಾಟ್‌ ಕೊಹ್ಲಿ ಏಕದಿನ ವಿಶ್ವಕಪ್‌, ಚಾಂಪಿಯನ್ಸ್‌ ಟ್ರೋಫಿ ಜೊತೆಗೆ ಟಿ20 ವಿಶ್ವಕಪ್‌ ಟೂರ್ನಿಯಲ್ಲಿ ಸಹ ಆಡಿದ್ದಾರೆ. ಕ್ರಿಕೆಟ್ ಲೋಕದಲ್ಲಿನ ತಮ್ಮ ಜರ್ನಿಯಲ್ಲಿ ಹಲವು ರೆಕಾರ್ಡ್‌ಗಳನ್ನ ಬ್ರೇಕ್‌ ಮಾಡಿರುವ ವಿರಾಟ್‌ ಕೊಹ್ಲಿ, ಐಸಿಸಿ ಸೀಮಿತ ಓವರ್‌ಗಳ ವಿಶ್ವಕಪ್‌ ಪಂದ್ಯಾವಳಿಯಲ್ಲಿ ಹೆಚ್ಚು ಅರ್ಧಶತಕ ದಾಖಲಿಸಿದ ಆಟಗಾರ ಎಂಬ ದಾಖಲೆ ಬರೆಯಲು ಒಂದು ಅರ್ಧಶತಕವಷ್ಟೇ ಬೇಕಾಗಿದೆ.
