ಮಹಿಳಾ ಕ್ರಿಕೆಟರ್ ಆಗಬೇಕಾದರೆ ಎದುರಿಸಿದ ಕಷ್ಟ ಏನು? ಬಾಲ್ಯದಿಂದ ಹಿಡಿದು ವಿಶ್ವಕಪ್ ತನಕ ಮಹಿಳಾ ಕ್ರಿಕೆಟಗರುಗಳ ಮಾಡುವ ತ್ಯಾಗ ಎಂತಹದ್ದು, ಎಲ್ಲವೂ ಇದ್ದರೂ ಏನೂ ಇಲ್ಲದಂತೆ ಇರಬೇಕಾದ ಸ್ಥಿತಿ ಮಹಿಳಾ ಕ್ರಿಕೆಟಿಗರಿಗೆ ಯಾಕಿದೆ ಅನ್ನುವಂತಹ ಪ್ರಶ್ನೆಯೊಂದು ಉದ್ಭವಿಸಿದೆ. ಇದಕ್ಕೆ ಕಾರಣ ಮಿಥಾಲಿ ರಾಜ್ ಬಯೋಪಿಕ್ ನ ಟ್ರೇಲರ್.
ಇತ್ತೀಚೆಗಷ್ಟೇ ಮಿಥಾಲಿ ರಾಜ್ ಅಂತರಾಷ್ಟ್ರೀಯ ಕ್ರಿಕೆಟ್ಗೆ ಗುಡ್ ಬೈ ಹೇಳಿದ್ದು. ಈಗ ಅವರ ಜೀವನದ ಚಿತ್ರಕಥೆ ಬೆಳ್ಳಿ ತೆರೆ ಮೇಲೆ ಬರಲಿದೆ. ಮಿಥಾಲಿ ರಾಜ್ ಅವರ ಜೀವನಾಧಾರಿತ ಚಿತ್ರದ ಹೆಸರು ‘ಶಬ್ಬಾಶ್ ಮಿಥೂ’ ‘ಶಬ್ಬಾಶ್ ಮಿಥು’ ಚಿತ್ರದ ಟ್ರೇಲರ್ ಬಿಡುಗಡೆಯಾಗಿದೆ. ಮಿಥಾಲಿ ರಾಜ್ ಪಾತ್ರವನ್ನು ತಾಪ್ಸಿ ಪನ್ನು ನಿರ್ವಹಿಸಿದ್ದು ಜುಲೈ 15ರಂದು ಮಿಥಾಲಿಯ ಜೀವನ ಚರಿತ್ರೆ ಸಿಲ್ವರ್ ಸ್ಕ್ರೀನ್ನಲ್ಲಿ ಕಾಣಿಸಿಕೊಳ್ಳಲಿದೆ.
ಮಿಥಾಲಿ ರಾಜ್ ತಮ್ಮ ಜೀವನಾಧಾರಿತ ಚಿತ್ರದ ಟ್ರೇಲರ್ ಜತೆಗೆ ”ಒಂದು ಕ್ರೀಡೆ, ಒಂದು ದೇಶ, ಒಂದು ಮಹತ್ವಾಕಾಂಕ್ಷೆ.. ನನ್ನ ಕನಸು..! ತಂಡಕ್ಕೆ ಕೃತಜ್ಞತೆಗಳು ಹಾಗೂ ನನ್ನ ಕಥೆಯನ್ನು ನಿಮ್ಮೆಲ್ಲರ ಜತೆ ಹಂಚಿಕೊಳ್ಳಲು ಉತ್ಸಕಳಾಗಿದ್ದೇನೆ” ಎಂದು ಬರೆದುಕೊಂಡಿದ್ದಾರೆ.
39 ವರ್ಷದ ಮಿಥಾಲಿ ರಾಜ್ 23 ವರ್ಷಗಳ ಕಾಲ ಅಂತರಾಷ್ಟ್ರೀಯ ಕ್ರಿಕೆಟ್ ಆಡಿದ್ದರು. ಭಾರತದ ಪಾಲಿನ ಮಹಿಳಾ ಸಚಿನ್ ಎಂದೇ ಅವರನ್ನು ಗುರುತಿಸಲಾಗಿತ್ತು. 232 ಏಕದಿನ ಪಂದ್ಯಗಳನ್ನಾಡಿ 7,805 ರನ್ ಬಾರಿಸಿದ್ದಾರೆ. 64 ಅರ್ಧಶತಕ ಹಾಗೂ 7 ಶತಕಗಳನ್ನು ಸಿಡಿಸಿ ಮಿಂಚಿದ್ದಾರೆ. ಅಂತಾರಾಷ್ಟ್ರೀಯ ಟಿ20 ಪಂದ್ಯಗಳಲ್ಲಿ ಮಿಥಾಲಿ ರಾಜ್ 89 ಬಾರಿ ಕಣಕ್ಕಿಳಿದಿದ್ದರು. 12 ಟೆಸ್ಟ್ ಪಂದ್ಯಗಳನ್ನಾಡಿ ಒಟ್ಟಾರೆ 2,364 ರನ್ ಬಾರಿಸಿದ್ದರು.
