ಟೆಸ್ಟ್ ಸರಣಿಯನ್ನು ಸೋತ ಟೀಮ್ ಇಂಡಿಯಾ ಈಗ ಏಕದಿನ ಸರಣಿಯನ್ನೂ ಕಳೆದುಕೊಳ್ಳುವ ಭೀತಿಯಲ್ಲಿದೆ. ಆದರೆ ಪಾರ್ಲ್ ನಲ್ಲಿ ನಡೆಯುವ 2ನೇ ಏಕದಿನ ಪಂದ್ಯವನ್ನು ಗೆದ್ದರೆ, ಅಂತಿಮ ಏಕದಿನ ಪಂದ್ಯ ಸರಣಿ ವಿಜೇತರನ್ನು ನಿರ್ಧಾರ ಮಾಡಲಿದೆ.
ಮೊದಲ ಏಕದಿನ ಪಂದ್ಯದಲ್ಲಿ ಟೀಮ್ ಇಂಡಿಯಾ ಆರಂಭದಲ್ಲಿ ಮೇಲುಗೈ ಪಡೆದರೂ ನಂತರ ಎಡವಿತು. ಮಧ್ಯಮ ಕ್ರಮಾಂಕದ ಬ್ಯಾಟಿಂಗ್ ವೈಫಲ್ಯ ತಂಡವನ್ನು ಸೋಲಿನ ಕಡೆ ತಳ್ಳಿತು. ಹೀಗಾಗಿ ಟೀಮ್ ಇಂಡಿಯಾ 2ನೇ ಪಂದ್ಯದಲ್ಲಿ ಹೊಸ ಪ್ರಯೋಗ ಮಾಡಬಹುದು. ಶಿಖರ್ ಧವನ್ ಜೊತೆ ರುತುರಾಜ್ ಗಾಯಕ್ವಾಡ್ ರನ್ನು ಆರಂಭಿಕರಾಗಿ ಕಣಕ್ಕಿಳಿಸಿ, ನಾಯಕ ಕೆ.ಎಲ್. ರಾಹುಲ್ ಫಿನಿಷರ್ ಜವಾಬ್ದಾರಿಯನ್ನು ಹೊರಬಹುದು. ಮತ್ತೊಂದು ಕಡೆ ಯಜ್ವೇಂದ್ರ ಚಹಲ್ ಬದಲಿಗೆ ವೆಂಕಟೇಶ್ ಅಯ್ಯರ್ ರನ್ನು ಮುಂದುವರೆಸಿದರೆ ಬ್ಯಾಟಿಂಗ್ ಬಲವಾಗುವ ಜೊತೆ ಬೌಲಿಂಗ್ ಆಯ್ಕೆಯೂ ಸಿಗುತ್ತದೆ. ಫಾಸ್ಟ್ ಬೌಲಿಂಗ್ನಲ್ಲಿ ಮೊಹಮ್ಮದ್ ಸಿರಾಜ್ ಅಥವಾ ದೀಪಕ್ ಚಹರ್ ಭುವನೇಶ್ವರ್ ಕುಮಾರ್ ಜಾಗದಲ್ಲಿ ಆಡಬಹುದು. ಉಳಿದಂತೆ ಹೆಚ್ಚಿನ ಬದಲಾವಣೆ ಕಷ್ಟ.
ಇನ್ನು ದಕ್ಷಿಣ ಆಫ್ರಿಕಾ ತಂಡ ಮೊದಲ ಪಂದ್ಯ ಗೆದ್ದಿರುವುದರಿಂದ ತಂಡದಲ್ಲಿ ಬದಲಾವಣೆ ಮಾಡುವುದು ಕಷ್ಟ. ಆದರೂ ಜನ್ನೆಮನ್ ಮಲನ್, ಕ್ವಿಂಟಾನ್ ಡಿ ಕಾಕ್ ಮತ್ತು ಏಡಿಯನ್ ಮಾರ್ಕ್ ರಾಂ ಬ್ಯಾಟಿಂಗ್ನಲ್ಲಿ ಮಿಂಚಬೇಕಿದೆ. ತೆಂಬ ಬವುಮಾ ಮತ್ತು ರಾಸಿ ವಾಂಡರ್ ಡ್ಯುಸನ್ ಮೊದಲ ಪಂದ್ಯದಲ್ಲಿ ತಂಡವನ್ನು ಗೆಲ್ಲಿಸಿಕೊಟ್ಟಿದ್ದಾರೆ. ಡೇವಿಡ್ ಮಿಲ್ಲರ್, ಆ್ಯಂಡಿ ಫೆಹಲ್ಕುವಾಯೋ ಕೂಡ ಅವಕಾಶ ಸಿಕ್ಕರೆ ಸಿಡಿಯಬಹುದು. ಬೌಲಿಂಗ್ನಲ್ಲೂ ದಕ್ಷಿಣ ಆಫ್ರಿಕಾ ಹೆಚ್ಚು ಚಿಂತೆ ಮಾಡುತ್ತಿಲ್ಲ.
ಪಾರ್ಲ್ ಪಿಚ್ ನಲ್ಲಿ ಬ್ಯಾಟ್ಸ್ ಮನ್ಗಳು ಹೊಂದಿಕೊಂಡರೆ ರನ್ ಗಳಿಸಬಹುದು ಅನ್ನುವುದು ಮೊದಲ ಪಂದ್ಯದಲ್ಲಿ ಗೊತ್ತಾಗಿದೆ. ಹೀಗಾಗಿ ಹೊಂದಾಣಿಕೆಯ ಆಟವೇ ನಿರ್ಣಾಯಕವಾಗಿದೆ.
ಸಂಭಾವ್ಯ ಪ್ಲೇಯಿಂಗ್ 11
ಟೀಮ್ ಇಂಡಿಯಾ
- ಕೆ.ಎಲ್. ರಾಹುಲ್ (ನಾಯಕ), 2. ಶಿಖರ್ ಧವನ್, 3. ವಿರಾಟ್ ಕೊಹ್ಲಿ, 4. ಶ್ರೇಯಸ್ ಅಯ್ಯರ್, 5. ರಿಷಬ್ ಪಂತ್, 6. ಆರ್. ಅಶ್ವಿನ್, 7.ಶಾರ್ದೂಲ್ ಥಾಕೂರ್, 8. ಜಸ್ ಪ್ರಿತ್ ಬುಮ್ರಾ, 9. ದೀಪಕ್ ಚಹರ್/ ಮೊಹಮ್ಮದ್ ಸಿರಾಜ್/ ಭುವನೇಶ್ವರ್ ಕುಮಾರ್, 10. ರುತುರಾಜ್ ಗಾಯಕ್ವಾಡ್/ ವೆಂಕಟೇಶ್ ಅಯ್ಯರ್, 11. ಚಹಲ್
ದಕ್ಷಿಣ ಆಫ್ರಿಕಾ
- ಕ್ವಿಂಟಾನ್ ಡಿ ಕಾಕ್, 2. ಜನ್ನೆಮನ್ ಮಲನ್, 3. ಏಡಿಯನ್ ಮಾರ್ಕ್ ರಾಂ, 4. ತೆಂಬ ಬವುಮಾ, 5. ರಾಸಿ ವಾಂಡರ್ ಡ್ಯುಸನ್, 6. ಡೇವಿಡ್ ವಿಲ್ಲರ್, 7. ಆ್ಯಂಡಿ ಫೆಹಲ್ಕುವಾಯೊ, 8. ಮಾರ್ಕೋ ಜನ್ಸನ್, 9. ಕೇಶವ್ ಮಹಾರಾಜ್, 10 . ಲುಂಗಿ ಎನ್ಗಿಡಿ, 11. ತಬ್ರೈಜ್ ಶಂಶಿ
