ಆರಂಭಿಕ ಬ್ಯಾಟರ್‌ ಮಿಚೆಲ್‌ ಮಾರ್ಷ್‌(81) ಜವಾಬ್ದಾರಿಯ ಬ್ಯಾಟಿಂಗ್‌ ನಡುವೆಯೂ ಶಮಿ(17/3) ಹಾಗೂ ಸಿರಾಜ್‌(29/3) ಅವರ ಪರಿಣಾಮಕಾರಿ ಬೌಲಿಂಗ್‌ ದಾಳಿಯಿಂದ ಆಸ್ಟ್ರೇಲಿಯಾ ತಂಡವನ್ನ 188 ರನ್‌ಗಳಿಗೆ ಕಟ್ಟಿ ಹಾಕುವಲ್ಲಿ ಟೀಂ ಇಂಡಿಯಾ ಯಶಸ್ವಿಯಾಗಿದ್ದಾರೆ.
ಮುಂಬೈನ ವಾಂಖೆಡೆ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಮೊದಲ ODI ಪಂದ್ಯದಲ್ಲಿ ಟಾಸ್‌ ಗೆದ್ದ ಭಾರತ ಬೌಲಿಂಗ್‌ ಆಯ್ಕೆ ಮಾಡಿಕೊಂಡಿತು. ನಾಯಕನ ನಿರೀಕ್ಷೆಗೆ ತಕ್ಕಂತೆ ಬೌಲಿಂಗ್‌ ದಾಳಿ ನಡೆಸಿದ ಟೀಂ ಇಂಡಿಯಾ 35.4 ಓವರ್‌ಗಳಲ್ಲಿ 188 ರನ್‌ಗಳಿಗೆ ಆಸೀಸ್‌ ತಂಡವನ್ನ ಕಟ್ಟಿಹಾಕಿದೆ. ಪ್ರವಾಸಿ ತಂಡದ ಪರ ಮಿಚೆಲ್‌ ಮಾರ್ಷ್‌(81) ಹೊರತು ಇನ್ನಿತರ ಬ್ಯಾಟರ್‌ಗಳಿಂದ ನಿರೀಕ್ಷಿತ ಪ್ರದರ್ಶನ ಬರಲಿಲ್ಲ.
ಮಾರ್ಷ್‌ ಅರ್ಧಶತಕ:
ಟಾಸ್‌ ಸೋತು ಮೊದಲು ಬ್ಯಾಟ್‌ ಮಾಡಿದ ಆಸ್ಟ್ರೇಲಿಯ ಆರಂಭದಲ್ಲೇ ಟ್ರಾವಿಸ್‌ ಹೆಡ್‌(5) ವಿಕೆಟ್‌ ಕಳೆದುಕೊಂಡಿತು. ಬಳಿಕ 2ನೇ ವಿಕೆಟ್‌ಗೆ ಜೊತೆಯಾದ ಮಿಚೆಲ್‌ ಮಾರ್ಷ್‌(81) ಹಾಗೂ ನಾಯಕ ಸ್ಟೀವ್‌ ಸ್ಮಿತ್‌(22) 72 ರನ್‌ಗಳಿಸಿ ತಂಡಕ್ಕೆ ಚೇತರಿಕೆ ನೀಡಿದರು. ಆಲ್ರೌಂಡರ್‌ ಮಿಚೆಲ್‌ ಮಾರ್ಷ್‌ ಆಕರ್ಷಕ ಅರ್ಧಶತಕ ಸಿಡಿಸಿದರು. ಆದರೆ ನಂತರದಲ್ಲಿ ಬಂದ ಲಬುಶೇನ್‌(15), ಜೋಶ್‌ ಇಂಗ್ಲಿಸ್‌(26), ಗ್ರೀನ್‌(12), ಮ್ಯಾಕ್ಸ್‌ವೆಲ್‌(8), ಸ್ಟಾಯ್ನಿಸ್‌(5), ಅಬೋಟ್‌(0), ಸ್ಟಾರ್ಕ್(4*) ಹಾಗೂ ಜ್ಹಂಪ(0) ಬಂದಷ್ಟೇ ವೇಗವಾಗಿ ಪೆವಿಲಿಯನ್‌ ಸೇರಿಕೊಂಡರು.
ಶಮಿ-ಸಿರಾಜ್‌ ಅಬ್ಬರ:
ಟೀಂ ಇಂಡಿಯಾ ಪರ ವೇಗಿಗಳಾದ ಮೊಹಮ್ಮದ್‌ ಶಮಿ(3/17) ಹಾಗೂ ಮೊಹಮ್ಮದ್‌ ಸಿರಾಜ್‌(3/29) ಆಕ್ರಮಣಕಾರಿ ಬೌಲಿಂಗ್‌ ನಡೆಸಿದರು. ಇನ್ನಿಂಗ್ಸ್‌ ಆರಂಭದಿಂದಲೇ ಆಸೀಸ್‌ ಬ್ಯಾಟ್ಸ್‌ಮನ್‌ಗಳಿಗೆ ಕಡಿವಾಣ ಹಾಕಿದರು. ಉಳಿದಂತೆ ರವೀಂದ್ರ ಜಡೇಜಾ 2, ಹಾರ್ದಿಕ್‌ ಮತ್ತು ಕುಲ್ದೀಪ್‌ ತಲಾ 1 ವಿಕೆಟ್‌ ಪಡೆದರು.
IND v AUS 1st ODI, Team India, Australia, Shami, Siraj, Sports Karnataka
