ಐಸಿಸಿ ಏಕದಿನ ವಿಶ್ವಕಪ್ ಪಂದ್ಯಾವಳಿಯಲ್ಲಿ ಪಾಲ್ಗೊಳ್ಳುವ ಸಲುವಾಗಿ ಸೌತ್ ಆಫ್ರಿಕಾದ 15 ಮಂದಿ ಆಟಗಾರರ ತಂಡ ಭಾರತಕ್ಕೆ ಆಗಮಿಸಿದೆ.
ನಾಯಕ ತೆಂಬಾ ಬವುಮಾ ಸಾರಥ್ಯದಲ್ಲಿ ಭಾರತಕ್ಕೆ ಆಗಮಿಸಿದ ಸೌತ್ ಆಫ್ರಿಕಾ ಆಟಗಾರರಿಗೆ ಅದ್ದೂರಿಯಾಗಿ ಸ್ವಾಗತಿಸಲಾಯಿತು. ಈ ಬಾರಿಯ ವಿಶ್ವಕಪ್ನಲ್ಲಿ ಉತ್ತಮ ಪ್ರದರ್ಶನ ನೀಡುವ ವಿಶ್ವಾಸದೊಂದಿಗೆ ಸೌತ್ ಆಫ್ರಿಕಾ ಆಟಗಾರರು ಭಾರತಕ್ಕೆ ಆಗಮಿಸಿದ್ದು, ಅಕ್ಟೋಬರ್ 7ರಂದು ದೆಹಲಿಯಲ್ಲಿ ನಡೆಯುವ ಶ್ರೀಲಂಕಾ ವಿರುದ್ಧದ ಪಂದ್ಯದೊಂದಿಗೆ ಸೌತ್ ಆಫ್ರಿಕಾ 2023ರ ಏಕದಿನ ವಿಶ್ವಕಪ್ ಅಭಿಯಾನ ಆರಂಭಿಸಲಿದೆ.
ಇದಕ್ಕೂ ಮುನ್ನ ಎರಡು ಅಭ್ಯಾಸ ಪಂದ್ಯಗಳಲ್ಲಿ ಸೌತ್ ಆಫ್ರಿಕಾ ತಂಡ ಕಣಕ್ಕಿಳಿಯಲಿದ್ದು ಸೆ.29ರಂದು ಅಫ್ಘಾನಿಸ್ತಾನದ ವಿರುದ್ಧ ಹಾಗೂ ಅಕ್ಟೋಬರ್ 2ರಂದು ನ್ಯೂಜಿ಼ಲೆಂಡ್ ವಿರುದ್ಧ ಅಭ್ಯಾಸ ಪಂದ್ಯವನ್ನ ಆಡಲಿದೆ. ಇತ್ತೀಚೆಗೆ ತವರಿನಲ್ಲಿ ನಡೆದ ಆಸ್ಟ್ರೇಲಿಯಾ ವಿರುದ್ಧದ ಐದು ಪಂದ್ಯಗಳ ಏಕದಿನ ಸರಣಿಯಲ್ಲಿ 3-2 ಅಂತರದಿಂದ ಗೆದ್ದಿರುವ ಸೌತ್ ಆಫ್ರಿಕಾ ಆತ್ಮವಿಶ್ವಾಸದಲ್ಲಿದ್ದು, ವಿಶ್ವಕಪ್ನಲ್ಲೂ ತಮ್ಮ ಗೆಲುವಿನ ಲಯವನ್ನ ಮುಂದುವರಿಸುವ ನಿರೀಕ್ಷೆಯಲ್ಲಿದೆ.
ಸೌತ್ ಆಫ್ರಿಕಾದ ವಿಶ್ವಕಪ್ ತಂಡದಲ್ಲಿರುವ 15 ಮಂದಿ ಆಟಗಾರರಲ್ಲಿ ಬಹುತೇಕ ಆಟಗಾರರು ಭಾರತದಲ್ಲಿ ಐಪಿಎಲ್ನಲ್ಲಿ ಆಡಿರುವ ಅನುಭವ ಹೊಂದಿದ್ದಾರೆ. ಹೀಗಾಗಿ ಭಾರತದ ವಾತಾವರಣ ಹಾಗೂ ಪಿಚ್ಗಳ ಬಗ್ಗೆ ಅರಿವು ಹೊಂದಿದ್ದು, ಏಕದಿನ ವಿಶ್ವಕಪ್ನಲ್ಲಿ ಇದರ ಲಾಭ ಪಡೆಯುವ ಲೆಕ್ಕಾಚಾರದಲ್ಲಿದ್ದಾರೆ. ಪ್ರಮುಖವಾಗಿ ಕ್ವಿಂಟನ್ ಡಿಕಾಕ್, ಡೇವಿಡ್ ಮಿಲ್ಲರ್, ಕಗೀಸೋ ರಬಾಡ, ಲುಂಗಿ ಎನ್ಗಿಡಿ, ವ್ಯಾನ್ ದರ್ ದುಸೇನ್ ಹಾಗೂ ಹೆನ್ರಿಕ್ ಕ್ಲಾಸೆನ್ ಅವರುಗಳು ಸೌತ್ ಆಫ್ರಿಕಾ ತಂಡದ ಪ್ರಮುಖ ಆಟಗಾರರಾಗಿದ್ದು, ಇವರುಗಳ ಮೇಲೆ ಹೆಚ್ಚಿನ ನಿರೀಕ್ಷೆ ಇದೆ.
ವಿಶ್ವಕಪ್ಗೆ ಸೌತ್ ಆಫ್ರಿಕಾ ತಂಡ:
ತೆಂಬಾ ಬವುಮಾ, ಗೆರಾಲ್ಡ್ ಕಾಟ್ಜೆ, ಕ್ವಿಂಟನ್ ಡಿಕಾಕ್, ರೀಜಾ಼ ಹೆಂಡ್ರಿಕ್ಸ್, ಮಾರ್ಕೋ ಜಾನ್ಸನ್, ಹೆನ್ರಿಕ್ ಕ್ಲಾಸೆನ್, ಕೇಶವ್ ಮಹಾರಾಜ್, ಐಡೆನ್ ಮಾರ್ಕ್ರಂ, ಡೇವಿಡ್ ಮಿಲ್ಲರ್, ಲುಂಗಿ ಎನ್ಗಿಡಿ, ಆಂದಿಲೆ ಪೆಲುಕ್ವಾವೋ, ಕಗೀಸೋ ರಬಾಡ, ತಬ್ರೈಜ್ ಶಂಸಿ, ವ್ಯಾನ್ ದರ್ ದುಸೇನ್, ಲಿಜಾ಼ಡ್ ವಿಲಿಯಮ್ಸ್.
CWC 2023, South Africa, ODI Cricket, Sports Karnataka