ಪ್ರಸಕ್ತ ಐಪಿಎಲ್ನಲ್ಲಿ ಸೋಲಿನೊಂದಿಗೆ ಟೂರ್ನಿ ಆರಂಭಿಸಿರುವ ಚೆನ್ನೈ ಸೂಪರ್ ಕಿಂಗ್ಸ್ ತವರಿನಲ್ಲಿ ಇಂದು ಲಕ್ನೋ ಸೂಪರ್ ಜೈಂಟ್ಸ್ ತಂಡವನ್ನು ಎದುರಿಸಲಿದ್ದು ಮೊದಲ ಗೆಲುವಿಗಾಗಿ ಎದುರು ನೋಡುತ್ತಿದೆ.
ಚೆಪಾಕ್ ಅಂಗಳ ಚೆನ್ನೈ ತಂಡಕ್ಕೆ ಭದ್ರಕೋಟೆಯಾಗಿದ್ದು ಈ ಮೈದಾನದಲ್ಲಿ ಶೇ.70.91 ರಷ್ಟು ಗೆದ್ದುಕೊಂಡಿದೆ. ತವರಿನ ಅಭಿಮಾನಿಗಳೆದರು 3 ವರ್ಷದ ಬಳಿಕ ಧೋನಿ ಪಡೆ ಆಡುತ್ತಿದ್ದು ಸಹಜವಾಗಿಯೇ ಗೆಲುವಿನ ನೆಚ್ಚಿನ ತಂಡವಾಗಿದೆ.
ಬೌಲಿಂಗ್ ನಲ್ಲಿ ಚೆನ್ನೈ ಬಲಿಷ್ಠವಾಗಿರುವುದು ಕಂಡು ಬರುತ್ತಿಲ್ಲ.ಇನ್ನು ಬ್ಯಾಟಿಂಗ್ನಲ್ಲಿ ಮಧ್ಯಮ ಹಾಗೂ ಕೆಳ ಕ್ರಮಾಂಕ ಬಲಿಷ್ಠವಾಗಿ ಕಾಣುತ್ತಿಲ್ಲ. ಬ್ಯಾಟರ್ಗಳ ಮೇಲೆ ಹೆಚ್ಚಿನ ಒತ್ತಡ ಬೀಳಲಿದೆ. ಮೊನ್ನೆ ಋತುರಾಜ್ ಗಾಯಕ್ವಾಡ್ ಔಟಾದ ನಂತರ ಚೆನ್ನೈ ತಂಡದ ಸ್ಕೋರ್ ಕುಸಿಯುತ್ತಾ ಸಾಗಿತು. ಇದರ ಲಾಭ ಪಡೆದ ಗುಜರಾತ್ ಸುಲಭವಾಘಿ ಚೇಸ್ ಮಾಡಿತು. 16.25 ಕೋಟಿ ರೂ.ಗೆ ಖರೀದಿಯಾದ ಬೆನ್ ಸ್ಟೋಕ್ಸ್ ಅವರಿಂದ ಹಚ್ಚಿನ ನಿರೀಕ್ಷೆ ಇಟ್ಟುಕೊಳ್ಳಲಾಗಿದೆ.
ಇನ್ನು ಲಕ್ನೊ ತಂಡ ಡೆಲ್ಲಿ ವಿರುದ್ಧ ಗೆದ್ದು ಆತ್ಮವಿಶ್ವಾಸ ಹೆಚ್ಚಿಸಿಕೊಂಡಿದ್ದು ಗೆಲುವಿನ ಓಟ ಮುಂದುವರೆಸಲು ಯೋಜನೆ ರೂಪಿಸಿದೆ. ಸ್ಪಿನ್ ಗೆ ನೆರವು ನೀಡುವ ಚೆಪಾಕ್ ಮೈದಾನದಲ್ಲಿ ರವಿ ಬಿಷ್ಣೋಯಿ ಮತ್ತು ಕನ್ನಡಿಗ ಗೌತಮ್ ಮಹತ್ವದ ಪಾತ್ರ ನಿರ್ವಹಿಸಲಿದ್ದಾರೆ.